NCA လက်မှတ်​ရေးထိုးထား​သော ပအိုဝ်းအမျိုးသားလွတ်​မြောက်​ရေးအဖွဲ့ချုပ် (PNLO) က စစ်​ကောင်စီကို တိုက်ခိုက်မည်ဖြစ်​ကြောင်းကြေညာ

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူ စာချုပ် (NCA) လက်မှတ်​ရေးထိုးထား​သော ပအိုဝ်းအမျိုးသားလွတ်​မြောက်​ရေးအဖွဲ့ချုပ် (PNLO) က စစ်​ကောင်စီကို တိုက်ခိုက်မည်ဖြစ်​ကြောင်း ဇန်နဝါရီ ၂၆ ရက်နေ့တွင် တရားဝင် ထုတ်ပြန်ကြေညာလိုက်သည်။

NCA လက်မှတ်ရေးထိုးခဲ့ချိန်မှ လက်ရှိ အချိန်အထိ ရှစ်နှစ်ကြာ NCA စာချုပ်ကို မချိုးဖောက်ဘဲ ရပ်တည်ခဲ့သော်လည်း အာမခံချက်ရှိသည့်  နိုင်ငံရေးရလာဒ် မရခဲ့ဟု (PNLO) ၏ ထုတ်ပြန်ချက်တွင် ဖော်ပြသည်။

ယခုဖြစ်ပေါ်လျှက်ရှိသည့် စစ်ရေး ပဋိပက္ခသည် လူမျိုးရေး ပဋိပက္ခမဟုတ်ဘဲ စစ်အာဏာရှင် ယန္တရားကို လည်ပတ်စေသူ လူတစ်စုနှင့် အဖိနှိပ်ခံ တိုင်းရင်းသားလူမျိုးများ၊ တစ်ပြည်လုံးရှိ ပြည်သူလူထုတို့အကြား ဖြစ်ပွားနေသော  ပဋိပက္ခသာဖြစ်သည်ဟုလည်း ဖော်ပြထားသည်။

စစ်အာဏာရှင်စနစ်ချုပ်ငြိမ်းပြီး ပြည်သူလူထုတစ်ရပ်လုံး လိုလားတောင်းတနေသော ဖက်ဒရယ် ဒီမိုကရေစီစနစ်ဖော်ဆောင်နိုင်သည်အထိ ဘ၀တူ ညီနှောင်မဟာမိတ်များနှင့် အတူ ဆင်နွှဲသွားမည်ဖြစ်ကြောင်းလည်း PNLO ကတိပြုထားသည်။