- Web Master
- ၁၇ စက်တင်ဘာ ၂၀၂၄
နိရဉ္စရာ၊ ဒီဇင်ဘာ ၂၆/ ၂၀၂၂
စစ်ကိုင်းတိုင်း၊ အင်းတော်မြို့နယ်၊ နတ်မဟုတ်ကြီးကျေးရွာမှ စစ်ကောင်စီ တပ်မ (၈၈) လက်အောက်ခံ ခမရ (၃၀၁) တပ်က ဖမ်းဆီး ခေါ်ဆောင်သွားသည့် ကျေးရွာသား ၈ ဦး၏ အလောင်းကို ပြန်လည်ရှာတွေ့ခဲ့ပြီ ဖြစ်ကြောင်း Indaw Revolution – IR တွင် သတင်းဖော်ပြထားသည်။
သူတို့ ၈ ဦးကို နိုဝင်ဘာ ၂၈ ရက်နေ့ ညနေပိုင်းက ဖမ်းဆီးခေါ်ဆောင်သွားပြီးနောက် သူတို့၏ အလောင်းကို နတ်မဟုတ်ကြီးရွာနှင့် မနီးမဝေးရှိ ကမ်းနီရွာအနီးတွင် တစ်လခန့်အကြာတွင် မြေမြုပ်၍ တွေ့ရှိခဲ့သည်ဟု သိရသည်။
သတ်ဖြတ်ခံလိုက်ရသည့် ပြည်သူများမှာ ဦးမင်းနိုင်( အသက် ၅၀ ကျော်)၊ ဦးကျော်သန်း( ၆၀ နှစ်)၊ဦးကျော်သန်း၏သားဖြစ်သူ ဦးဘိုဘိုဝေ(၃၃နှစ်)၊ ဦးကျော်ဌေး( ၅၀ကျော်)၊ ဦးကျော်ထွန်း(၅၀ ကျော်)၊ဦးထွန်းနိုင်( ၃၈နှစ် ၊ ဦးမြင့်ဖေ( ၆၀ နှစ်)နှင့် ဦးသာပြူး( ၆၈ )နှစ်တို့ ဖြစ်ကြသည်။
သေဆုံးသူ ၈ ဦးအနက်မှ ၂ ဦးကို ခေါင်းဖြတ်သတ်ဖြတ်ထားပြီး ကျန် ၆ ဦးကို တုတ်ဖြင့် ရိုက်နှက်သတ်ဖြတ်ထားသည်ဟု Indaw Revolution – IR ရေးသားထားသည်။
ယခုကဲ့သို့ အလောင်းများကို ရှာဖွေတွေ့ရှိခဲ့ခြင်းမှာ စစ်ကောင်စီတပ်သားတစ်ဦးကို ဖမ်းမိပြီးနောက် စစ်ဆေးရာမှ ၎င်းစစ်သား၏ ပြောဆိုချက်အရ ကမ်းနီရွာအနီးတွင် ရှာဖွေစဉ် တွေ့ရှိခဲ့ခြင်းဖြစ်သည်ဟု ဒေသတွင်း သတင်းများတွင် ဖော်ပြထားသည်။