-

"မြန်မာ့ဇာတ်ခုံပေါ်တက်ပြီး ဘီလူးဆိုင်းတီးလာသည့်ပေါက်ဖော်ကြီး"

(ဂျေတီ- ရေးသည်)နိရဉ္စရာ (ဆောင်းပါး)၊ အောက်တိုဘာ ၂၉/၂၀၂၄

ပေါက်ဖော်ကြီးတရုတ်သည် မြန်မာ့အရေးနှင့်ပတ်သက်ပြီး ကန့်လန့်ကန်နောက်ကွယ်ကနေ အချိန်ပြည့်ကစား နေသည်ကို အားလုံးကသိရှိထားကြပြီးဖြစ်သည်။

ယနေ့မျက်မှောက်ကာလဖြစ်သည့် စစ်ကောင်စီအကြပ်ရိုက်နေချိန် လိပ်ခဲတည်းလည်း မြန်မာ့အရေး အခြေအနေ ၊ ညီနောင်အဖွဲ့၏အုပ်ချုပ်မှုလက်အောက်သို့ကျရောက်နေ သည့် ရှမ်းမြောက်အရေး၊ စစ်ကောင်စီလက်ကိုင်တုတ်များ၏ တရုတ်မုန်းတီးရေးလှုပ်ရှားမှု၊ မန္တလေးရှိ ကောင်စစ်ဝန်ချုပ်ရုံး ပေါက်ကွဲမှုအရေး တို့သည် ကန့်လန့်ကာနောက်ကွယ်မှာရှိနေသည့် ပေါက်ဖော်ကြီးအတွက် ဟန်ဆောင်ပြီး မနေသာတော့။ကန့်လန့်ကာနောက်ကွယ်တွင် ပုန်းလျှိုးကွယ်လျှိုး မနေသာတော့။ ကန့်လန့်ကာရှေ့ကို ကမူးရှူးထိုး ထွက်ချလာသည်။ မြန်မာ့အရေး ဇာတ်ခုံပေါ်တက်ကာ ဘီလူးဆိုင်းဖြင့် ပွဲကြမ်းပြလာသည်ကိုတွေ့ရသည်။

တောင်းဆိုသံလား၊သတိပေးသံလား၊ ရာဇသံလား..

မကြာသေးမီရက်ပိုင်းကဖြစ်သည်။ မန္တလေးရှိ တရုတ်ကောင်စစ်ဝန်ချုပ်ရုံး တိုက်ခိုက်ခံခဲ့ရသည်။ တိုက်ခိုက်ခံရမှုအပြီး တရုတ်နိုင်ငံခြားရေးဝန်ကြီးဌာနေပြာခွင့်ရပုဂ္ဂိုလ်က သတင်းရှင်းပွဲတွင် ယခုလိုထုတ်ပြောခဲ့သည်။

" တိုက်ခိုက်မှုကိစ္စရပ်ကို သေချာစုံစမ်းစစ်ဆေး၍ လုပ်ဆောင်သူကို အစွမ်းကုန်ကြိုးပမ်းဖမ်းဆီးကာ ပြင်းထန်စွာပြစ်ဒဏ်ပေးရန် အလားတူကိစ္စများထပ်မံမဖြစ်ပွားစေရန် မြန်မာဘက်ကိုသတိပေးခဲ့ကြောင်း" ၄င်းက နိုင်ငံတကာသတင်း မီဒီယာများကို ကမ္ဘာသိ ထုတ်ပြောခဲ့သည်။

သြဂုတ်လအတွင်းကဖြစ်သည်။ မင်းအောင်လှိုင်၏ မီးစိမ်းပြမှုကြောင့် တပ်ထောက်ခံသူများက လမ်းပေါ်ထွက်ကာ တရုတ်ဆန့်ကျင်ရေး လှုပ်ရှားမှု ပြောင်ပြောင်ထင်းထင်း ပြုလုပ်ခဲ့သည်။ မကြာမီ ၀မ်ယိအသံယခုလိုထွက်ရှိလာသည်။

