(စစ်အာဏာမသိမ်းခင်ကတစ်အိတ် ကျပ် ၅ သောင်းအောက်သာရှိခဲ့သော ဓာတ်မြေဩဇာ အာဏာသိမ်းပြီးနောက်တွင်ကျပ် ၈ သောင်း၊ ၁သိန်းအထိ ဈေးတက်)

ရခိုင်တွင်ယခုနှစ်အတွင်း ဓာတ်မြေသြဇာဈေးနှုန်းမှာ ကျဆင်းနေသော်လည်း နယ်ဘက်များတွင်ဈေးနှုန်းမြှင့်တင်ရောင်းချနေကြသည့်အတွက် လယ်သမားများတွင် အခက်အခဲဖြစ်နေကြရသည်ဟုသိ၇သည်။

ယခုနှစ်မိုးဦးကာလအစပိုင်းတွင်ဓာတ်မြေသြဇာတစ်အိတ်ဈေးနှုန်းမှာ ကျပ်  ၉သောင်းမှ ကျပ် ၁ သိန်းအထိ ရှိခဲ့သော်လည်းလက်ရှိတွင် ဈေးနှုန်းများ ပြန်ကျနေသည်သည်ဟု သိ၇သည်။

သံကွင်းဓာတ်မြေသြဇာအမျိုးအစားမှာကျပ် ၁ သိန်းမှ ကျပ် ၉၄၀၀၀ကျပ်သို့လည်းကောင်း၊ ယူရီးယားဓာတ်မြေသြဇာ အဖြူအမျိုးအစားအားလုံးမှာ ၉၅၀၀၀ကျပ်မှ ၈၅၀၀၀ ကျပ်၊  ပေါင်းသေပင်ကောင်းအမျိုးအစားမှာပုံမှန် ၆၀၀၀၀ ကျပ်ဈေးနှုန်းရှိနေသည်ဟု ဓာတ်မြေသြဇာ အရောင်းဆိုင်များက ပြောသည်။

စစ်တွေမြို့၊ဦးဘထွန်းဓာတ်မြေသြဇာအရောင်းဆိုင်မှ အရောင်းစာရေးမက "ဓာတ်မြေသြဇာကအရင်ကနဲ့ဆိုရင် အခုက ဈေးကျသွားတယ်လို့ပြောလို့၇ပါတယ်။ ၉ သောင်းကျော်၊ ၈သောင်းဈေးဖြစ်သွားတော့ ဈေးကျသွားတာပေါ့နော်" ဟု ပြောသည်။

ဓာတ်မြေသြဇာဈေးနှုန်းမှာ ကျဆင်းနေသော်လည်းနယ်ဘက်ရှိ ဓာတ်မြေသြဇာအရောင်းဆိုင်များ၏ ဈေးနှုန်းမှာ ကျဆင်းမှုမရှိဘဲယခင်းဈေးအတိုင်းရောင်းချနေကြရသည်ဟု ကျောက်တော်မြို့နယ်မှဓာတ်မြေသြဇာလက်လီအရောင်းဆိုင်ပိုင်ရှင်တစ်ဦးက ပြောသည်။

"နယ်ဘက်တွေမှာက ဈေးကအရင်ကဈေးဖြစ်နေတယ်။ အရင်ကဈေးဖြစ်နေတယ်ဆိုတာကလည်း ကျွန်တော်တို့က စစ်တွေကနေတစ်ဆင့်ဝယ်ယူရောင်းချရတယ်။ သယ်ယူပို့ဆောင်ခတွေနဲ့ ပေါင်းလိုက်ရင်အဲ့ဒီဈေးအတိုင်းရောင်းမှအဆင်ပြေတယ်" ဟု ပြောသည်။

ယင်းအပြင်ဓာတ်မြေသြဇာအရောင်းဆိုင်များမှာလည်း ပြည်မဘက်မှ ဓာတ်မြေသြဇာများ မှာယူရသည့်အခါတွင် ရာသီဥတုနှင့်ခရီးလမ်းများတွင် ကြန့်ကြာမှုများစသည့် အခက်အခဲများနှင့်ကြုံတွေ့နေကြရသည်ဟုလည်းသိရသည်။

စစ်တွေမြို့မှအမည်မဖော်လိုသည့် ဓာတ်မြေသြဇာအရောင်းဆိုင်ပိုင်ရှင်တစ်ဦးက"ရေကြောင်းမှာတယ်ဆိုရင် မိုးသက်လေပြင်းတွေကျပြီး ပင်လယ်မှာလှိုင်းကြီးနေရင်လည်းကြန့်ကြာတယ်။ ကားနဲ့သယ်ယူရတဲ့အပိုင်းတွေမှာလည်း အစစ်အဆေးတွေများတယ်။အခွန်ဆောင်ရတာတွေနဲ့ သတ်မှတ်ထားတဲ့အချိန်မှာ မရောက်နိုင်တာတွေလည်း ရှိတယ်" ဟုပြောသည်

