မောင်တောမြို့နယ်တွင် ကထိန်အပြန်ကားမိုင်းထိ၍ ၃ ဦးသေ၊ ၆ ဦးဒဏ်ရာရ

ခိုင်လူလှ (ရိုးမမြေ)
နိရဥ္စရာ၊ နိုဝင်ဘာ၁၇/၂ဝ၂ဝ

ရခိုင်ပြည်နယ် အနောက်ဘက်နယ်စပ် မောင်တောမြို့နယ်တွင် ကထိန်မှ အပြန်ကားတစ်စီး မိုင်းခွဲ တိုက်ခိုက်ခံရ၍ ၃ ဦး သေဆုံးပြီး ၆ ဦး ဒဏ်ရာရရှိသွားကြောင်း သတင်းရရှိသည်။

သေဆုံးသွားသူများမှာ မောင်တော ခရေမြိုင်ကျေးရွာမှ ကိုကျော်ရဲအောင် (၂၅) နှစ်နှင့် ဇနီးဖြစ်သူ မအေးဆန်းနု (၂ဝ) နှင့် သူတို့၏ ၁ နှစ်ကျော်သားလေးတစ်ဦးဖြစ်ကြသည်။  

အဆိုပါ အခင်းဖြစ်ပွားရာသို့ ရောက်ရှိနေသည့် နံ့သာတောင် ဆရာတော်က “ နေ့လယ် ၁ နာရီလောက်မှာ ဖြစ်တာပါ။ ကားသွားရင်းနဲ့ ပေါက်တာပါ။ ကားတခြား၊ လူတခြား ဖြစ်သွားပါတယ်။ သာယာကုန်း ကထိန်က အပြန်မှာ ဖြစ်တာပါ။” ဟု ပြောဆိုသည်။

၎င်းကားမှာ သာယာကုန်းရွာ ကထိန်ပွဲတော်မှ အပြန် ကျွန်းပေါက်အုပ်စုနှင့် လိပ်ရ အုပ်စုအကြား သဲချောင်းတွင် ဖြစ်ကြောင်း သိရသည်။