"တရုတ်-မြန်မာ ဆက်ဆံရေးအား သွေးကွဲအောင် လုပ်ဆောင်နေမှု နှင့် တရုတ်နိုင်ငံအား အိုးမဲသုတ်အပုပ်ချနေသည့် ပြောဆိုလုပ်ဆောင်မှု မှန်သမျှကို ဆန့်ကျင် ကြောင်း " ၀မ်ယိ က သတိပေးခဲ့သည်။

၁၀၂၇ စစ်ဆင်ရေး (၁)နှစ်မပြည့်မီအတွင်း ပေါက်ဖော်ကြီး ကျောထောက်နောက်ခံပြုပေးထားသည့် ညီနောင်အဖွဲ့ များက ရှမ်းမြောက်ဒေသရှိ မြို့တော်နှင့် မြို့များ၊တိုင်းစစ်ဌာချုပ်တွေကို သိမ်းပိုက်ခဲ့သည်။ လက်ဇောင်း ထက်နေသည့် ညီနောင်အဖွဲ့ ကိုလည်း လိမ်မာ ရိုကျိုးအောင်ဆုံးမသွန်သင်ရလိမ့်မည်ဟု ပေါက်ဖော်ကြီးက သတိပေး ခြိမ်းခြောက်ခဲ့သေးသည်။

ပေါက်ဖော်ကြီး၏လေသံက တိုက်တွန်း တောင်းဆိုသည်။ သတိပေးပြောဆိုသည် ထက်ပိုပြင်းထန်လာသည်။ ဒီပလိုမေစီဘောင်ကို ကျော်လွန်လာသည်။

ရာဇသံ ပုံ ပေါက်လာသည်။ လူ သန်း(၅၀) ကျော်နေထိုင်သည့်နိုင်ငံတစ်ခုအပေါ် မထီလေးစား ပြုမူလာသည်ကို တွေ့ရသည်။ မန္တလေးရှိ တရုတ်ကောင်စစ်ဝန်ချုပ်ရုံး တိုက်ခိုက်ခံခဲ့ရမှုသည် ထိုင်၀မ်ကို စစ်သွားကစားနေသည့် ပေါက်ဖော်ကြီးလည်း မန္တလေးဖြစ်စဥ်အပေါ် ရှော့ရသွားပုံရသည်။ ဥသျှောင်ပိုင်းအထိ ကို ဂရက်ရိုက်ခတ်သွားသည်။ အလားတူ ကိစ္စများ ထပ်မံ မဖြစ်ပွားစေရန် မြန်မာဘက်ကို သတိပေး စကားချက်ခြင်းတုန့်ပြန်ခဲ့သည်။အကျိုးစီးပွားသာပဓာန ထားသည့် ပေါက်ဖော်ကြီးသည် စစ်ကောင်စီ နှင့် ပေါ်ပေါ်ထင်ထင် ပေါင်းဖက်ပြလာခဲ့သည်ကိုတွေ့ရသည်။

ဆက်ဆံရေး အနိမ့်အမြင့် လှိုင်းလုံးများ..

မြန်မာနိုင်ငံသည် ၁၉၄၉ ခု၌ ကွန်မြူနစ် တရုတ်ပြည်သူ့သမ္မတနိုင်ငံကို စတင်တည်ထောင်ချိန်တွင် ကွန်မြူနစ်နိုင်ငံမဟုတ်သည့် နိုင်ငံအနေဖြင့် ပထမဆုံး အသိအမှတ်ပြုခဲ့သည့် နိုင်ငံဖြစ်သည်။ ၁၉၅၀ ခု၊ ဇွန်လ (၈)ရက်တွင် မြန်မာနှင့်တရုတ်တို့ သံခင်းတမန်ခင်းထူထောင်သည်။ ၁၉၅၄ ခု၊ ဇွန်လ ၂၉ ရက်တွင် မိတ်ဆွေဖြစ်မှုနှင့် အပြန်အလှန် ကျူးကျော်တိုက်ခိုက်မှုမပြုရေး နိုင်ငံချင်းသဘောတူစာချုပ်နှင့် ပူးတွဲကြေညာချက်တစောင် ထုတ်သည်။ ယင်းတွင် ငြိမ်းချမ်းစွာယှဉ်တွဲနေထိုင်ရေးမူ ၅ ရပ်အပေါ်တွင် အခြေခံသည်။ "ဆွေမျိုးပေါက်ဖော်ဆက်ဆံရေး" ဟူသော စကားလုံး၏အစပင်ဖြစ်သည်။