ရခိုင်ရှိလယ်သမားများမှာ ယခုနှစ်အတွင်း မုန်တိုင်းကြောင့် လယ်ယာမြေများမှာ ဆားငန်ရေဝင်ရောက်ပျက်စီးခြင်း၊ ထွန်ယက်ရန်ကျွဲနွားရှားပါးမှု၊ လုပ်သားအင်အားရှားပါးမှု၊ ထွန်ယက်ခ ဈေးနှုန်းမြင့်တက်မှု၊စိုက်ပျိုးစရိတ်ချေးငွေ ပုံမှန်လို ချေးယူနိုင်ခြင်းမရှိမှုစသည့်အခက်အခဲ အကျပ်အတည်းများနှင့် ရင်ဆိုင်နေကြ၇သည်။

မြန်မာနိုင်ငံတွင်စစ်တပ်က အာဏာမသိမ်းခင်ကဓာတ်မြေသြဇာတစ်အိတ်လျှင် ကျပ် ၅ သောင်းအောက်သာရှိခဲ့သော်လည်းအာဏာသိမ်းပြီး နောက်တွင် ကျပ် ၈ သောင်း၊ ၁သိန်းခန့်အထိ မြင့်တက်သွားခဲ့သည်ဟု သိ၇သည်။

ယခုနှစ်တွင်ဆိုလျှင်တစ်အိတ်လျှင်ကျပ် ၁ သိန်းခန့်အထိရှိနေ၍ လယ်သမားများမှာဓာတ်မြေသြဇာသုံးနိုင်တော့မည်မဟုတ်ဟု ပုဏ္ဏားကျွန်း မြို့နယ်မှ လယ်သမားဦးစောရွှေမောင်က ပြောသည်။

“မြေဆီတစ်အိတ်ကို လေးငါးသောင်းလောက်ဆိုရင်တော့ကျနော်တို့အနေနဲ့ ဝယ်ယူနိုင်တယ်။ အခု ၉ သောင်း၊ ၁သိန်းဖြစ်သွားတော့ ဝယ်ဖို့ကလည်း အဆင်မပြေနိုင်တဲ့အခြေအနေတွေနဲ့ ရင်ဆိုင်နေရတယ်။ပြောရမယ်ဆိုရင်ဓာတ်မြေသြဇာက ဈေးကျတယ်ဆိုပေမဲ့ နယ်ဘက်တွေမှာကအရင်ဈေးအတိုင်းနဲ့ဘဲ ဝယ်ယူနေကြရတယ်" ဟု ပြောသည်။

ဓာတ်မြေသြဇာမသုံးလျှင်လည်း စပါးအထွက်နှုန်းမကောင်းသည့်အတွက် လယ်သမားများမှာ အထွက်နှုန်းကောင်းမွန်ရန်အတွက် မြေဆီ၊မြေသြဇာများကို အခက်အခဲကြားမှ အဆင်ပြေသလို ဝယ်ယူနေကြရသည်ဟု သိရသည်။

ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော်(ULA/AA)စစ်ဦးစီးချုပ်ဗိုလ်ချုပ်ထွန်းမြတ်နိုင်ကိုယ်တိုင်ကလည်းမုန်တိုင်းအလွန်တွင် အိမ်ဆောက် ပစ္စည်းများအပါအဝင် ကုန်ပစ္စည်းများကို ဈေးနှုန်းမြှင့်တင်ရောင်းချမှုမပြုလုပ်ရန်လုပ်ငန်းရှင်များအား သတိပေး တားမြစ်ထားသည်။

ယင်းအပြင် ULA/AAလက်အောက်ခံမိုခါဆိုင်ကလုန်းမုန်တိုင်းဒဏ်သင့် အာရက္ခအရေးပေါ် ကယ်ဆယ်ရေးနှင့်ပြန်လည်နေရာချထားရေး ကော်မတီ(ERRCA)ကလည်း ရခိုင်ရှိ စီးပွားရေး လုပ်ငန်းရှင်များအနေဖြင့်ကုန်ဈေးနှုန်းများကို ဈေးနှုန်းအဆမတန်မြှင့်ကာ ရောင်းချခြင်းများကို မပြုလုပ်ရန်နှင့်သင့်တင့်သော ဈေးနှုန်းများဖြင့် ရောင်းချကြရန်လည်း ဇူလိုင်လ ၁၄ ရက်၊မိုခါမုန်တိုင်း ၂ လပြည့်နေ့တွင် ထုတ်ပြန်တိုက်တွန်ထားသည်။ (NN-12)