ကျောက်တော်မြို့ပေါ်တွင် အရပ်သားတစ်ဦးကို စစ်တပ်ကပစ်သတ်

ရေးသူ: Web Master (NN 23)
| ရက်စွဲ: ၁၇ ဒီဇင်ဘာ ၂၀၂၃
| ကြည့်ရှုသူ: 1.3k

ရခိုင်ပြည်နယ်၊ ကျောက်တော်မြို့ပေါ်တွင် ယမန်နေ့ဒီဇင်ဘာလ ၁၆ ရက် ညက ဆိုင်ကယ်ဖြင့် သွားလာနေသည့် အရပ်သားတစ်ဦးကို စစ်ကောင်စီတပ်က သေနတ်ဖြင့်ပစ်ခတ်၍ သေဆုံးသွားကြောင်း သတင်းရရှိသည်။

သေဆုံးသွားသူမှာ ပြည်တော်သာရပ်ကွက်မှ အသက် (၄၉)နှစ်အရွယ် ဦးစိန်သာဖြစ်ပြီး ကြုံရကျပန်းအလုပ်များဖြင့် အသက်မွေးသူ အရပ်သားပြည်သူတစ်ဦးဖြစ်ကြောင်း သိရသည်။

ယမန်နေ့ ည ၈ နာရီဝန်းကျင်က ပိုက်သည်ရပ်ကွက်မှ ၄င်းနေအိမ်ရှိသည့် ပြည်တော်သာ ရပ်ကွက်သို့ ဆိုင်ကယ်ဖြင့်ပြန်လာစဥ် ကျောက်တော်မြို့အဝင် ကားဂိတ်လမ်းဆုံတွင် စစ်ကောင်စီတပ်ကပစ်ခတ်သည့် သေနတ်ကျည်ထိမှန် သေဆုံးခဲ့ခြင်းဖြစ်ကြောင်းသိရသည်။

"သူက ပိုက်သည်ရပ်ကနေ ဆိုင်ကယ်နဲ့ပြန်လာတာ။ သူ့အသိသူငယ်ချင်းတယောက်ဆီ သွားပြီးပြန်လာတာမှာ စစ်တပ်က သေနတ်နဲ့ ပစ်တာပါ" ဟု ပြောသည်။

ဦးစိန်သာကို ကစ္ဆပနဒီတံတားအနီးကင်းပုန်းဝပ်ထားသည့် စစ်ကောင်စီတပ်က လိုက်လံပစ်ခတ်ခြင်းဖြစ်ပြီး သေနတ်ကျည်မှာ နောက်ကျောဘက် ခါးဆစ်ကိုထိမှန်သွား၍ သေဆုံးသွားခြင်းဖြစ်ကြောင်း သိရသည်။

"သေနတ်ကျည်က ခါးဆစ်ကိုဝင်သွားတယ်။ အခုအလောင်း အိမ်ကို ပြန်ရောက်နေပါပြီ။ ဒီနေ့သဂြိုလ်ရမှာပါ" ဟု ပြောသည်။

သေဆုံးသူ ဦးစိန်သာတွင် ဇနီးနှင့်အတူ သားသမီး ၅ ဦး ကျန်ရစ်ခဲ့ကြောင်း သိရသည်။

ကျောက်တော်မြို့ပေါ်တွင် ညမထွက်ရအမိန့်ထုတ် ထားသော်လည်း ဦးစိန်သာ ပစ်ခတ်ခံရသည့်အချိန်မှာ ည ၉ နာရီပင်မထိုးသေးကြောင်း၊ စစ်ကောင်စီတပ်အနေဖြင့် အပြစ်မဲ့အရပ်သားပြည်သူများကို ရည်ရွယ်ချက်ရှိရှိ ပစ်ခတ်သတ်ဖြတ်နေသလို ဖြစ်နေကြောင်းမြို့ခံများက ပြောသည်။ (NN-23)

ဓာတ်ပုံ - ပေးပို့