ထို့ကြောင့်လည်း မြန်မာပြည်သူများအကြား တရုတ်ကို ပေါက်ဖော်ကြီးဟုလည်း သိထားကြသည်။ သို့ရာတွင် ၁၉၆၇ ခုနှစ် တွင် တရုတ်-ဗမာအရေးအခင်းဖြစ်ပြီးသည့်နောက် နှစ်နိုင်ငံဆက်ဆံရေး နှာစေးသွားခဲ့သည်။ ၁၉၇၀ နောက်ပိုင်းမှ နယ်နိမိတ်သတ်မှတ်ရေးအစ်ရှူးတွင် မြန်မာက ယူနန်ပြည်နယ် ဘက်သို့ မြန်မာပိုင်မြေအချို့လက်ဆောင်ပေးလိုက်ခြင်းဖြင့် နှာစေးနေသည့် နှစ်နိုင်ငံဆက်ဆံရေး ပြန်လည်ဦးမော့လာစေခဲ့သည်။ ၁၉၈၈ ခုနှစ်စစ်တပ်က အာဏာသိမ်းပြီး နှောင်းပိုင်း ကာလတွင် နှစ်နိုင်ငံအကြား ရွှေလမ်း ငွေလမ်း များပင်ဖောက်ခဲ့ကြသည်။ မြန်မာစစ်ခေါင်းဆောင်များသည် ပေါက်ဖော်ကြီး တရုတ်ကို ကျောက်ဖြူ၊ မြစ်ဆုံနှင့် သဘာ၀ဓါတ်ငွေ့၊ တွင်းထွက်၊သယံဇာတစသည့် အကျိုးစီးပွားအများအပြားကိုတရုတ်ဆီထိုးအပ်ခဲ့ပြီး ၄င်းတို့၏အာဏာကိုအသက်ဆက်ခဲ့ရသည်။

ကန့်လန့်ကာနောက်ကွယ်က ပေါက် ဖော်ကြီး

ပထဝီနိုင်ငံရေးအရ (Proxy War) ကြားခံစစ် အတွက် နယ်စပ်တစ်လျှောက်၊ အထူးသဖြင့် ရှမ်း​မြောက်တခွင်တွင် တိုင်းရင်းသားလက်နက်ကိုင်အဖွဲ့များကို ပေါက်ဖော်ကြီး က ကျောထောက် နောက်ခံပြုပေးခဲ့သည်။ ၂၀၂၃ခုနှစ်၊ အောက်တို့ဘာ(၂၇)တွင်၁၀၂၇ စစ်ဆင်ရေး စတင်သည်။ ထိုစစ်ဆင်ရေး၏နောက်ကွယ်တွင် ပေါက်ဖော်ကြီးရှိနေခဲ့သလား။ အတက်၊အကျ၊မြင့်ချီ၊နိမ့်ချီ ၊ မတည်ငြိမ်သည့် မြန်မာ့နိုင်ငံရေးဇတ်ခုံ၏ ကန့်လန့်ကာ နောက်ကွယ်တွင်ပေါက်ဖော်ကြီး ရှိနေခဲ့သလား။ ဆိုသည့်မေးခွန်းများသည် မြန်မာပြည်သူ၊ပြည်သား သန်းပေါင်း(၅၀)ကျော်တို့ အကြားတွင် ထွက်ပေါ်လာခဲ့သည်။ ဝါရှင်တန်အခြေစိုက် အကြံပေးအဖွဲ့တစ်ခုဖြစ်သည့်Stimson Center မှ အရှေ့အာရှအစီအစဉ်၏ တွဲဖက်ဒါရိုက်တာဖြစ်သူYun Sun က ယခုလိုမှတ်ချက်ပြုခဲ့သည်။

