- Web Master
- ၂၄ စက်တင်ဘာ ၂၀၂၂
အိမ်စိုးဖြူ
နိရဥ္စရာ၊ ဇွန် ၂၁/ ၂ဝ၂ဝ
ရခိုင်ပြည်နယ်၊ ကျောက်တော်မြို့နယ်၊ အပေါက်ဝကျေးရွာအနီးတွင် ယနေ့ နံနက် ၈ နာရီခန့်က ပစ်ခတ်မှု ဖြစ်ပွား၍ အမျိုးသမီးတစ်ဦးနှင့် အမျိုးသားတစ်ဦးတို့ ဒဏ်ရာရရှိသွားကြောင်း သတင်းရရှိသည်။
အပေါက်ဝကျေးရွာ၊ ရန်တား (ရင်းဒါး)ရပ်ကွက်အနီး ရထားလမ်းတွင် ယနေ့နံနက် ၇ နာရီ ၅ဝ ခန့်က တပ်မတော်စစ်ကြောင်းတစ်ခု ဖြတ်သွားချိန်၌ မိုင်းပေါက်ကွဲသံတစ်ချက်ထွက်ပေါ်ပြီးနောက် ၎င်းပစ်ခတ်မှု ဖြစ်ပွားခဲ့သည်ဟု သိရသည်။
ဒဏ်ရာရသူများမှာ ရင်းဒါးရပ်ကွက်မှ အသက်(၅ဝ)ကျော် အရွယ်များကြသည့် မမေဦး၏ မိခင်ဖြစ်သူ ဒေါ်ဦးကြိုင်နှင့် ဦးအေးကျော်တို့ ဖြစ်ကြာင်း၊ ဒေါ်ဦးကြိုင်တွင် ပေါင်တွင်လည်ကောင်း၊ ဦးအေးကျော်တွင် လက်တွင်လည်းကောင်း ဒဏ်ရာရရှိသွားခဲ့သည်ဟု အမည်မဖော်လိုသူ အပေါက်ဝကျေးရွာသားတစ်ဦးက ပြောသည်။
“စစ်သား တစ်ရာကျော်လောက် ရထားလမ်းကနေဖြတ်သွားတဲ့အချိန် မိုင်းတစ်လုံးပေါက်သံကြားပြီး စစ်သားတွေ သေနတ်တွေနဲ့ ပစ်တာ။ အမျိုးသမီးတစ်ဦး အပါအဝင် နှစ်ဦး ဒဏ်ရာ ရထားတယ်လို့ သိရတယ်။ ကျွန်တော်တို့လည်း အိမ်အောက်တွေမှာ ဝပ်နေရတယ်” ဟုပြောသည်။
၎င်းပစ်ခတ်မှုမှာ တစ်နာရီနီးပါး ဖြစ်ခဲ့ပြီး ကျေးရွာသားများမှာ ကြောက်လန့်၍ နေအိမ်အောက်များတွင် ပုန်းခို နေကြဆဲ ဖြစ်ကြောင်း ယနေ့နံနက် ၉ နာရီ အချိန်က ၎င်းက ပြောကြားသည်။
အဆိုပါကိစ္စနှင့် ပတ်သက်၍ ကျောက်တော်မြို့နယ် ပြည်သူ့လွှတ်တော်ကိုယ်စားလှယ် ဦးဦးထွန်းဝင်းက “ ကျောက်တော်ပေါ်မြို့ကနေ လက်နက်ကြီးအသံတွေကြားရတယ်။ ရွာသားတွေက ကြောက်ပြီးပုန်းနေကြတယ်။ ဖုန်းဆက်မေးတဲ့အချိန်မှာ။ ဒဏ်ရာရတဲ့သူတွေကို ဆေးရုံတင်သွားတယ်လို့ သိရတယ်” ဟုပြောသည်။
အဆိုပါကိစ္စနှင့် ပတ်သက်၍ နိရဥ္စရာသတင်းဌာနမှ တပ်မတော်သတင်းမှန်ပြန်ကြားရေးအဖွဲ့ အတွင်းရေးမှူး ဗိုလ်မှူးချုပ်ဇော်မင်းထွန်း နှင့် ရခိုင်ပြည်နယ် အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးတို့အား ဆက်သွယ်ခဲ့သော်လည်း ဆက်သွယ်မှု မရရှိသေးပါ။