အာဖရိကတိုက် လစ်ဗျားကမ်းခြေမှ ဥရောပတိုက် အီတလီသို့ မြေထဲပင်လယ်ကို ဖြတ်ကျော်ပြီး ရွှေပြောင်းခိုလှုံရန် ကြိုးပမ်းသူ ၆၀ နီးပါး စက်လှေပျက်ပြီးနောက် ပင်လယ်ထဲတွင် ရေနစ်သေဆုံးသွားသည်ဟု ဥရောပကယ်ဆယ်ရေးအဖွဲ့တစ်ဖွဲ့က ကြာသပတေးနေ့တွင် ပြောကြားသည်။
အမျိုးသမီးများနှင့် ကလေးငယ်တစ်ဦးအပါအဝင် လူပေါင်း ၆၀ တို့ လမ်းခရီးတွင် သေဆုံးခဲ့ကြောင်း အသက်ရှင်ကျန်သူများက ပြောကြားခဲ့သည်ဟု မာဆေးအခြေစိုက် SOS Mediterranee က ပြောဆိုသည်။
အဆိုပါကယ်ဆယ်ဆယ်ရေးအဖွဲ့၏ Ocean Viking သင်္ဘောသည် အခြားသော စက်လှေများမှ ရွှေ့ပြောင်းခိုလှုံရန်ကြိုးပမ်းသူ ၂၂၄ ဦးကို တင်ဆောင်ပြီး ဆိပ်ကမ်းသို့ ဦးတည်ခုတ်မောင်းလျှက်ရှိသည်။
ကယ်တင်လာသော ရွှေ့ပြောင်းခိုလှုံသူများအနက် ၂၅ ဦးမှာ နစ်မြုပ်သွားသော စက်လှေပေါ်မှဖြစ်ပြီး အဆိုပါ စက်လှေမှာ မတ်လ ၈ ရက်နေ့က လစ်ဗျားကမ်းခြေ ဇဝီယ မှ ထွက်ခွါလာခဲ့ပြီးနောက် သုံးရက်အကြာတွင် စက်ချို့ယွင်းသွားခဲ့သည်ဟု ဆိုသည်။
အသက်မသေကျန်ရစ်သော ခရီးသည်များ၏ ပြောကြားချက်အရ ၎င်းတို့သည် ပင်လယ်ထဲတွင် အစာရေစာ မစားရဘဲ ရက်အတန်ကြာမျောနေခဲ့ရသည်ဟု သိရသည်။
အိုးရှင်းဗိုက်ကင်း ကယ်ဆယ်ရေးသင်္ဘောသည် ဗုဒ္ဓဟူးနေ့ညက လူပေါင်း ၁၁၃ ဦးကို ကယ်တင်ခဲ့ရပြီး ကြာသပတေးနေ့တွင် ရာဘာလှေတစ်စီးနှင့် မျောနေသော လူ ၈၈ ဦးကို ထပ်မံကယ်ဆယ်ခဲ့ရသည်ဟု ဆိုသည်။
အဆိုပါ ရွှေ့ပြောင်းခိုလှုံသူများ၏ စက်လှေများသည် ၎င်းတို့ရောက်ရှိနေရာမှ မိုင်ပေါင်း ၁၀၀၀ ခန့် ဝေးကွာသည့် အီတလီနိုင်ငံ အန်ကိုနာ ကမ်းခြေသို့ ဦးတည်လျှက်ရှိသည်ဟု ဥရောပကယ်ဆယ်ရေးအဖွဲ့ SOS Mediterranee က ပြောကြားသည်။
SOS Mediterranee အဖွဲ့သည် ၂၀၁၆ ခုနှစ်မှစ၍ မြေထဲပင်လယ်အတွင်း ဥရောပသို့ ရွှေ့ပြောင်းခိုလှုံရန် ကြိုးပမ်းသူပေါင်း ၃၉၀၀၀ ကို ကယ်တင်ပေးခဲ့ပြီးဖြစ်သည်ဟု သိရသည်။
ရွှေ့ပြောင်းခိုလှုံသူများဆိုင်ရာ နိုင်ငံတကာအဖွဲ့( IOM)၏ စာရင်းများအရ ပြီးခဲ့သည့်နှစ်အတွင်း ဥရောပသို့ ရွှေ့ပြောင်းခိုလှုံရန်ကြိုးပမ်းသူ ၃၁၀၅ ဦး မြေထဲပင်လယ်အတွင်း သေဆုံး သို့မဟုတ် ပျောက်ဆုံးခဲ့သည်ဟု သိရသည်။ NN-27/ Ref:Dhaka Tribune