စစ်တွေတွင် ရုံးထိုင်ခဲ့သည့် စစ်ကောင်စီတာဝန်ရှိသူများပြန်သွားပြီးနောက် လျှပ်စစ်မီး နာရီနှင့်ချီပြတ်တောက်မှုရှိလာ

ရခိုင်ပြည်နယ်၊ စစ်တွေမြို့တွင် မိုခါမုန်တိုင်းပြီးနောက် နှစ်လကျော်ကြာ ရုံးထိုင်ခဲ့ကြသည့် စစ်ကောင်စီဝန်ကြီးများအါအဝင် တာဝန်ရှိသူများ ပြန်သွားကြပြီဖြစ်၍ လျှပ်စစ်မီး နာရီနှင့်ချီကာ ပြတ်တောက်မှုများ ရှိလာနေသည်ဟု ဒေသခံများက ပြောသည်။

ယခုရက်ပိုင်းအတွင်း ပြန်လည်ပြတ်တောက်မှုဖြစ်ပေါ်လာခြင်းဖြစ်ပြီး တစ်ရပ်ကွက်နှင့် တစ်ရပ်ကွက် မီးပြတ်ချိန်မတူညီကြဟု မြို့ခံအမျိုးသမီးတစ်ဦးက ဇူလိုင် ၂၈ ရက်တွင် ပြောသည်။

“ဒီနေ့တော့ နေ့လယ် ၁ နာရီကျော်လောက်ကနေ ပြတ်သွားတာ။ ၂ နာရီခွဲလောက်မှာ ပြန်ရတယ်။ ဒီရက်ပိုင်း မီးပြတ်တာ ၄ ကြိမ်လောက်ရှိပြီ။ မနေ့ညကဆိုလည်း ညနေ ၇ နာရီလောက်ကနေပြတ်တာ ည ၁၁ နာရီမှ ပြန်ရတယ်။ အရင်နေ့တွေမှာလည်း မနက်ပိုင်း ထမင်းချက်ချိန်မှာ ၁ နာရီလောက်စီ ပြတ်တယ်”ဟု ပြောသည်။

အချို့ မြို့ပေါ်ရပ်ကွက်များတွင် ဇူလိုင်လ ၂၆ ရက်မှစတင်ကာ နံနက်ပိုင်းနှင့် ညနေပိုင်းတို့၌ နာရီအတော်ကြာ လျှပ်စစ်မီးပြတ်တောက်ခြင်းများဖြစ်လာနေသည်ဟု နောက်ထပ်မြို့ခံတစ်ဦးက ပြောသည်။

“ကျနော်တို့ရပ်ကွက်မှာဆို မနေ့ကလည်း မနက် ၉ နာရီကျော်ကနေ ပြတ်တယ်။ နေ့လယ် ၂ နာရီမှ ပြန်လာတယ်။ ဒီနေ့လည်း မနက် ၁ဝ နာရီကနေ ပြတ်တာ နေ့လယ် ၂ နာရီမှ ပြန်လာတယ်။ မီးကတော့ ပုံမှန်လို ပြတ်လာပြီ”ဟု ပြောသည်။

စစ်တွေတွင် မိုခါမုန်တိုင်းပြီးနောက် ဇွန်လ ၇ ရက်မှစတင်ကာ ပြီးခဲ့သည့်ရက်ပိုင်းအထိ လျှပ်စစ်မီး ၂၄ နာရီ အချိန်ပြည့် ရရှိနေခဲ့ခြင်းဖြစ်သည်။

ယင်းအချိန်က စစ်ကောင်စီပြည်ထောင်စုဝန်ကြီးဌာနပေါင်း ၁ဝ ကျော်မှ ပြည်ထောင်စုဝန်ကြီးများ၊ ဒုတိယဝန်ကြီးများ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများနှင့် နောက်ထပ် တာဝန်ရှိသူအဆင့်ဆင့်တို့သည် စစ်တွေတွင် ရုံးထိုင်ကာ မုန်တိုင်းသင့် ရခိုင်ဒေသ ပြန်လည်ထူထောင်ရေးလုပ်ငန်းများကို ဆောင်ရွက်နေခဲ့ကြသည်ဟု သိရသည်။

လက်ရှိတွင် အဆိုပါဌာနပေါင်း ၁ဝ ကျော်အနက် ဌာန နှစ်ခုမှ ဒုတိယဝန်ကြီးနှစ်ဦးမှအပ ကျန်ဝန်ကြီးများနှင့် တာဝန်ရှိသူများသည် ယခုအပတ်အတွင်း စစ်တွေမှတဆင့် နေပြည်တော်သို့ ပြန်သွားကြပြီဟု ရခိုင်ပြည်နယ်စစ်ကောင်စီရုံးနှင့် နီးစပ်သူတစ်ဦးက နိရဥ္စရာကို ပြောသည်။

အဆိုပါဝန်ကြီးများနှင့် တာဝန်ရှိသူများ စစ်တွေတွင် ရှိနေခဲ့ချိန် လျှပ်စစ်မီး ပြတ်တောက်မှု တစ်ကြိမ်တစ်ခါမျှ မရှိခဲ့ဟုလည်း မြို့ခံအမျိုးသမီးတစ်ဦးက ပြောသည်။

“သူတို့ကို အမြဲခေါ်ထားရမလိုဖြစ်နေပြီ”ဟုလည်း သူမက ဆက်ပြောသည်။

ပြီးခဲ့သည့်မေလ ၁၄ ရက်က မိုခါမုန်တိုင်းတိုက်ခတ်ခဲ့မှုကြောင့် ရခိုင်ပြည်နယ်အတွင်း စစ်တွေ၊ ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တော၊ ကျောက်တော်၊ မြောက်ဦး၊ မင်းပြား၊ ပေါက်တောနှင့် မြေပုံမြို့စသည့် မြို့နယ် ၁ဝ ခုတွင် လျှပ်စစ်ဓာတ်အားခွဲရုံများ၊ ဓာတ်မီးတိုင်များနှင့် ဓာတ်ကြိုးလိုင်းများ ထိခိုက်ပျက်စီးသွားခဲ့ရသည်။

လက်ရှိတွင် အဆိုပါမြို့ ၁ဝ မြို့တွင် လျှပ်စစ်မီးရရှိနေပြီဖြစ်သော်လည်း ကျေးရွာများတွင် ပြန်လည်ရရှိခြင်းမရှိသေးဟု ဒေသခံများက ပြောသည်။ (NN-16)

ဓာတ်ပုံ - မုန်တိုင်းပြီးနောက် ၂ လကျော်အကြာ စစ်တွေမြို့မြင်ကွင်းအား တွေ့ရစဉ်။