ကံ့ကော်နီနီ - နိရဉ္စရာ ၊ မတ် ၂၉ / ၂၀၂၅

ငလျင်ဘေးသင့် မြန်မာနိုင်ငံအတွက် တရုတ်နိုင်ငံက ယွမ်သန်း(၁၀၀)တန်ဖိုးရှိ ငလျင်ဘေးအန္တရာယ်ကယ်ဆယ်ရေး အရေးပေါ်လူသားချင်းစာနာထောက်ထားမှုအကူညီများကို ပေးအပ်သွားမည်ဟု မြန်မာနိုင်ငံဆိုင်ရာတရုတ်သံရုံးက ယနေ့ မတ်လ ၂၉ ရက်၊ နေ့လယ်တွင် ထုတ်ပြန်သည်။

“မြန်မာအစိုးရ၏ တောင်းဆိုချက်အရ တရုတ်အစိုးရသည် မြန်မာနိုင်ငံသို့ အရေးပေါ်လူသားချင်းစာနာမှုအကူအညီအဖြစ် ယွမ် ၁၀၀ သန်း ပံ့ပိုးရန် ဆုံးဖြတ်ခဲ့ပြီး ကယ်ဆယ်ရေးအဖွဲ့ ၂ ဖွဲ့စေလွှတ်ကာ တဲများ၊ စောင်များ၊ အရေးပေါ်ဆေးဘက်ဆိုင်ရာအထုပ်များ၊ အစားအစာနှင့် သောက်သုံးရေစင်များစသည့် ဘေးဒဏ်သင့်ဒေသများ အရေးတကြီးလိုအပ်နေသော ပစ္စည်းများ ထောက်ပံ့မည်ဖြစ်သည်”ဟု ထုတ်ပြန်ချက်တွင် ဖော်ပြသည်။

တရုတ်အစိုးရ၏ ပထမအသုတ်အကူအညီပစ္စည်းများကို မတ်လ ၃၁ ရက်နေ့တွင် စတင်ပို့ဆောင်မည်ဖြစ်ပြီး မြန်မာနိုင်ငံ၏ လိုအပ်ချက်များအရ နောက်ထပ်အကူအညီများ ဆက်လက်ပံ့ပိုးသွားမည်ဖြစ်သည်။

ဓာတ်ပုံ - မြန်မာနိုင်ငံ လူမှုကယ်ဆယ်ရေးအဖွဲ့ - မန္တလေးတိုင်းဒေသကြီး ကော်မတီ

တရုတ်မှ ပထမဆုံးကယ်ဆယ်ရေးအဖွဲ့သည် ယနေ့နံနက်တွင် ရန်ကုန်သို့ ရောက်ရှိခဲ့ပြီး ဘေးဒဏ်သင့်ဒေသများသို့ အမြန်သွားရောက်ကာ ကယ်ဆယ်ရေးလုပ်ငန်းများ စတင်ဆောင်ရွက်မည်ဟု ထုတ်ပြန်ထားသည်။

ယမန်နေ့ မတ်လ ၂၈ ရက်၊ မွန်းလွဲ ၁၂ နာရီ ၅၁ မိနစ်တွင် မန္တလေးမြို့၏ အရှေ့မြောက်ဘက် ၂ဝ ကီလိုမီတာခန့်အကွာကို ဗဟိုပြု၍ အင်အား ရစ်(ခ်)တာစကေး ၇ ဒသမ ၇ အဆင့်ရှိ အင်အားအလွန်ပြင်းထန်သော မြေငလျင်တစ်ခုလှုပ်ရှားသွားခဲ့ခြင်းဖြစ်သည်။

မြေငလျင်ဒဏ်ကြောင့် မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ နေပြည်တော်နှင့် မကွေးတိုင်းဒေသကြီး၊ ပဲခူးတိုင်းဒေသကြီးနှင့်ရှမ်းပြည်နယ်အရှေ့မြောက်ပိုင်းဒေသတို့တွင် လမ်းတံတား၊ အဆောက်အဦများပျက်စီးပြီး ပြည်သူပေါင်း ထောင်နှင့်ချီသေဆုံးကာ ထိခိုက်ဒဏ်ရာရမှုရှိခဲ့သည်။

ယနေ့မွန်းလွဲပိုင်း စစ်ကောင်စီထုတ်ပြန်ချက်အရ ငလျင်ဒဏ်ကြောင့် သေဆုံးသူ ၁၀၀၂ ဦးနှင့် ထိခိုက်ဒဏ်ရာရသူ ၂၃၇၆ ဦးရှိကြောင်း သိရသည်။

ဓာတ်ပုံ- မြန်မာသို့ ရောက်ရှိလာသည့် တရုတ်နိုင်ငံ ၊ ယူနန်ကယ်ဆယ်ရေးဆေးကုသမှုအဖွဲ့ ကို တွေ့ရစဉ်။ (Photo - မြန်မာနိုင်ငံဆိုင်ရာ တရုတ်သံရုံး)

---

ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။