"တိုင်းရင်းသား လက်နက်ကိုင် အဖွဲ့များအား နှစ်နိုင်ငံ နယ်စပ်တစ်လျှောက်ရှိ နယ်မြေများကို သိမ်းပိုက်ရန် တရုတ်က တိတ်တဆိတ် ခွင့်ပြုပေးခဲ့သည်ဟုမှတ်ချက်ပြုခဲ့သည်။ ဆိုရသော် ကျားဖြန့် အရေးခေါင်းစဉ်တပ်ပြီး ညီနောင်အဖွဲ့ကို ရှမ်းမြောက်နယ်မြေတွင်တိုက်ပွဲဖော်ဆောင်ရန် ပေါက်ဖော်ကြီးက မီးစိမ်း ပြခဲ့ခြင်းလည်းဖြစ်သည်။

မင်းအောင်လှိုင် နှင့် ပေါက်ဖော်ကြီး တို့ ဆက်ဆံရေး ချိန်ခွင်လျှာ

၂၀၂၂ ခုနှစ်၊ ဇူလိုင်(၄) ရက်တွင်(၇) ကြိမ်မြောက် မဲခေါင်- လန်ချန်း ပူးပေါင်းဆောင်ရွက်မှု နိုင်ငံခြားရေး ဝန်ကြီးများ အစည်းအဝေးကို ပုဂံတွင် ကျင်းပခဲ့သည်။ ထိုအစည်းအဝေးကို ဝမ်ယိတက်ခဲ့သည်။ နေပြည်တော်ဆီအခစား၀င်လာလေမည်လားဟု မင်းအောင်လှိုင်က စောင့်မျှော်နေခဲ့သည်။ သို့ရာတွင် ၀မ်ယိက အစည်းအဝေးတက်ပြီးသည်နှင့် ပုဂံကနေ စိနပြည်သို့တန်းပြန်သွားခဲ့သည်။ ထိုအချင်းအရာကြောင့် မင်းအောင်လှိုင် က ၀မ်ယိအပေါ် အမျက်တော်ရှခဲ့ဖူးသည်။

တရုတ် ထိပ်တန်းပိုင်းအချို့နေပြည်တော်လာကြသည်။ သမ္မတဟောင်းဦးသိန်းစိန်၊ စစ်ကောင်စီဒုခေါင်းဆောင်စိုး၀င်းတို့ တရုတ်ပြည် ခြေချခဲ့သည်။ သို့ရာတွင် မင်း​အောင်လှိုင်အဖို့ ၃နှစ်ကျော်ကာလအတွင်း စိနမြေ​ပေါ်သို့ခြေချခွင့်မရသေးပေ။ ထို့ကြောင့်လည်း အငုံ့စိတ်ဓါတ်ခံရှိသည့် မင်းအောင်လှိုင်၏ အတွင်းစိတ်တွင် ပေါက်ဖော်ကြီးကို မုန်းတီးနေခဲ့သည်။ ညီနောင်သုံးဖော် က ၂၀၂၃ခုနှစ်၊ အောက်တိုဘာ ၂၇ ရက်တွင် ၁၀၂၇ စစ်ဆင်ရေး စခဲ့သည်။ စစ်ရေး အဟုန်မြင့်လာမှုနှင့်အတူ စစ်တပ်သည် ဖရိုဖရဲ၊ကစဥ့်ကလျားဖြစ်ခဲ့ရသည်။ ရှမ်းမြောက်မြို့တော် လားရှိုးနှင့် တိုင်းစစ်ဌာချုပ် ရမခ တို့ကိုလက်လွှတ်လိုက်ရသည်အထိအရှက်တကွဲရှုံးနိမ့်ခဲ့ရသည်။ စစ်ခေါင်းဆောင် မင်းအောင်လှိုင် က နိုင်ငံကြီးတစ်ခုက ကူညီပေးခဲ့သည့် အတွက်ထိုသို့ ကျရှုံးခဲ့ခြင်း ဖြစ်ကြောင်း ပေါက်ဖော်ကြီးကို သွယ်၀ိုက်ညွှန်းဆိုစွပ်စွဲပြစ်တင်ခဲ့သည်။

