ယနေ့ ဒီဇင်ဘာ ၂၅ရက် နေ့လယ်ပိုင်းက  စစ်ကောင်စီတပ်လက်နက်ကြီးပစ်ခတ်မှုကြောင့်မြောက်ဦးမြို့တွင် အပြစ်မဲ့အရပ်သားပြည်သူ ၁ ဦး ထပ်မံ သေဆုံးပြီး၊ကလေးငယ်နှစ်ဦးအပါအဝင် အရပ်သား ၃ ဦးဒဏ်ရာရရှိသွားကြောင်းသတင်းရရှိသည်။

သေဆုံးသွားသူမှာလက်ကောက်ဈေးအုပ်စု၊ ဆင်ချဆိပ်ရပ်ကွက်မှ ဦးမောင်မောင်သိန်း(၄၀)နှစ်ဖြစ်ပြီးတစ်ရပ်ကွက်တည်းနေ အမျိုးသားတစ်ဦးနှင့် ကလေးသူငယ်နှစ်ဦးတို့မှာလက်နက်ကြီးကျည်စထိမှန်ဒဏ်ရာရရှိသွားကြောင်းမြောက်ဦးမြို့ခံတစ်ဦးကပြောသည်။

" ဆင်ချဆိပ်ရပ်ကွက်အစွန်ဘက်နေအိမ်တွေဘက်ကျပြီးပေါက်ကွဲတာ။သေဆုံးသွားသူနာမည်က ဦးမောင်မောင်သိန်းပါ။ ဒဏ်ရာ၇သွားတာကတော့နောက်ထပ်ယောကျာ်းတစ်ယောက်နဲ့ ကလေးလေးနှစ်ယောက်။ မိန်းကလေးတွေပါ" ဟုပြောသည်။

ဒဏ်ရာရသူများထဲမှ အမျိုးသားတစ်ဦးမှာပေါင်ကိုလက်နက်ကြီးကျည်စထိမှန်သွားပြီး စိုးရိမ်အခြေ အနေရှိကြောင်း၊နောက်ထပ် မိန်းကလေးငယ် နှစ်ဦးမှာ လက်နက်ကြီးကျည်စစင်ခဲ့သော်လည်းအသက်အန္တရာယ်မစိုးရိမ်၇သည့်အခြေအနေဖြစ်ကြောင်း မြို့ခံများကပြောသည်။

စစ်ကောင်စီ၏ခမ၇ ၃ရရ၊ ခမ၇ ၅၄၀ တပ်ရင်းများက မြို့ပေါ်ရပ်ကွက်များသို့ ယနေ့မနက်ပိုင်းကတည်းကလက်နက်ကြီးဆက်တိုက်ပစ်ခတ်နေခြင်းဖြစ်ကြောင်း မြို့ခံများကပြောသည်။

ယမန်နေ့ဒီဇင်ဘာလ ၂၄ ရက်တစ်ရက်တည်းတွင် စစ်ကောင်စီလက်နက်ကြီးပစ်ခတ်မှုကြောင့်မြောက်ဦးမြို့မှ အရပ်သား ၃ ဦးသေဆုံးပြီး ၆ ဦးထက်မနည်းဒဏ်ရာရရှိခဲ့သည်။

ယင်းသို့လက်နက်ကြီးပစ်ခတ်မှုကြောင့်ယနေ့မနက်ပိုင်းက နန်းရာကုန်းရှိ ရှေးဟောင်း သုတေသနပြတိုက် အပါအဝင် သာသနိကအဆောက်အအုံတချို့၊လူနေအိမ်တချို့လက်နက်ကြီးကျည်ကျရောက်ပေါက်ကွဲပျက်စီးခဲ့ကြောင်းမြို့ခံများကပြောသည်။