ယခုနှစ်ကျရောက်သည့် (၁ဝ)ကြိမ်မြောက် သက္ကမအမျိုးသားနေ့ကို ကိုဗစ်-၁၉ကြောင့် အကျဉ်းချုံးကျင်းပ

ဇွဲဓန (ကိန်းသာမြေ)
နိရဥ္စရာ၊ ဇန်နဝါရီ ၇ / ၂ဝ၂၁

ရခိုင်မျိုးနွယ်စုဝင်များဖြစ်ကြသော သက္ကမလူမျိုးတို့၏ (၁ဝ) ကြိမ်မြောက် သက္ကမအမျိုးသားနေ့ကို ဇန်နဝါရီလ ၇ ရက်နေ့က မင်းပြားမြို့နယ်၊ ရွှေတောင်ကျေးရွာ၌ ကိုဗစ်-၁၉ ကပ်ရောဂါကြောင့် အကျဉ်းချုံး ပြုလုပ် ကျင်းပ ခဲ့ကြောင်း သက္ကမ စာပေနှင့်ယဉ်ကျေးမှုအသင်းမှ သတင်းရရှိသည်။

နှစ်စဉ်နှစ်တိုင်းပြုလုပ်လာသော သက္ကမအမျိုးသားနေ့ကို အစဉ်အလာမပျက်စေလိုသောကြောင့် ခေါင်းဆောင်ပိုင်းများဖြင့် ပွဲကိုအကျဉ်းချုံးကျင်းပခဲ့ရကြောင်း၊ သက္ကမ အမျိုးသားနေ့ကို ကျင်းပရခြင်းမှာ ရည်ရွယ်ချက်မှာ တိမ်မြုပ်နေသော စာပေ၊ ယဉ်ကျေးမှု၊ ဘာသာစကားများ ပြန်လည်ဖော်ထုတ်ရန် ဖြစ်ကြောင်း ပွဲဖြစ်မြောက်ရန်ဆောင်ရွက်ပေးသူ အရှင်ဇောတိပါလ ကမိန့်ကြားသည်။

“ သက္ကမအမျိုးသားနေ့ကို ပြုလုပ်ရခြင်းရည်ရွယ်ချက်က မိမိရဲ့စာပေ ယဉ်ကျေးမှု ဘာသာစကား တိမ်မြုပ် နေတာတွေရှိတယ်။ နောက်ထပ် ဒိုင်းနက်နာမည်အစား မိမိတို့လိုချင်တဲ့ သက္ကမ နာမည်ကို ကိုယ့်ရဲ့ ညီအစ်ကိုမောင်နှမတွေ တိုင်းရင်းသားတွေ သိစေချင်တဲ့ ရည်ရွယ်ချက်လည်းပါတာပေါ့။ နိုင်ငံတကာမှာရှိတဲ့ ဦးဇင်းတို့လူမျိုးတွေ အမျိုးသားနေ့ဟာ ဒီလိုရှိတယ်ဆိုတာသိစေဖို့ပေါအမျိုးသားနေ့ကို လုပ်လာတာ ဒီနှစ်ဆို ၁ဝ ကြိမ်မြောက်ဖြစ်သွားပြီ ” ဟု ဆိုသည်။

အဆိုပါသက္ကမအမျိုးသားနေ့ကို ရခိုင်ပြည်နယ်၏ နေရာတစ်ခုတည်းမှာပြုလုပ်ကျင်းပ၍ မိမိတို့လူမျိုးများ ညီညွတ်ရေးကို ရည်ရွယ်ပြီး စုစည်းချင်သော ဆန္ဒရှိကြောင်း ၄င်းက ဆက်ပြောသည်။

 ̏ ဒီအမျိုးသားနေ့ကို ရခိုင်ပြည်ရဲ့မြို့နယ်တိုင်းမှာ လုပ်တာမဟုတ်ဘူး။ တစ်နေရာတည်းမှာ စုပြီးလုပ်ကြတာပေါ့။ ဟိုဘက်ဒီဘက် ခွဲမပေးချင်ဘူး။ တစ်နေရာတည်းမှာ စုစည်းချင်တယ်။ ဒီနှစ်တော့ ကိုဗစ်ကာလဆိုတော့ အဖွဲ့ခေါင်းဆောင်ပိုင်းတွေပဲ ခေါ်မယ်။ ခေတ်ကာလကောင်းတဲ့နှစ်တွေကဆို ရွာပေါင်းစုံ နယ်ပေါင်းစုံကလာပြီး ဒီအမျိုးသားနေ့မှာ စုစည်းကြတာပေါ့။ ဘင်္ဂလားဒေ့ရှ်နိုင်ငံနဲ့ အိန္ဒိယနိုင်ငံကပင် ဦးဇင်းတို့လူမျိုးတွေ လာကြတယ် ̋ ဟုပြောသည်။

