ကံ့ကော်နီနီ၊ နိရဥ္စရာ၊ မေ ၈ / ၂၀၂၄
ရခိုင်ပြည်၊ကျောက်ဖြူခရိုင်၊ စနဲမြို့ဈေးတန်းထဲကို စစ်ကောင်စီက ဒရုန်းဖြင့်ဗုံးကြဲချ၍ အမျိုးသမီး တစ်ဦးသေဆုံးကာ ခုနစ်ဦးဒဏ်ရာပြင်းထန်ရရှိသွားကြောင်းသတင်းရရှိသည်။
ယနေ့ မေလ ၈ ရက်၊မနက် ရှစ်နာရီအချိန်က စနဲမြို့ကို စစ်ကောင်စီဒရုန်းက ဗုံး ၇ လုံးထိကြဲချခဲ့ရာ တစ်လုံးမှာ ဈေးအပြင်တန်းဟင်းသီးဟင်းရွက်တန်းကို ကျကွဲပြီး ဈေးရောင်းဝယ်နေကြသည့် ဒေသခံများသေဆုံးဒဏ်ရာရရှိခဲ့ခြင်းဖြစ်ကြောင်းသိရသည်။
စနဲမြို့ခံတစ်ဦးက" အခုမနက် ရှစ်နာရီလောက်မှာဒရုန်းနဲ့ ဗုံးလာကြဲတာ။ စနဲမြို့ကိုကြဲတာ။ အားလုံးခုနစ်လုံးရှိပြီ။ ဈေးအပြင်တန်းတစ်လုံးကျပြီးတော့ တစ်ယောက်သေတယ်။ ခုနှစ်ယောက် ဒဏ်ရာရတယ်" ဟု နိရဥ္စရာသတင်းဌာနသို့ပြောသည်။
သေဆုံးသွားသူမှာ စနဲမြို့၊ ရွှေဟင်္သာရပ်ကွက်မှ ရိုးမသန္တာခရီးသည်ယာဥ်ပိုင်ရှင်၏သမီး မျိုးသန္တာဝင်း အသက် (၂၉)နှစ်ဝန်းဖြစ်ကြောင်းသိရသည်။
တခြားဒဏ်ရာအပြင်းအထန်ရရှိသူများမှာ ဦးမျိုးသက်ပိုင်(၃၀)ကျော်၊ ဒေါ်ခင်လေးမူ(၅၀)နှစ်ကျော်နှင့် တခြား မြို့ခံပြည်သူ ၅ ဦးတို့ဖြစ်ကြောင်းသိရသည်။
" ဘာတိုက်ပွဲမှမရှိဘဲ အခုလိုလာပစ်သွားတာ။ အခုဒဏ်ရာရတဲ့သူတွေကို ဆေးကုဖို့ အရေးပေါ် ပို့ထားပါတယ်" ဟု စနဲမြို့ခံလူမှုရေးလုပ်ကိုင်နေသူတစ်ဦးကပြောသည်။
စစ်ကောင်စီသည် ထောက်လှမ်းရေး ဒရုန်းတစ်စီး အရင်လွှတ်ပြီးနောက် တိုက်ခိုက်ရေးဒရုန်းလွှတ်ကာ ဗုံးများကြဲချတိုက်ခိုက်ခဲ့ခြင်းဖြစ်ကြောင်းမြို့ခံများကပြောသည်။
နောက်ဆုံးရရှိသော သတင်းအရ စနဲဆက်သွယ်ရေး စာတိုက်လည်း မီးလောင်သွားကြောင်း သိရသည်။
(ဓာတ်ပုံ- စစ်ကောင်စီမှ ဗုံးကြဲ၍ ပျက်စီးသွားသော ရခိုင်မှ အိမ်တချို့/ယခုသတင်းနှင့် သက်ဆိုင်မှု မရှိပါ။)