- Web Master
- ၂၉ သြဂုတ် ၂၀၂၄
ချစ်အိလှိုင်
နိရဉ္စရာ၊ မတ် ၂/ ၂ဝ၂၁
ရခိုင်ပြည်နယ်၊ မြောက်ဦးမြို့နယ် ၊ စင်းဘောကိုင်းစစ်ဘေးရှောင်စခန်းမှ လူငယ်(၁၃) ဦးကို စခန်းတာဝန်ရှိသူများက လာမည့် မတ်လ ၆ ရက်နေ့တွင် ရှင်ပြုမင်္ဂလာပြုလုပ်ပေးမည်ဟု သတင်းရရှိသည်။
လူဦးရေ လေးထောင်ခန့်ရှိသည့် ၄င်းစင်းဘောကိုင်းစစ်ဘေးရှောင်စခန်းရှိ ရှင်မပြုရသေးသည့် မိသားစုများမှ လူငယ်များအား ရှင်ပြုပေးရန် လာရောက်အပ်နှံကြသဖြင့် ယခုကဲ့သို့ ရှင်ပြုပွဲပြုလုပ်ပေးခြင်းဖြစ်ကြောင်း အဆိုပါစခန်းတာဝန်ခံ ဦးဇင်းအာရက္ခက မိန့်သည်။
“ ကိုယ်တော်တို့က စစ်ဘေးရှောင်စခန်းမှာနေတဲ့ မရှိဆင်းရဲနွမ်းပါးသူတွေကို ဦးစားပေးပြီး ရှင်ပြုပေးတာပါ။ အကုန်ရှင်လောင်းတွေပါ။ ရဟန်းမပါပါဘူး” ဟုပြောသည်။
မောင်ရှင်လောင်းများ၏ မိခင်၊ ဖခင်များကလည်း ၄င်းတို့အနေဖြင့်ရှင်ပြုပေးရန် မတက်နိုင်သည့် အခြေအနေတွင်ရောက်နေသည့်အတွက် စစ်ဘေးရှောင်စခန်းမှ စုပေါင်း ပြုလုပ်ပေးကြခြင်းအပေါ် ကျေးဇူးတင်မဆုံးဖြစ်ကြရကြောင်း မြောက်ဦးမြို့နယ် မော်ရွာသစ်မှ စစ်ဘေးရှောင်လာသူ မောင်ရင်လောင်း မောင်နိုင်သန်းစိုး(၁၉)နှစ်၏ ဖခင် ဦးသိန်းလွင်က ပြောသည်။
“ ကျွန်တော်တို့မှာ ဒီလောက်ဆင်းရဲနေတာ။ ကိုယ်တိုင်ရှင်မပြုပေးနိုင်ပါဘူး။ အခုလိုစခန်းက တာဝန်ရှိသူတွေဦးဆောင်ပြီး ရှင်ပြုပေးမည်ဆိုတော့ ဝမ်းသာမဆုံးဖြစ်ရပါတယ်။ ကျေးဇူးလည်း တင်ပါတယ်” ဟုပြောသည်။
၄င်းရှင်ပြုပွဲကို လာမည့် မတ်လ(၅) ရက်နေ့ မဏ္ဍပ်ဝင်၊ (၆) ရက်နေ့တွင် ဆံချမင်္ဂလာပြုလုပ်ပေးမည်ဖြစ်ကြောင်း သိရသည်။
စင်းဘောကိုင်းစစ်ဘေးရှောင်စခန်းတွင် မြောက်ဦးမြို့နယ်၊ ကျောက်တော်၊ မင်းပြားမြို့နယ်တို့မှ စစ်ဘေးရှောင်များ ခိုလှုံလျက်ရှိကြောင်းသိရသည်။