မြောက်ဦးက တစ်လသားအရွယ် သုံးမြွှာပူးကလေးများအတွက် အကူညီထောက်ပံ့လိုအပ်နေ

Preview

မြောက်ဦးက တစ်လသားအရွယ် သုံးမြွှာပူးကလေးများအတွက် အကူညီထောက်ပံ့လိုအပ်နေ

သြဂုတ် ၂၂/ ၂၀၂၄ | ကြည့်ရှုသူ :2825

ကံ့ကော်နီနီ၊နိရဉ္စရာ၊ ဩဂုတ် ၂၂ / ၂၀၂၄

ရခိုင်ပြည်၊မြောက်ဦးမြို့နယ်မှ တစ်လသားအရွယ် သုံးမြွှာပူးကလေးငယ်များအတွက် ဆေးဝါးနှင့်နို့မှုန့်စရိတ်အခက်အခဲကြုံနေပြီး အကူညီအထောက်ပံ့များလိုအပ်လျက်ရှိကြောင်းသိရသည်။

အဆိုပါသုံးမြွှာပူးကလေးငယ်များကို မြောက်ဦးမြို့နယ်၊ ရုပ်ချောင်းကျေးရွာမှဦးလှရွှေမောင်နှင့် ဒေါ်ဦးစိန်ညွန့်တို့ကဇူလိုင်လ ၁၇ ရက်က ဒေသအတွင်း ဆေးရုံတစ်ခုတွင် မွေးဖွားခဲ့ခြင်း ဖြစ်သည်။

အဆိုပါသုံးမြွှာပူးကလေးငယ်များထဲနှစ်ဦးမှာမိန်းကလေးဖြစ်ပြီး အငယ်ဆုံးကလေးငယ်မှာ ယောကျာ်းလေးဖြစ်ကြောင်း သိ၇သည်။

မိဘများမှာနွမ်းပါးသည့်တစ်နေ့လုပ်တစ်နေ့စားများဖြစ်၍ လက်ရှိ တစ်လကျော်အရွယ်ရှိ နေပြီဖြစ်သည့်အဆိုပါကလေးငယ်များအတွက် ဆေးဝါးနှင့် နို့မှုန့်စရိတ်များမတတ်နိုင်တော့ဘဲအခက်အခဲကြုံတွေ့နေရကြောင်း ဖခင်ဖြစ်သူ ဦးလှရွှေမောင်က ပြောသည်။

"ကျွန်တော်တို့က တစ်ရက်ကိုမှဝင်ငွေတစ်သောင်းပြည့်အောင်ရတဲ့အခါရ၊ မရတဲ့အခါမရပါ။ကလေးတွေမွေးစတုန်းကနေအခုထိ နီးစပ်ရာဆွေမျိုးသားချင်းတွေဆီက ဟိုလူ့ဆီကငွေကြေး အကူညီယူလိုက်၊ဒီလူဆီကယူလိုက်နဲ့ ကလေးတွေအတွက် ဆေးဝါးနဲ့ နို့မှုန့်တွေဖြေရှင်းနေ၇ပါတယ်" ဟု ပြောသည်။

အသက်(၅၀)ကျော်အရွယ် ဦးလှရွှေမောင်မှာ ထီးအဟောင်းများပြန်လည်ပြုပြင်ခြင်း၊သွပ်အိုးများ ဖာထေးခြင်းစသည့်အလုပ်လုပ်ကိုင်ပြီးတစ်ရက်လျှင် လုပ်အားခပျမ်းမျှဝင်ငွေ ၁၀၀၀၀ ကျပ်ဝန်းကျင်သာရှိကြောင်း သိရသည်။

ဦးလှရွှေမောင်က "ကျနော့်အမျိုးသမီးကကလေးတွေတစ်ဖက်နဲ့မို့ အလုပ်မလုပ်နိုင်ပါဘူး။ ကျွန်တော့်ဝင်ငွေတစ်ခုတည်းနဲ့ပဲကလေးတွေရဲ့နို့မှုန့်စရိတ်၊ ဆေးဝါးတွေနဲ့ တစ်အိမ်လုံး စားစရိတ်ကိုဖြေရှင်းရပါတယ်။မလောက်ငလို့ နီးစပ်ရာတွေ၊ဆွေမျိုးသားချင်းတွေဆီက အကူညီတွေယူနေရတာလည်းကြာပါပြီ။ သူတို့ကလည်းအမြဲတမ်းအကူညီပေးနေဖို့ မဖြစ်နိုင်ပါ"ဟုပြောသည်။

ကလေးမိခင်ဖြစ်သူဒေါ်ဦးစိန်ညွန့်မှာ သုံးမြွှာပူးကလေးငယ်များကိုထိန်းသိမ်းပြုစုနေရ၍ တခြားဝင်ငွေရှာသည့်အလုပ်များလုပ်ကိုင်နိုင်ခြင်းမရှိကြောင်း သိရသည်။

လက်ရှိတွင် ကလေးငယ်များမှာ ကျန်းမာလျက်ရှိသော်လည်းမိဘများကဝင်ငွေနည်းပါးလွန်း၍ လသားအရွယ်ကလေးများအတွက်မဖြစ်မနေလိုအပ်သည့် ဆေးဝါးနှင့် နို့မှုန့်စရိတ်များ ဝယ်ယူရေးနှင့်ရေရှည်ပြုစုစောင့်ရှောက်ရေးအတွက် အခက်ကြုံနေကြရကြောင်း သိရသည်။

ရခိုင်တွင်တိုက်ပွဲနှင့်စစ်ကောင်စီ၏ပိတ်ဆို့မှုကြောင့်ကုန်စည်များပြတ်လပ်ပြီး ကုန်ဈေးနှုန်းအဆမတန်မြင့်တက်လျက်ရှိရာလက်ရှိကလေးငယ်များကို အတိုက်များသည့် Duproနို့မှုန့်တစ်ဘူးကို၉၀၀၀၀ ကျပ်အထိ ဈေးမြင့်တက်လျက်ရှိကြောင်း သိရသည်။

လသားအရွယ်ကလေးငယ်တစ်ဦးအတွက် တစ်လတာ နို့မှုန့်စရိတ်သီးသန့်ကျပ် ၂ သိန်းဝန်းကျင် အထိရှိနေပြီးကလေး လေဆေးအပါအဝင်ဆေးဝါးများစရိတ်ကလည်း တစ်လလျှင် ကျပ်သိန်းနှင့်ချီကုန်ကျကြောင်းကျောက်တော်မြို့နယ်မှ လသားအရွယ်ကလေး မိခင်တစ်ဦးကပြောသည်။

ဓာတ်ပုံ- အနန္တမိတ္တာ ပရဟိတ သွီးလှူရှင်များအသင်း

#မြောက်ဦး

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်