မင်းသျှင်စော၊နိရဉ္စရာ၊ အောက်တိုဘာ၂၅/ ၂၀၂၄

အာရက္ခတပ်တော် ( AA)သိမ်းပိုက် ထိန်းချုပ်ထားသည့် ရခိုင်ပြည်၊ သံတွဲမြို့ရှိ ကြံ့ခိုင်ရေးရုံးကို စစ်ကောင်စီလေတပ်ကဗုံးကြဲသည့်အတွက် ရုံးအဆောက်အဦပြိုကျ ပျက်စီးသွားပြီး ဆယ်ကျော်သက် အရွယ် လူငယ်တစ်ဦး ထိခိုက် ဒဏ်ရာရရှိသွားခဲ့သည်ဟုသိ၇သည်။

ထိခိုက်ဒဏ်ရာရရှိသွားသည့် လူငယ်မှာ  သံတွဲအမှတ် ၈ ရပ်ကွက်နေ မောင်ဖိုးချို(၁၄)နှစ် ဖြစ်သည်။  

အောက်တိုဘာ၂၅ နံနက် ၅ နာရီအချိန်ခန့်တွင် စစ်ကောင်စီမှ ဂျက်ဖိုက်တာဖြင့် ဗုံးကြဲ တိုက်ခိုက်သဖြင့် ကြံ့ခိုင်ရေးရုံးနှင့် ပတ်ဝန်းကျင်အဆောက်အဦးတို့ ပျက်စီးသွားခဲ့သည်ဟု ဒေသခံတစ်ဦးက ပြောသည်။

" ဒီနေ့မနက် ၅ နာရီလောက်က ဂျက်နဲ့ လာပြီး ဗုံးချပါတယ်။အဓိကချသွားတာက ၂ နေရာပါ။ တစ်နေရာကကြံ့ခိုင်ရေးရုံးနဲ့ နောက်တစ်နေရာက ယခင်စစ်သားစုဆောင်းရေးရုံးကိုပါ။ တစ်နေရာတစ်လုံးစီ ၂ ကြိမ်ချသွားပါတယ်။ အဲဒီအနီးအနားကအိမ်က  လူငယ်တစ်ဦးကိုတော့ ဗုံးစ ထိမှန် သွားတယ်" ဟု ပြောသည်။

၎င်းတိုက်ခိုက်မှုအတွင်း ကြံ့ခိုင်ရေးရုံးနှင့် စစ်သားစုဆောင်းရေးရုံးတို့ ပျက်စီးသွားပြီး အနီးအနား ပတ်ဝန်းကျင်ရှိ နေအိမ်များကိုလည်း ထိခိုက်ပျက်စီးမှု ရှိသည်ဟု ဆိုသည်။

သံတွဲမြို့ကို အာရက္ခတပ်တော်က သိမ်းပိုက်ထိန်းချုပ်ထားပြီးစစ်ကောင်စီက လူနေရပ်ကွက်နှင့် ကျေးရွာများပါမရှောင် ဗုံးကြဲတိုက်ခိုက်နေသည်။

လွန်ခဲ့သည့် စက်တင်ဘာ ၂၆ ရက်နံနက် ရ နာရီ ၄၀ မိနစ်ကလည်း  စစ်ကောင်စီက သံတွဲမြို့နယ်ခန်းမနှင့်သဘာ၀ပတ်ဝန်းကျင်ထိန်းသိမ်းရေးရုံးများ ကို ဗုံးကြဲတိုက်ခိုက်ခဲ့ရာမှ စစ်ဘေးရှောင်ကလေးငယ်များ အပါအဝင် ၁၃ ဦးသေဆုံးပြီး ၂၅ ဦး ဒဏ်ရာရရှိသွားခဲ့သည်။

ပုံစာ- စက်တင်ဘာ ၂၆ ရက်နံနက်က ဗုံးကြဲခံခဲ့၇သည့် သံတွဲ မြို့နယ်ခန်းမ။