- Web Master
- ၂၅ အောက်တိုဘာ ၂၀၂၃
နိရဥ္စရာ၊ ဖေဖော်ဝါရီ ၁၆/ ၂၀၂၃
ရခိုင်ပြည်နယ်၊ မင်းပြားမြို့နယ်၊ ရန်တိုင်ကျေးရွာရှိ အရက်ဆိုင်တစ်ခုတွင် ဓါးထိုးမှုဖြစ်ပွား၍ အသက် ၃၀ ကျော်အရွယ် လူတစ်ဦးသေဆုံးသွားကြောင်း သတင်းရရှိသည်။
သေဆုံးသွားသူမှာ ဦးမောင်ခင်စော နှင့် ဒေါ်ဦးမြခင်တို့၏ သားဖြစ်သူ ကိုမောင်မောင်ညွှန့် အသက် (၃၆နှစ်)ဖြစ်ကြောင်း သိရသည်။
ဖေဖော်ဝါရီလ ၁၄ရက်နေ့ ညနေ ၆ နာရီကျော်ခန့်တွင် ဦးခင်မောင်သန်းအရက်ဆိုင်၌ အရက်ဝိုင်းဖွဲ့သောက်ရာက စကားအခြေအတင်ဖြစ်ကြပြီး၊ ဓါးဖြင့်အထိုးခံရ၍ သေဆုံးသွားခြင်းဖြစ်ကြောင်း ရွာသားတစ်ဦးက
ပြောသည်။
“ အရက်ဆိုင်မှာဖြစ်ကြတာပါ။ အရက်ဝိုင်းလည်းမတူဘူး။ တစ်ယောက်နဲ့ တစ်ယောက် ခိုက်ရန်ဖြစ် စကားများကြရာကနေ ဓါးထိုးခံရတာပါ။ ကိုမောင်မောင်ညွှန့်ရဲ့ ရင်ဝကိုတစ်ချက်နဲ့ ဘယ်လက်မောင်းကိုပါ ဓါးနဲ့ထိုးလိုက်တော့ တစ်ခါတည်း နေရာတင်ပွဲချင်းပြီးသေသွားတာပါ ” ဟုပြောသည်။
ဓါးဖြင့်ထိုးသတ်ခဲ့သူမှာ မင်ပြားမြို့နယ်၊ စအင်းရွာသစ်မှ မောင်မျိုးသိန်းစိုး (ကင်းချေ) အသက် ၁၈နှစ် ဖြစ်သည် ဟုသိရသည်။
လက်ရှိတွင်သူ့ကို ရက္ခိုင့်တပ်တော် (AA) ဖမ်းဆီးထားသည်ဟု သိရသည်။