လူထက်နိုင်၊ နိရဥ္ဇရာ၊ မေ ၁ /၂၀၂၅

အာဏာသိမ်းကာလအတွင်း ကရင်နီပြည်နယ်နှင့် ကယန်းဒေသတွင် စစ်ရေး၊ နိုင်ငံရေး ပဋိပက္ခများကြောင့် အရပ်သား ၇၄၂ ဦး သေဆုံးပြီး မတရားဖမ်းဆီးခံရသူ (၁၆၀) ဦးရှိကြောင်း တိုးတက်သော ကရင်နီပြည်သူ့အင်အားစု (PKPF)က ယနေ့ မေလ ၁ ရက်တွင် ထုတ်ပြန်သည်။

အဆိုပါအရေအတွက်သည် ၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှ ၂၀၂၅ ခုနှစ်၊ ဧပြီလ ၃၀ ရက်နေ့အထိဖြစ်သည်ဟု ဖော်ပြထားသည်။

သေဆုံးသူများအနက် အရပ်သား ၁၇၇ ဦးသည် စစ်ဘေးရှောင်နေရင်း သေဆုံးခဲ့ခြင်းဖြစ်ပြီး ၅၆၅ ဦးသည် သတ်ဖြတ်ခံရခြင်းဖြစ်ကြောင်း သိရသည်။

ထို့အပြင် တိုက်ပွဲပေါင်း ၁၃၂၃ ကြိမ်ဖြစ်ပွားခဲ့သလို စစ်ကောင်စီတပ်က လေကြောင်းတိုက်ခိုက်မှုပေါင်း ၁၈၇၄ ကြိမ် ပြုလုပ်ခဲ့သည်ဟု PKPF က ထုတ်ပြန်ချက်တွင် ပါရှိသည်။

တိုက်ပွဲအတွင်း KNDF၊ PDF၊ KA ပူးပေါင်းတပ်များဖက်မှ ၇၄၀ ဦး သေဆုံးခဲ့ပြီး စစ်ကောင်စီတပ်ဖက်မှ ၃၇၆၀ ဦး သေဆုံးခဲ့ကြောင်း သိရသည်။

စစ်ကောင်စီတပ်၏ စစ်ကား ၆၈ စီးနှင့် တိုက်လေယာဉ် သုံးစီးကိုလည်း တော်လှန်ရေးတပ်များက ဖျက်ဆီးနိုင်ခဲ့ကြောင်း သိရသည်။

ထို့အပြင် စာသင်ကျောင်း ၂၉ ကျောင်း၊ လူနေအိမ် ၃၀၃၁ လုံး၊ ဆေးရုံ၊ ဆေးခန်း ၁၇ ရုံနှင့် ဘာသာရေး အဆောက်အအုံ ၅၇ လုံး ပျက်စီးခဲ့သည်ဟု PKPF က ထုတ်ပြန်ချက်ထဲတွင် ထည့်သွင်းထားသည်။

ဓာတ်ပုံ - PKPF
---

ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။