မြောက်ဦး အခြေစိုက် ခမ၇ (၅၄၀) တပ်ရင်း ရက္ခိုင့်တပ်တော်သိမ်းပိုက်
( ၃ ရက်အတွင်း ၇ခိုင်မြို့၃ မြို့မှ တပ်ရင်းကြီး ၃ ရင်းကို ရက္ခိုင့်တပ်တော် အောင်မြင်စွာ သိမ်းပိုက်ပြီး သမိုင်းမှတ်တိုင်စိုက်ထူ)
ရခိုင်ရှေးဟောင်းမင်းနေမြို့တော်မြောက်ဦးအခြေစိုက် ခမ၇ (၅၄၀) ကို ရက္ခိုင့်တပ်တော်က အလုံးစုံသိမ်းပိုက်ထားနိုင်ပြီဖြစ်ကြောင်းရက္ခိုင့်တပ်တော်က သတင်း ထုတ်ပြန်သည်။
ရက္ခိုင့်တပ်တော်၏ သတင်းထုတ်ပြန်ချက်အထဲတွင်“ မြောက်ဦး အခြေစိုက် အကြမ်းဖက် စစ်ကောင်စီ၏ တပ်ရင်းများထဲမှ ခမ၇ (၅၄၀)တပ်ရင်းတစ်ရင်းလုံးအား ၂၀၂၄ ခုနှစ်၊ ဇန်နဝါရီလ ၃၀ ရက်နေ့၊ ည (၁၁) နာရီ (၄၅)မိနစ် အချိန်ခန့်တွင် ရက္ခိုင့်တပ်တော်မှ ရန်သူ၏ ခုခံစစ်အား အပြတ်အသတ်ချေမှုန်းနိုင်ခဲ့ပြီးနောက်အလုံးစုံသိမ်းပိုက်ထား နိုင်ခဲ့ပြီဖြစ်သည်” ဟု ဖော်ပြထားသည်။
မြောက်ဦးမြို့တွင် ခမ၇ (၅၄၀)၊ ခမ၇ (၃ရရ)၊ ခမ၇ (၃၇၈) တပ်ရင်း ၃ ရင်းရှိရာ ၎င်းတပ်ရင်းများကို တစ်ပြိုင်နက်တည်းAA က ထိုးစစ်ဆင်တိုက်ခိုက်ရာ ခမ၇ (၅၄၀) တပ်ရင်းကိုဦးစွာ သိမ်းပိုက်ခဲ့ခြင်း ဖြစ်သည်။
“ ၎င်းတပ်ရင်းများသည် ကမ္ဘာ့အမွေအနှစ်၊ ရက္ခိုင့်အမွေအနှစ်များကို နှစ်ရှည်လများ ခိုးယူလုယက် ဖျက်ဆီးခဲ့သော၊ လက်နက်ကြီးများဖြင့် ရည်ရွယ်ချက်ရှိရှိပစ်ခတ်တိုက်ခိုက်ခဲ့သော၊ မြောက်ဦးမြို့ကို မီးလောင် ပြာကျအောင်ကြံစည်ကြိုးစားနေသော အကြမ်းဖက်စစ်ကောင်စီတပ်၏ မြောက်ဦး အခြေစိုက်တပ်ရင်းများဖြစ်ကြသည်” ဟုလည်းထုတ်ပြန်ချက်တွင်ဖော်ပြထားသည်။
နိရဉ္စရာမှ စုံစမ်းသိရှိရသလောက်မြောက်ဦးအခြေစိုက် ခမ၇ (၅၄၀) တပ်ရင်းမှ မိသားစုများအပါအဝင်စစ်ကောင်စီတပ်ဖွဲ့ဝင် ၃၁၅ ဦးသည် တိုက်ပွဲအတွင်း ရက္ခိုင့်တပ်တော် (AA) ထံ အညံ့ခံ လက်နက် ချသွားသည်ဟုလည်းသိရှိ၇သည်။
ရက္ခိုင့်တပ်တော်သည် ဆက်လက်ပြီးကျန်ရှိနေသေးသော မြောက်ဦးအခြေစိုက် အခြားတပ်ရင်းနှစ်ရင်း ခမ၇ (၃ရရ)၊ ခမ၇(၃၇၈) အပြင် တစ်ပြိုင်နက်တည်း ထိုးစစ်ဆင်တိုက်ခိုက်နေသော စခန်းတိုင်းကိုလည်းအပြီးသတ်သိမ်းပိုက်ရယူနိုင်ရန် ဆက်လက်တိုက်ခိုက်လျက်ရှိသည်ဟု သိ၇သည်။
ရက္ခိုင့်တပ်တော်သည် ၂၀၂၄ ခုနှစ်၊ ဇန်နဝါရီလ ၃၀ ရက်နေ့တွင် ကျောက်တော်အခြေစိုက် ခမ၇ (၃၇၄) တပ်ရင်းတစ်ခုလုံးအားလည်းကောင်း၊ ဇန်ဝါရီ ၂၈ ရက်နေ့တွင် မင်းပြားမြို့ အခြေစိုက် ခမ၇ (၃၈၀) တပ်ရင်းအားလည်းကောင်းအပြီးသတ်သိမ်းပိုက်လိုက်နိုင်ခဲ့သည်။
အကြမ်းဖက်စစ်ကောင်စီသည် အဆိုပါတပ်ရင်းများအား လေကြောင်းမှ ပစ်ကူပေးခြင်းနှင့် ရေကြောင်းစစ်ရေယာဉ်များမှ လက်နက်ကြီးများဖြင့် ပစ်ခတ်ခြင်း၊ စစ်လက်နက် လူအင်အားဖြည့်တင်းပြီး အသည်းအသန် ခုခံကာကွယ်ခဲ့သော်လည်း သူရသတ္တိအပြည့်ဖြင့် တိုက်ခိုက်နေသော ရက္ခိုင့်တပ်တော် အာရက္ခစစ်သည်တော်များ၏ ထိုးစစ်အောက်၌ ၎င်းတပ်ရင်း ၃ ခုစလုံး ထပ်မံကျဆုံးခဲ့၇ခြင်းဖြစ်သည်။
လှူရန်