မောင်တောနယ်စပ်ကုန်သွယ်ရေးအတွက် အရေးပါသည့် မောင်တော-အငူမော်ကားလမ်းရှိ လမ်းပိုင်းအချို့ ဆိုးဝါးစွာပျက်စီးနေ

(ဥဒေါင်းနှင့် ၃ မိုင်ကြားရှိလမ်းပိုင်း အလွန်တရာဆိုးဝါးစွာပျက်စီးနေ၍ သွားလာရခက်ခဲနေဟုဆို)

ရခိုင်ပြည်နယ်၊ မောင်တောမြို့နယ်ရှိ နယ်စပ်ကုန်သွယ်ရေးအတွက် အလွန်တရာအရေးပါသည့် မောင်တော-အငူမော်ကားလမ်းမှ လမ်းပိုင်းအချို့သည် ဆိုးဝါးစွာပျက်စီးနေ၍ သွားလာရခက်ခဲနေသည်ဟု ကားသမားများက ပြောသည်။

အဆိုပါကားလမ်းပေါ်ရှိ မောင်တောမြို့နယ်၊ ဥဒေါင်းကျေးရွာနှင့် ၃ မိုင်ကျေးရွာကြားလမ်းပိုင်းမှာ အလွန်တရာဆိုးဝါးစွာပျက်စီးနေ၍ ကားဘီးများ နစ်ကာ ညအိပ်သွားလာနေရသည်ဟု ကားသမားများက ပြောသည်။

ကုန်ကားသမားတစ်ဦးက “ချိုင့်တစ်ချိုင့်စီက နည်းနည်းနောနောဟာကြီးတွေမှ မဟုတ်တာ။ လမ်းမှာ ကားဘီးတွေနစ်နေလို့ သွားမရတော့လို့ ကျနော်တို့တွေ လမ်းမှာ ညအိပ်ရတယ်။ အဲလိုမျိုး အနေအထားတွေဖြစ်တယ်။ ကားသမားတွေ ကိုယ်ထူကိုယ်ထ ပိုက်ဆံတွေစုပြီး အဲလိုမျိုး ကျောက်ဝယ်ပြီးတော့ ဖြည့်ပြီးတော့ သွားရတယ်”ဟု ပြောသည်။

ယခုပျက်စီးနေသည့်လမ်းပိုင်းများသည် ပြီးခဲ့သည့်ရက်ပိုင်းက မိုးသည်းထန်စွာရွာသွန်းပြီး ရေလွှမ်းမိုးမှုကြောင့် ပျက်စီးခြင်းမျိုးမဟုတ်ဘဲ ယခင်ကတည်းက ပျက်စီးနေခဲ့ခြင်းဖြစ်သည်ဟု ဆိုကြသည်။