- Web Master
- ၂၄ စက်တင်ဘာ ၂၀၂၂
ထွန်းခိုင် (တောင်ရင်းကျွန်း)
နိရဥ္စရာ၊ နိုဝင်ဘာ ၁၂ / ၂ဝ၂ဝ
ရခိုင်ပြည်နယ်၊ အမ်းမြို့နယ်၊ ရှောက်ခြုံကျေးရွာမှ လက်နက်ကြီးကျည်စထိမှန် ဒဏ်ရာရရှိသွားသည့် ကလေး ၂ ဦးနှင့် ၎င်းတို့၏ မိခင်ဖြစ်သူအပါအဝင် ရွာသား ၄ ဦးမှာ ယနေ့ နံနက် ၈ နာရီကျော်အချိန်ခန့်က ကမ်းထောင်းကြီး တိုက်နယ်ဆေးရုံမှတစ်ဆင့် စစ်တွေပြည်သူ့ဆေးရုံကြီးသို့ ရောက်ရှိလာကြောင်း သိရှိရသည်။
စစ်တွေဆေးရုံသို့ ရောက်ရှိလာသူများမှာ မတင်မေနိုး (၃၁) နှင့် သူမ၏ သားဖြစ်သူ မောင်လင်းလင်းချေ (၆) နှစ်၊ သမီးဖြစ်သူ မတိုးတိုး (၄) နှစ်နှင့် ဦးခင်မောင် (၅၄) တို့ဖြစ်ကြသည်။
ရှောက်ခြုံရွာမှ ဒဏ်ရာရရှိသွားသူ ၆ ဦးရှိရာ မောင်လှမင်းကို (၁၅) နှစ်နှင့် မောင်မောင် (၁၃) နှစ်တို့၏ ဒဏ်ရာမှာ စိုးရိမ်စရာမရှိသည့်အတွက် ကမ်းထောင်းကြီးတိုက်နယ်ဆေးရုံတွင် ဆေးကုသမှု ဆက်လက် ခံယူနေကြောင်း သိရှိရသည်။
စစ်တွေဆေးရုံသို့ ရောက်ရှိလာသူ ၄ ဦးအနက် ဦးခင်မောင်နှင့် မတင်မေနိုးတို့မှာ ဒဏ်ရာပြင်းထန်ကြောင်း မတင်မေနိုး၏ မောင်ဖြစ်သူ ကိုဇော်မိုးသူက ပြောသည်။
“ အခု စစ်တွေကို ရောက်ရှိလာတဲ့ လူ ၄ ယောက်မှာ ကလေးအမေနဲ့ နောက်ဦးလေးတစ်ယောက်က ဒဏ်ရာ ပြင်းတယ်။ ကလေးတွေကတော့ ဒဏ်ရာသိပ်မပြင်းပါဘူး။ ဒါပေမယ့် သူ့အမေက စစ်တွေဆေးရုံမှာ ဆေးကုသမှု ခံယူရမှာဖြစ်တဲ့အတွက်ကြောင့် သူတို့ပါ စစ်တွေဆေးရုံကို လာကြရတာဖြစ်ပါတယ်” ဟုပြောသည်။
ဖြစ်စဉ်မှာ နိုဝင်ဘာလ ၁ဝ ရက်နေ့ ညနေ ၇ နာရီအချိန်ခန့်က ကဇူးကိုင်းဘက်ကနေ လက်နက်ကြီး၊ လက်နက်ငယ်များ ပစ်ခတ်သံကြားရသဖြင့် ရွာသားများမှာ မိမိတို့၏ အိမ်ပေါ်တွင် မနေရဲကြဘဲ ရွာဦး ဘုန်းတော်ကြီးကျောင်းပေါ်သို့ ခိုလှုံရန်သွားကြစဉ် ဘုန်းတော်ကြီး ကျောင်းအနီး လက်နက်ကြီး ကျည်တစ်လုံး ကျရောက်ပေါက်ကွဲသဖြင့် ကလေးငယ်နှစ်ဦးအပါအဝင် အရပ်သား ၆ ဦး အသီးသီးတွင် ဒဏ်ရာ ရရှိ သွားကြောင်း ၎င်းက ပြောကြားသည်။
အဆိုပါဖြစ်စဉ်များကြောင့် အိမ်ခြေ ၁ဝဝ ကျော်ခန့်ရှိသော ရှောက်ခြုံကျေးရွာသားများမှာ မိမိတို့၏ နေအိမ်တွင် မနေရဲကြဘဲ ကမ်းထောင်းကြီးမြို့သို့ ထွက်ပြေးခိုလှုံနေကြကြောင်း သိရှိရသည်။