သက္ကမ စာပေနှင့်ယဉ်ကျေးမှုအသင်း ဥက္ကဋ္ဌ ဦးကျော်ဇံက  ̏ ဒီနှစ်က ကိုဗစ်ကာလဆိုတော့ နှစ်တိုင်းခါလို စည်းစည်းကားကား မကျင်းပနိုင်ဘူး။ ပြီးတော့ ငွေကြေးအခက်ခဲလည်းရှိတာပေါ့။ ဒီအမျိုးသားနေ့ကို ကျနော်တို့အဖွဲ့က ခေါင်းဆောင်ပိုင်းတွေက တက်ရောက်ပြုလုပ်မှာဖြစ်တယ်။ နှစ်စဉ်လုပ်လာတဲ့ အမျိုးသားနေ့ကို မရပ်တန့်စေချင်တဲ့သဘောပေါ့။ အယင်နှစ်တွေကဆို ရခိုင်ပြည်က သက္ကမလူမျိုးတွေအပြင် နိုင်ငံတကာမှာရှိတဲ့သက္ကမလူမျိုးတွေလည်း ရောက်ကြတာပေါ့ ̋ ဟုပြောသည်။

၄င်းသက္ကမအမျိုးသားနေ့ကို ယခင်နှစ်များလို စည်စည်ကားကား မကျင်းပနိုင်၍ ရိုးရာယဉ်ကျေးမှုအက ကပြ ပြသခွင့်မရသဖြင့် စိတ်ထဲမှာခံစား ဝမ်းနည်းမိကြောင်း သက္ကမလူမျိုးဝင်တစ်ဦးဖြစ်သူ မနီနီလင်းက ပြောသည်။

“ ဒီနှစ်က အယင်နှစ်တွေလိုမျိုး ကျမတို့ သက္ကမအမျိုးသားနေ့ကို စည်စည်ကားကား  မကျင်းပနိုင်ဘူးပေါ့။ ကိုဗစ်ကြောင့်လည်းဖြစ်တယ်။ ကျမတို့ရခိုင်မှာ စစ်ရေးပဋိပက္ခဖြစ်နေတာလဲ တစ်ခုပေါ့။ ကျင်းပခွင့်ရတဲ့ နှစ်တွေမှာဆို ကျမတိုရဲ့ ရိုးရာယဉ်ကျေးမှုအကတွေ ကပြခွင့်ရတယ်။ ဝိုင်းဝန်းကူညီလုပ်ပေးခွင့်ရတယ်။ ပီတိဖြစ်ရတာပေါ့။ ဒီနှစ်က အယင်နှစ်တွေလိုမဟုတ်ဆိုတော့ စိတ်ထဲမှာ အရမ်းကြီးခံစားရတာပေါ့။ ဝမ်းနည်းမိတာပေါ့ ̋ ဟုပြောသည်။

သက္ကမအမျိုးသားနေ့ကို ၂ဝ၁၂ ခုနှစ်မှစ၍ မင်းပြားမြို့နယ်၊ လက်ပန်ကုန်း ကျေးရွာတွင် စတင် ပြုလုပ်ခဲ့ပြီး  (၁ဝ) ကြိမ်မြောက် သက္ကမအမျိုးသားနေ့ကို ရွှေတောင်ကျေးရွာတွင် ၂ဝ၂၁ ခုနှစ် ဇန်နဝါရီလ ၇ ရက်နေ့တွင် ပြုလုပ်ကျင်းပခဲ့သည်။

ရခိုင်ပြည်နယ်အတွင်း သက္ကမလူမျိုးတို့သည် မင်းပြား၊ မြောက်ဦး၊ ကျောက်တော်၊ ပုဏ္ဏားကျွန်း၊ မောင်တောနှင့် ဘူးသီးတောင် ၄င်းမြို့နယ်များတွင် အများဆုံးနေထိုင်ကြ၍ ကျန်မြို့နယ်များ၌ အနည်းငယ် နေထိုင်လျက် ရှိကြောင်းနှင့် ရခိုင်ပြည်နယ်တွင် သက္ကမလူမျိုး ၄ဝဝဝဝ ခန့်ရှိ၍ ပြည်ပရောက် သက္ကမလူမျိုး ၅ဝဝဝ ခန့်ရှိကြောင်း  မင်းပြားမြို့နယ် သက္ကမစာပေနှင့် ယဉ်ကျေးမှု အသင်းမှ သိရှိရသည်။