ပလက်ဝမြို့နယ် ပွိင့် (၃၇၇) စခန်းကုန်းမှ စစ်သား ၈၀ကျော် အိန္ဒိယနိုင်ငံ မီဇိုရမ်ပြည်နယ်ထဲထွက်ပြေး

စစ်ကောင်စီ အခြေကုပ်စစ်စခန်း တစ်ခုဖြစ်သော ပွိင့် (၃၇၇) စစ်ဆင်ရေး အခြေကုပ်စခန်းကုန်းအား ရက္ခိုင့်တပ်တော်မှ တိုက်ခိုက်စဉ် စစ်သားများသည် အိန္ဒိယနိုင်ငံထဲသို့ ထွက်ပြေးသွားကြောင်း သတင်း ရရှိသည်။

၎င်းစစ်သားများအထဲက  ဒီဇင်ဘာ ၂၉ ရက်နေ့တွင်  အိန္ဒိယ နိုင်ငံ၊ မီဇိုရမ်ပြည်နယ်၊ လောင်တလိုင် ခရိုင်၊တွံဆဲန်းရွာထဲ ၂ သုတ်နဲ့ ဝင်ရောက်လာခဲ့သည်ဟု သတင်းရင်းမြစ်တစ်ခုတွင် ဖော်ပြသည်။

ပထမအသုတ် ၇၃ ဦးသည် နံနက်  ၁၁ နာရီတွင်လည်းကောင်း၊  ဒုတိယသုတ် ၁၀ ဦးသည်  ညနေ ၆ နာရီတွင်လည်းကောင်း ထွက်ပြေး ဝင်ရောက်လာသည်ဟု သိရသည်။

၎င်းတို့ ၈၃ ဦးသည် အိန္ဒိယ ရဲစခန်းတွင်  လက်နက်အပ်ပြီး ၎င်း ရဲစခန်းမှတဆင့် အာသံရိုင်ဖယ်တပ်ရင်းထံ လက်နက်များနှင့်တစ်ကွ ပို့ဆောင် အပ်နှံထားသည်ဟု သိရသည်။

စစ်ကောင်စီ တပ်ဖွဲ့ဝင်အားလုံးကို အာသံရိုင်ဖယ်တပ်က လုံးလေမြို့ဘက်ကို ပို့ထားကြောင်း၊  ဒါဏ်ရာရရှိထား သူတချို့လည်း ပါဝင်ကြောင်း သတင်းရရှိသည်။

အဆိုပါ ကိစ္စနှင့်ပတ်သက်၍  စုံစမ်းမေးမြန်းရာတွင် ရက္ခိုင့်တပ်တော်(AA)နှင့် နီးစပ်သူ တစ်ဦးက  သိမ်းပိုက်ထားသည့် အိန္ဒိယနယ်စပ် ပွိင့် (၃၇၇) စခန်းကုန်းမှ စစ်သား ၅၀ ကျော်ခန့်သည် အိန္ဒိယနိုင်ငံ၊ မီဇိုရမ်ပြည်နယ်သို့ထွက်ပြေးခိုလှုံသွားသည်ဟု သတင်းရရှိသည်ဟု ပြောကြားသည်။

" ကျနော်တို့ သတင်းရတာက တပ်သား ၅၀ ကျော်လောက်ရှိတယ်။ ၈၀ လောက်လည်း ဖြစ်နိုင်ပါတယ်။ အတိအကျတော့ မသိဘူး။  အိန္ဒိယကိုမပြေးရင် ပြေးပေါက်မရှိဘူး။ အောက်ပိုင်းမှာက အကုန် အေအေက စိုးမိုးထားတာကို။ အိန္ဒိယအစိုးက စောင့်ရှောက်ထားတယ်လို့ သိရပါတယ်။"

ဒီဇင်ဘာလ (၂၈) ရက်နေ့၊ နံနက် (၉) နာရီ (၂၀) မိနစ်အချိန်တွင် အိန္ဒိယ-မြန်မာနယ်စပ်၊ ပလက်ဝဒေသအတွင်းရှိ ရန်သူ့အခြေကုပ်စစ်စခန်း တစ်ခုဖြစ်သော ပွိင့် (၃၇၇) စစ်ဆင်ရေး အခြေကုပ်စခန်းကုန်းအား ရက္ခိုင့်တပ်တော် ( AA)က အပြီးသတ်သိမ်းပိုက် ရယူထားနိုင်ခဲ့ကြောင်း ယမန်နေ့ ဒီဇင်ဘာ ၂၉ ရက်က သတင်းထုတ်ပြန်သည်။ (NN-7)

ဓာတ်ပုံ - အိန္ဒိယသို့ ထွက်ပြေးလာကြသည့် စစ်ကောင်စီတပ်သားများကိုတွေ့ရစဉ်/   Photo by Khai Sa  Post