မြန်မာနိုင်ငံ၏ အင်တာနက်လွတ်လပ်ခွင့်ထပ်မံကျဆင်း

နိရဉ္စရာ၊ အောက်တိုဘာ ၂၁/ ၂၀၂၂

ယခုနှစ်တွင် မြန်မာနိုင်ငံ၏ အင်တာနက်ပေါ်ရှိလွတ်လပ်ခွင့် ရမှတ်အခြေအနေသည် ကမ္ဘာ့အဆိုးရွားဆုံး ကျဆင်းမှုများထဲမှ တစ်ခုဖြစ်လာကြောင်း၊ မြန်မာနိုင်ငံရှိ အင်တာနက် လွတ်လပ်ခွင့်ကဏ္ဍသည် ယခုနှစ်တွင် ရမှတ် ၁၂ မှတ်အထိ ကျဆင်းလာကြောင်း လွတ်လပ်သောထုတ်ဖော်ပြောဆိုခြင်း မြန်မာ( Freedom Express Myanmar/FEM) ၏ အစီရင်ခံစာတစ်စောင်တွင် ဖော်ပြသည်။

စစ်တပ်အာဏာသိမ်းပြီးနောက် စုစုပေါင်း ရမှတ် ၁၀၀ အနက် ပထမနှစ် ၂၀၂၁ခုနှစ်တွင် ရရှိသည့် ရမှတ် ၁၇ မှတ်မှ ဆက်တိုက်ကျဆင်းလာသည့် ၂၀၂၂ ခုနှစ် ရမှတ် ၁၂ မှတ်အထိ အခြေအနေထိ ကျဆင်းခဲ့သည်ဟု ဆိုသည်။

မြန်မာနိုင်ငံသည် “အင်တာနက်လက်လှမ်းမှီသုံးစွဲနိုင်မှု” ကဏ္ဍတွင် စုစုပေါင်းရမှတ် ၂၅ မှတ်နှင့် နှိုင်းယှဥ်လျှင် အလွန်နိမ့်ပါးသော ၂ မှတ်ကိုသာ ရရှိခဲ့ပြီး၊ ယင်းသည်၂၀၂၁ ခုနှစ်တွင် ရရှိသည့် ရမှတ် ၄ အဆင့်မှ ကျဆင်းခဲ့ခြင်း ဖြစ်သည်။

ယင်းသို့ ကျဆင်းရသည့် အဓိကအကြောင်းအရင်းများမှာ အာဏာသိမ်း စစ်တပ်မှ နိုင်ငံအနှံ့ ကျယ်ပြန့်သည့် အင်တာနက်ဖြတ်တောက်မှုများပြုလုပ်ရန် အမိန့်ပေးခြင်း၊ အဖိုးအခအားဖြင့် တတ်နိုင်သော အင်တာနက်သုံးစွဲနိုင်မှု (အထူးသဖြင့် ကျဆင်းနေသည့် စီးပွားရေးအခြေအနေကြောင့် ထိခိုက်နစ်နာနေနှင့်ပြီးသော ဆင်းရဲသားများ၏ အင်တာနက်သုံးစွဲနိုင်မှု) ကို ပြင်းပြင်းထန်ထန် ထိခိုက်စေသော မိုဘိုင်းဒေတာခများနှင့် ဆင်းမ်းကဒ်အခွန်အခများ တိုးမြှင့်ကောက်ခံခြင်း စသည်တို့ကြောင့် ဖြစ်သည်ဟု ထုတ်ပြန်ချက်တွင် ဖော်ပြသည်။   

“အကြောင်းအရာကန့်သတ်မှု” ကဏ္ဍတွင်  မြန်မာနိုင်ငံသည် စုစုပေါင်းရမှတ် ၃၅ မှတ်အနက် ၆ မှတ်ကိုသာ ရရှိခဲ့ပြီး၊ ယင်းသည် ၂၀၂၁ ခုနှစ်တွင် ရရှိခဲ့သော ၇ မှတ်မှ နိမ့်ဆင်းလာခဲ့ခြင်း ဖြစ်သည်။

ယင်းသို့ ကျဆင်းရခြင်းမှာ အွန်လိုင်းပေါ်ရှိ စည်းရုံးတော်လှန်ရေးများနှင့် ဒစ်ဂျစ်တယ် တက်ကြွလှုပ်ရှားမှုများကို စစ်တပ်မှ ပိုမိုပြင်းထန်စွာ ဖိနှိပ်လာမှုကြောင့် ဖြစ်သည်။

ထိုဖိနှိပ်မှုများမှတဆင့် မိမိကိုယ်ကိုဆင်ဆာထိန်းချုပ်ခြင်းများကိုလည်း ဦးတည်ဖြစ်ပေါ်စေခဲ့သည်။

“သုံးစွဲသူအခွင့်အရေးချိုးဖောက်ခြင်း” ကဏ္ဍတွင်လည်း  မြန်မာနိုင်ငံသည် စုစုပေါင်း ရမှတ် ၄၀ ရှိသည့်အနက် အလွန်အမင်းနိမ့်သည့် ရမှတ် ၄ မှတ်ကိုသာ ရရှိခဲ့ပြီး၊ ယင်းသည် ၂၀၂၁ ခုနှစ်တွင် ရရှိခဲ့သော ရမှတ် ၆ မှတ်မှ ထပ်မံကျဆင်းလာခြင်း ဖြစ်သည်။

ယင်းသို့ကျဆင်းရခြင်းမှာ အွန်လိုင်းပေါ်ရှိ တက်ကြွလှုပ်ရှားမှုများအတွက် ပြည်သူများအား ဖမ်းဆီးထောင်ချခြင်းများ ပိုမိုမြင့်မားလာခြင်း၊ သေဒဏ်အပါအဝင် စစ်တပ်လက်အောက်ခံ တရားရုံးများမှ ချမှတ်သော အမြင့်ဆုံးပြစ်ဒဏ်စီရင်ချက်များ ပိုမိုများပြားလာခြင်း၊ စဥ်ဆက်မပြတ်စောင့်ကြည့်ထောက်လှမ်းမှုများ တိုးပွားလာခြင်းနှင့် VPN အပါအဝင် အင်တာနက်အသုံးပြုမှုကို ရာဇဝတ်မှုအဖြစ် ပြစ်ဒဏ်များ ပိုမိုချမှတ်အရေးယူလာခြင်းတို့ကြောင့် ဖြစ်သည်ဟု ဆိုသည်။

မြန်မာနိုင်ငံသည် တရုတ်နိုင်ငံကဲ့သို့ အဆင့်မြင့်နည်းပညာအသုံးပြုကာ အင်တာနက်သုံးစွဲသူများကို ပိတ်ဆို့ခြင်း၊ ဆင်ဆာဖြတ်တောက်ခြင်းနှင့် အနှောင့်အယှက်ပြု ဖိနှိပ်ခြင်းများ မလုပ်နိုင် သေးသော်လည်း ဥပမာ အင်တာနက်ဖြတ်တောက်ခြင်းနှင့် ဒစ်ဂျစ်တယ်သုံးစွဲသူများအား ဖမ်းဆီးထောင်ချခြင်း ကဲ့သို့သော အချို့အညွှန်းကိန်းများတွင် တရုတ်နိုင်ငံထက် ပိုမိုဆိုးရွားနေသည်ဟု ဖော်ပြထားသည်။