- Web Master
- ၂၀ ဇူလိုင် ၂၀၂၄
မင်းသျှင်စော၊ နိရဉ္စရာ
၊အောက်တိုဘာ ၂၄/
၂၀၂၄
အမ်းအခြေစိုက် အနောက်ပိုင်းတိုင်း စစ်ဌာနချုပ် (နပခ)၏ လက်ရုံးတပ်များဖြစ်ကြသော ၃၇၃ တပ်ရင်း၊ ဆေးတပ်နှင့်စရဖတပ်ကို အာရက္ခတပ်တော် (AA) မှ အပြီးအပိုင် သိမ်းလိုက်သည်ဟု သတင်းရရှိသည်။
၎င်းတပ်များကို ယမန်နေ့ ညကတည်းကပင် သိမ်းပိုက်နိုင်ခဲ့သည်ဟု အမ်းမြို့ဒေသခံ စစ်ရေး လေ့လာ စောင့်ကြည့်သူတစ်ဦးက နိရဉ္စရာကို အတည်ပြု ပြောကြားသည်။
" တပ်ရင်း တစ်ရင်းနဲ့ ဆေးတပ်၊ စရဖတပ် ၃ ခုလုံးကိုရသွားတာဟုတ်ပါတယ်။ လက်နက် ခဲယမ်းနဲ့ စစ်သုံးပန်းအချို့လည်း ရထားတယ်။ ၃၇၃ တပ်ရင်းမှူးနဲ့ G1 အဆင့်ရှိသူတွေက ဒဏ်ရာတွေနဲ့ ထွက်ပြေး လွတ်မြောက်သွားတယ်လို့သိရပါတယ်။"
လက်နက်ခဲယမ်းနှင့် စစ်သုံးပန်းအချို့ရရှိထားပြီး တပ်ရင်းမှူးနှင့် G1 တို့ ဒဏ်ရာကိုယ်စီဖြင့် ထွက်ပြေးလွတ်မြောက်သွားပြီး အထက (၂) ယာယီ စစ်ဆေးရုံတွင် ဆေးကုသနေရသည်ဟုလည်း သတင်းများထွက်ပေါ်နေသည်။
စစ်ကောင်စီသည် နပခဌာနချုပ်ကို AA ၏ ထိုးစစ်ရောက်လာမည်ကိုစိုးရိမ်ပြီး ဂျက်ဖိုက်တာ များဖြင့် တိုက်ခိုက်ခြင်း၊ နက်ကြီးတို့ဖြင့် အကြိမ်ပေါင်းများစွာ ခုခံစစ်ကူပေးသော်လည်း အာရက္ခတပ်တော် ( AA) ၏ ထိုးစစ်ကို မခံနိုင်ဘဲ အောက်တိုဘာ ၂၃ ရက်နေ့ ညအချိန်တွင် ခမရ ၃၇၃ ၊ စရဖတပ်နှင့် ဆေးတပ်တို့ကိုအပြီးအပိုင် နောက်ဆုတ်ပေးခဲ့ရသည်ဟု သိရသည်။
အမ်းမြို့တွင် အနောက်ပိုင်းတိုင်း စစ်ဌာနချုပ်နှင့် အတူ ခမရ (၃၇၁)၊ (၃၇၂) နှင့် အမတ (၃၇၄) တို့တည်ရှိပြီး AAက ကျန်စခန်းများကို ဆက်လက်ထိုးစစ်ဆင်တိုက်ခိုက်နေပြီး တိုက်ပွဲ ပြင်းထန်နေသည်ဟု သိရသည်။