နိရဥ္ဇရာ၊ဇွန်၂၁ /၂၀၂၅

တနင်္သာရီတိုင်း၊ မြိတ်မြို့နယ်တွင် အတင်းအဓမ္မစုဆောင်းခြင်းခံရသည့် ဒု-တပ်ကြပ်တစ်ဦးနှင့်တပ်ကြပ်ကြီး(အကူ)တစ်ဦးတို့သည် လက်နက်များနှင့်အတူ  ပြည်သူ့ကာကွယ်ရေးတပ်မတော်(PDF)  မြိတ်ခရိုင်အမှတ် (၁) တပ်ရင်းသို့ ဘက်ပြောင်း ခိုလှုံလာကြသည်ဟုသတင်းရရှိသည်။

၎င်းတို့သည်မြိတ်မြို့နယ်ဘုတ်ခြံအခြေစိုက်ခလရ (၁၇) မှဖြစ်ပြီးဇွန်၂၁ရက်နေ့တွင်MA-1 မောင်းပြန်ရိုင်ဖယ် (၁) လက်၊MA-2 စက်ကလေး (၁) လက်၊လက်ပစ်ဗုံး (၂) လုံး၊M-14 နင်းမိုင်း (၁) ခု၊ကျည်ဘောက် (၁၅)ခု၊ကပစထုတ်၅.၅၆ကျည် (၇၉ဝ) တောင့်ယူဆောင်ပြီးဘက်ပြောင်းခိုလှုံ လာခြင်းဖြစ်ကြောင်းမြိတ်ခရိုင်အမှတ်(၁)တပ်ရင်းကထုတ်ပြန်ထားသည်။

၎င်းတို့၂ဦးသည်ပြည်သူ့စစ်မှုထမ်းအခြေခံစစ်သင်တန်းအပတ်စဉ် (၂) အဖြစ်အတင်းအဓမ္မစုဆောင်းခြင်းခံခဲ့ရပြီးခလရ (၁၇) ၌တာဝန်ချထားခြင်းခံခဲ့ရသူများဖြစ်ကြောင်းသိရှိရသည်။

လက်ရှိအချိန်တွင်ဘက်ပြောင်းခိုလှုံလာသူ (၂) ဦးအားကောင်းမွန်လုံခြုံစွာစောင့်ရှောက်ထားရှိပြီးလိုအပ်သည်များကိုဆက်လက်လုပ်ဆောင်လျက်ရှိကြောင်း၊  မြိတ်ခရိုင်အမှတ် (၁) တပ်ရင်းအနေဖြင့်စစ်အောက်စီလက်အောက်မှရုန်းထွက်လာမည့်မည်သူကိုမဆိုအမြဲလက်ကမ်းကြိုဆိုလျက်ရှိကြောင်းထုတ်ပြန်ချက်တွင်ဖော်ပြထားသည်။

၎င်းပြင်စစ်ကောင်စီတပ်အတွင်းသို့အကြောင်းအမျိုးမျိုးဖြင့်ရောက်ရှိတာဝန်ထမ်းဆောင်နေရသူများအနေဖြင့်သတ္တိမွေး၍ရုန်းထွက်ခဲ့ကြရန်လည်း ပြည်သူ့ကာကွယ်ရေးတပ်မတော်မြိတ်ခရိုင်အမှတ်(၁)တပ်ရင်းမှတိုက်တွန်းထားသည်။