မင်းပြားမြို့ ဦးစိုးတင့်ရပ်ကွက်ကို ဝင်ရောက်လာသောစစ်တပ်က ရပ်ကွက်အုပ်ချုပ်ရေးမှူး၏ ဇနီးဖြစ်သူကိုခေါ်ယူပြီး စစ်ဆေးမေးမြန်းမှုများပြုလုပ်ခဲ့

ရေးသူ: Web Master
| ရက်စွဲ: ၀၇ ဇွန် ၂၀၂၂
| ကြည့်ရှုသူ: 6.8k

နိရဉ္စရာ၊ ဇွန် ၆/ ၂၀၂၂

ယနေ့ နံနက်က ရခိုင်ပြည်နယ်၊ မင်းပြားမြို့၊ ဦးစိုးတင့်ရပ်ကွက်ထဲကို အင်အား ၆၀ ခန့်ရှိသော စစ်ကောင်စီတပ်ဖွဲ့ဝင်များ ဝင်ရောက်လာပြီး အုပ်ချုပ်ရေးမှူးကို မတွေ့၍ ဇနီးဖြစ်သူအား ဘုန်းတော်ကြီးကျောင်းကို ခေါ်ယူကာ စစ်ဆေး မေးမြန်းမှုများပြုလုပ်ခဲ့သည်ဟု သတင်းရရှိသည်။

၎င်းစစ်ကောင်စီတပ်ဖွဲ့ဝင်များသည် မင်းပြားမြို့ ဦးစိုးတင့် ရပ်ကွက်ထဲသို့ ယနေ့ နံနက် ၇ နာရီက ဝင်ရောက်လာပြီး နေ့လယ် ၁၂ နာရီကျော်က ပြန်ထွက် သွားခဲ့သည်ဟု မျက်မြင်ဒေသခံများက ပြောဆိုသည်။

ရပ်ကွက်ထဲတွင် ရှိနေစဉ် ရပ်ကွက် အုပ်ချုပ်ရေးမှူးအား ရှာဖွေခဲ့ပြီး အုပ်ချုပ်ရေးမှူး မရှိသဖြင့် ဇနီးဖြစ်သူအား ခေါ်ယူသွားခဲ့သည်ဟု ပြောသည်။

“ အုပ်ချုပ်ရေးမှူးဇနီးကို ရပ်ကွက်ထဲက ဘုန်းတော်ကြီးကျောင်းကို ခေါ်သွားတယ်။ စစ်ဆေးမေးမြန်းမှုတွေ ပြုလုပ်ခဲ့တယ်လို့သိရတယ်။ နောက် ရပ်ကွက်က ရွာသားတွေကို ဘုန်းကြီးကျောင်းကို ခေါ်ခိုင်းတယ်။ ကျွန်တော် တို့ကို စစ်တပ်က ပြောတာကတော့ သူတို့ လာရင် မကြောက်ဖို့ ပြောတယ်” ဟု ဒေသခံတစ်ဦးက ပြောကြားသည်။

ထိုသို့ ခေါ်ယူခဲ့သော်လည်း ရပ်ကွက်နေပြည်သူများအား တစ်စုံတစ်ရာ အနှောင့်အယှက်ပြုလုပ်ခဲ့ခြင်းမရှိဟု ၎င်းက ပြောကြားသည်။