စစ်တွေမြို့ တွင် လူငယ် ၃ ဦးကို စစ်ကောင်စီ ဖမ်းဆီး

ရခိုင်ပြည်နယ်၊ စစ်တွေမြို့တွင် မြို့ခံ လူငယ် ၃ ဦးကို စစ်ကောင်စီတပ်က ဖမ်းဆီးသွားသည်ဟု စုံစမ်းသိရသည်။

ဖမ်းဆီးခံရသူ ၃ ဦးမှာ စစ်တွေမြို့၊ နာဇီရွာရပ်ကွက်၊ ရေခဲစက်အနီးတွင် နေထိုင်ကြသည့် အသက် ၃၀ အရွယ်ခန့် ကိုကျော်မျိုးအောင်၊ ကိုဦးလင်းစိုးနှင့် ကိုဇော်မျိုးအောင်တို့ ဖြစ်ကြသည်ဟု သိရသည်။

သူတို့ ၃ ဦးကို ယနေ့ ဒီဇင်ဘာလ ၁၅ ရက်၊ နံနက် ၁၁ နာရီတွင် စစ်ကောင်စီတပ်ဖွဲ့ဝင်များက လက်နက်အပြည့်အစုံကိုင်ဆောင်ကာ နေအိမ်သို့ဝင်ရောက် ဖမ်းဆီးသွားခြင်းဖြစ်သည်ဟု မြို့ခံတစ်ဦးက ပြောသည်။

"အိမ်ကိုလာပြီး ဖမ်းသွားကြတာ။ ဘာလို့ဖမ်းတာလဲတော့မသိဘူး။ ကျွန်တော်က ဖမ်းသွားတာကိုပဲ မြင်လိုက်ရတာ" ဟု ပြောသည်။

အဆိုပါ ၃ ဦးကို မည်သည့်အတွက်ဖမ်းဆီးသည်ကို မသိရသေးသလို မည်သည့်နေရာသို့ ရောက်ရှိနေသည်ကိုလည်း မသိရသေးသဖြင့် မိသားစုများ စိုးရိမ်နေကြသည်ဟု ပြောဆိုသည်။

ယခင်တိုက်ပွဲများမှသည် တကျော့ပြန်တိုက်ပွဲ ယနေ့ကာလအထိ  စစ်ကောင်စီဘက်မှ  သံသယများဖြင့် မတရားသဖြင့် ဖမ်းဆီးထားသော အရပ်သားပြည်သူ ဦးရေ (၄၃၀) ကျော်အထိ ရှိလာပြီဟု ညီနောင်မဟာမိတ်(၃)ဖွဲ့ သတင်းထုတ်ပြန်ရာတွင် ဖော်ပြထားသည်။ (NN-11)