မင်းအောင်းလှိုင်အနေဖြင့် တရုတ်ခေါင်းဆောင်များ၏အဖက်လုပ်ခြင်းကို လည်းမခံရ။ စစ်ပွဲများတွင်လည်း ရှုံးပွဲများစွာ ကြုံနေရသည့် မင်းအောင်လှိုင်က ရှုံးမဲမဲကာ စစ်လော်ဘီများကို တရုတ်ဆန့်ကျင်ရေးအော်ခိုင်းရန် မီးစိမ်းပြခဲ့သည်။ ထို့အပြင် ကြံ့ခိုင်ရေးခေါင်းဆောင် မှတဆင့် ရုရှားကို စစ်ကူတောင်းခိုင်းသည်။ မြန်မာပြည်တောင်ပိုင်းရှိ မဟာဗျူဟာ အလွန်ကျသည့် ပင်လယ်ရေလမ်းကြောင်းပေါ်ရှိ ထား၀ယ်အထူးစီးပွားရေးဇုန်ကိုရုရှားဆီထိုးအပ်သည်။

မင်းအောင်လှိုင်က သူ့ကို လူရာမသွင်းခဲ့သည့် တရုတ် ကိုတန်ပြန်တိုက်ကွက်ဖော်လိုက်သည့်အတွက် ပေါက်ဖော်ကြီး ပျာယာခတ်သွားသည်။ မြန်မာကို ၄င်း၏ သြဇာအောင်တွင်သာထားရှိရန် အစီစဥ်တကျ ကြံစည်ထားသည့်တရုတ်ကြီးကလည်း ရုရှား ၀င်လာမည်ကိုအလိုမကျ။ မြန်မာမှတဆင့် အိန္ဒိယ အိုးရှင်းဘက်ဆီ ခြေဦးပြင်နေသည့်ပေါက်ဖော်ကြီးကလည်း အကျိုးစီးပွားထိခိုက်လာမည့် အရေးအတွက် မင်းအောင်လှိုင်ကို၀မ်ယိက ပြန်ချော့ရတော့သည်။

ပေါက်ဖော်ကြီး ၏ ပလေးကွက်များ

ထို့အတူ ညီနောင်အဖွဲ့ က ဖက်ဒရယ် ဒီမိုကရေစီအင်အားစု များ၊ လူ့အခွင့်အရေးနှင့် ဒီမိုကရေစီကို ခေါင်းရွက်ထားသည့်အမေရိကန်နှင့်အနောက်နိုင်ငံများ နှင့် ရင်ချင်းထိစပ်သွားမည်ကို စိုးရိမ်သည်။ လားရှိုးတွင် လေဆိပ်ရှိသည့်အတွက်လည်း ဝေဟင်လမ်းကြောင်း လုံခြုံရေးအတွက်လည်း စိုးထိတ်လာသည်။ ဒီမိုကရေစီနှင့်ဖက်ဒရယ်အသံကို တရုတ်နယ်စပ်အနားရောက်ရှိလာမှာကို ပေါက်ဖော်ကြီးက မနှစ်မြို့။ ထို့ကြောင့်လည်း မင်းအောင်လှိုင်က ညီနောင်အဖွဲ့သည် အမေရိကန်ထံမှ သန်း ၂၀၀ ရနေသည်။ NUG ,PDF များနှင့် လက်တွဲနေသည်ဆိုသည့်အကြောင်းကို အသံလွှင့်ခဲ့သည်။ “ဝ“ခေါင်းဆောင်များနှင့် တရုတ်အထူးကိုယ်စားလှယ် တိန့်ရှီကျွင်းတို့ ဆွေးနွေးခဲ့သည်ဆိုသည့် သတင်းတစ်ခုပေါက်ကြားလာခဲ့သည်။

