မြန်မာနိုင်ငံရှိ တိုင်းနှင့်ပြည်နယ် (၁၁) ခုတွင် စစ်ကောင်စီနှင့် တိုင်းရင်းသားလက်နက်ကိုင် တော်လှန်ရေးအင်အားစုများအကြား တိုက်ပွဲများဖြစ်ပွားနေပြီး နှစ်ပတ်အတွင်း ဖြစ်ပွားခဲ့သော တိုက်ပွဲများအနက် ရခိုင်၌အများဆုံးဖြစ်ကြောင်း BNI - Myanmar Peace Monitor မှ မေလ ၁၄ ရက်တွင် ထုတ်ပြန်ထားသည်။
ဧပြီ ၂၄ ရက်မှ မေ ၇ ရက်အတွင်း တိုက်ပွဲဖြစ်ပွားမှုမှာ ရခိုင်တွင် (၁၇) ကြိမ်ဖြင့် အများဆုံးဖြစ်ပွားခဲ့ပြီးကချင်တွင် (၁၅)ကြိမ်၊ စစ်ကိုင်းတွင် (၁၂ )ကြိမ်၊ တနင်္သာရီတွင်( ၉ )ကြိမ်၊ ပဲခူးတွင် (၃ )ကြိမ်၊ ချင်းတွင်(၃)ကြိမ်နှင့် ကရင်တွင်( ၃ )ကြိမ်၊ ရှမ်းတွင် (၃ )ကြိမ်၊ မွန်တွင်( ၂ )ကြိမ်အပြင် ကရင်နီ (၁ )ကြိမ်၊မန္တလေးတိုင်းတွင်(၁) ကြိမ် ဖြစ်ပွားခဲ့ကြောင်းသိရသည်။
![](/images/news/20240514-1715680676416-1715680676416-441462865_787540286810247_2287389866964066657_n.jpg)
ထို့အပြင် ရက္ခိုင့်တပ်တော် (ULA/AA) လှုပ်ရှားရာ ရခိုင်ဒေသသည် တိုက်ပွဲဖြစ်ပွားမှု (၁၄၉)ကြိမ်ဖြင့် စစ်ရေးပဋိပက္ခအပြင်းထန်ဆုံး ဒေသအဖြစ် ရပ်တည်နေကြောင်းလည်း BNI-Myanmar Peace Monitor ၏ ဧပြီ၃၀ရက်နေ့ထုတ်ပြန်သော မှတ်တမ်းများအရ သိရသည်။
ရခိုင်ပြည်နယ်တွင် လက်နက်ချအညံ့ခံသူစစ်ကောင်စီတပ်သား ၁၁၀၁ ဦးရှိကြောင်းလည်း ယင်းမှတ်တမ်းကဆိုသည်။
ဇန်နဝါရီ ၁၁ ရက်၊ ရခိုင်ပြည်နယ်တိုက်ပွဲအတွင်း အမှတ် (၁၉)စစ်ဆင်ရေးဌာနချုပ်မှူး၊ ဗိုလ်မှူးချုပ်ဇင်မျိုးဆွေသည် တိုက်ပွဲမှထွက်ပြေးစဉ် ULA/AA ၏ ဖမ်းဆီးခြင်းကို ခံခဲ့ရသည်။
“၁၀၂၇ စစ်ဆင်ရေး” အား အဓိကပါဝင်လှုပ်ရှားနေကြသည့် ညီနောင်မဟာမိတ် (၃)ဖွဲ့သည် ရှမ်းမြောက်ဒေသနှင့် ရခိုင်ဒေသအတွင်းရှိ မြို့ပေါင်း (၂၈) မြို့ကို ထိန်းချုပ်နိုင်ခဲ့ခြင်းဖြစ်ပြီး ရက္ခိုင့်တပ်တော်(ULA/AA) က (၁၁) မြို့၊ တအာင်းအမျိုးသားလွတ်မြောက်ရေးတပ်မတော် (PSLF/TNLA) က (၈) မြို့၊ ကိုးကန့်တပ်ဖွဲ့ (MNTJP/MNDAA) က (၇) မြို့အသီးသီး ထိန်းချုပ်သိမ်းပိုက်ထားကြသည်” ဟု
ထုတ်ပြန်ချက်တွင်ဖော်ပြထားသည်။