တရုတ်သည် လားရှိုးမြို့အား MNDAA သိမ်းပိုက်ခြင်းအပေါ် အသိအမှတ်မပြုကြောင်း၊ MNDAA အနေဖြင့် အမေရိကန်နှင့် အနောက်အုပ်စုက ထောက်ပံ့ထားသော NUG၊ ပြည်သူ့ကာကွယ်ရေးတပ်မတော် (PDF) များနှင့် ပူးပေါင်းနေပြီး စစ်တပ် ပြုတ်ကျရေး ရှေ့တန်းတပ်ဦးဖြစ်နေကြောင်း တိန့်ရှီကျွင်းက ပြောဆိုခဲ့သည်။ MNDAA အနေဖြင့် NUG နှင့် စစ်ရေး၊ နိုင်ငံရေးအရပူးပေါင်း ခြင်း၊ စစ်မြေပြင်များချဲ့ထွင်ခြင်း၊ မန္တလေး နှင့် တောင်ကြီးကို ထိုးစစ်ဆင်တိုက်ခိုက်ခြင်းများအား လုံးဝပြုလုပ်မည်မဟုတ်ဟု ဆိုMNDAAကလည်းကြေညာချက်ထုတ်ခဲ့ရသည်။ MNDAA အနေဖြင့် NUG နှင့် စစ်ရေး၊ နိုင်ငံရေးအရပူးပေါင်း ခြင်း၊ စစ်မြေပြင်များချဲ့ထွင်ခြင်း၊ မန္တလေး နှင့် တောင်ကြီးကို ထိုးစစ်ဆင်တိုက်ခိုက်ခြင်းများအား လုံးဝပြုလုပ်မည်မဟုတ်ဟု MNDAAက စက်တင်ဘာလ(၄) ရက်စွဲဖြင့် ထုတ်ပြန်ချက် တစ်စောင် ကို ထုတ်ပြန်ခဲ့ရသည်။

အဆိုပါ ထုတ်ပြန်ချက်ထဲတွင် MNDAAက တရုတ်နိုင်ငံအနေဖြင့် လက်ရှိတစ်နေ့ထက်တစ်နေ့ပိုမိုဆိုးဝါးလာသော မြန်မာနိုင်ငံ၏အခြေအနေကို ကြားဝင်စေ့စပ်ဖြေရှင်းပေးပါရန် အထူးမေတ္တာရပ်ခံအပ်ပါကြောင်းနှင့် မိမိတို့အနေဖြင့်လည်း ချက်ချင်းအပစ်အခတ်ရပ်စဲပြီး တရုတ်နိုင်ငံနှင့်တက်တက်ကြွကြွ ပူးပေါင်းကာ ပဋိပက္ခများကို နိုင်ငံရေးတွေ့ဆုံးဆွေးနွေးသောလမ်းစဉ်ဖြင့် အဖြေရှာဖြေရှင်းသွားပါမည်ဖြစ်ကြောင်းပါရှိသည် ကိုတွေ့ရသည်။

၀င်း၀င်း ဂိမ်း (သို့မဟုတ်) ပုလင်းတူ ဗူးဆို့

ထို့ကြောင့် ယနေ့ ဖြစ်ပွားနေသည့် အချင်းအရာများကိုသတ္တုချကြည့်ရမည်ဆိုလျင် စစ်ကောင်စီ နှင့်ပေါက်ဖော်ကြီးတို့သည် အလုံးစုံပျက်သုံးမည့် ဇီးရိုးဂိမ်းကို မကစား။ နှစ်ဦးနှစ်ဖက်အကျိုးရှိသည့် ၀င်း၀င်း ဂိမ်းဆီ နှစ်ဦးသား လက်ဝါးရိုက်ကာ အကွက်ရွှေ့လိုက်ကြခြင်းဖြစ်သည်။ "ပုလင်းတူ လို့ ဗူးဆို့" ကြခြင်းသာဖြစ်သည်။ စစ်ကောင်စီကိုအပြုတ်တိုက်နေသည့်တိုင်းရင်းသားလက်နက်ကိုင်များနှင့် PDF များကလည်းတစ်နေ့တစ်ခြား လက်သံပြောင်လာသည်။ စစ်ကောင်စီကလည်း အကျအရှုံးများစွာဖြင့် တစ်နေ့တစ်ခြား ပရုပ်လုံးလို လုံးပါးပါးလာ နေသည်။ ရှုံးချက်များစွာဖြင့် အထိနာနေသည့်စစ်ကောင်စီ သည်ပေါက်ဖော်ကြီးကမ်းပေးသည့် တုတ်ကောက်ကို အားပြုပြီး လမ်းဆက်လျောက်ဖို့ပြင်လာသည်။ ရွေးကောက်ပွဲကနေတဆင့်ထွက်ပေါက်ရှာဖို့ ပြင်လာသည်။ထိုမှတဆင့်တရား၀င်အစိုးရအဖြစ်နိုင်ငံတကာကအသိအမှတ်ပြုခံရလိမ့်မည်ဟုစစ်ကောင်စီက စိတ်ကူးယဉ်အိပ်မက်၊ မက်နေသည်။

"လက်ဝါးဘယ်လိုရိုက်ကြမည်လဲ"

လာမည့်နို၀င်ဘာလအတွင်း စစ်ကောင်စီခေါင်းဆောင်တရုတ်သွားမည်ဆိုသည့်သတင်းပေါ်လာသည်။ လာမည့်နို၀င်ဘာလအတွင်း စစ်ကောင်စီခေါင်းဆောင်သည် ပေါက်ဖော်ကြီးတို့၏ စိနမြေသို့ အလည်သွားမည်ဖြစ်သည်။ အာဏာသိမ်းပြီး (၄)နှစ်နီးပါးသို့ချဉ်းနင်း၀င်ရောက်လာစဉ် အတွင်း စစ်ခေါင်းဆောင်မင်းအောင်လှိုင် ပထမဆုံးအနေဖြင့်တရုတ်သွားမည်ဆိုသည့် သတင်းထွက်ပေါ်လာခဲ့သည်။ ထိုခရီးစဥ်တွင် စစ်ကောင်စီနှင့် ပေါက်ဖော်ကြီးတို့ မည်သည့်ကိစ္စများအပေါ် "လက်ဝါးဘယ်လိုရိုက်ကြမည်လဲ"ဆိုသည့်အပေါ်စောင့်ကြည့်ရပေမည်။ တရုတ်နိုင်ငံသည် NUG အစိုးရနှင့် တော်လှန်ရေးအဖွဲ့များကို ထောက်ခံခြင်းမှ ရှောင်ကြဉ်ခဲ့သော်လည်း မြန်မာစစ်တပ်ကိုမူ ထောက်ခံ မှုပြုနေလျက်ရှိသည်ဟုYun Sun က ဆိုသည်။ ၄င်း၏ နောက်ဆုံး မှတ်ချက်ပြု စကားကတော့ထိမိလှသည်။

" မြန်မာစစ်တပ်နဲ့ မြန်မာနိုင်ငံကို တရုတ်က ဘယ်တော့မှ လက်လွှတ်ခံမှာ မဟုတ်ဘူး။"