မင်းပြားတွင် မီးလောင်မှုဖြစ်၍ လူနေအိမ် ၄ လုံးဆုံးရှုံး

နိရဥ္စရာ၊မတ်၆/ ၂၀၂၃

ရခိုင်ပြည်နယ်၊ မင်းပြားမြို့တွင် ယနေ့ နံနက်က ၁၁ နာရီခန့်က မီးလောင်မှုဖြစ်ပွား၍ လူနေအိမ် ၄ လုံး မီးလောင်ဆုံးရှုံးသွားသည်ဟု သိရသည်။

၎င်းမီးမှာ မင်းပြားမြို့၊ ဥက္ကာပျံရပ်ကွက်၊ လမ်းသွယ်(၈)ရှိ မမိုးမိုးမှာ နေအိမ်အတွင်း မုန့်ကြော်ရာမှ မီးစတင်လောင်ကျွမ်းမှုဖြစ်ပွားခဲ့ခြင်းဖြစ်သည်ဟု ဒေသခံများက ပြောသည်။

ဥက္ကာပျံရပ်ကွက်မှ မြို့ခံတစ်ဦးက "သူတို့က မုန့်တွေရောင်းတယ်။ မုန့်ကြော်ရာကနေ မီးစလောင်တာ။ နေ့ခင်းဘက်ဆိုတော့ မီးကအရှိန်ပြင်းတယ်။ ဘေးနားကအိမ်တွေပါ မီးကူးသွားတာ" ဟု ပြောသည်။

အဆိုပါမီးလောင်မှုကြောင့် မီးစတင်လောင်ကျွမ်းသည့်နေအိမ်အပြင် အနီးအနားရှိ လူနေအိမ် ၃ လုံး၊ စုစုပေါင်းလူနေအိမ် ၄ လုံးမှာ မီးလောင်ကျွမ်းသွားခဲ့သည်ဟု သိရသည်။

မီးလောင်မှုကို မင်းပြားမြို့နယ် မီးသတ်တပ်ဖွဲ့နှင့် ရပ်ကွက်သားများက ပူးပေါင်းမီးငြိမ်းသတ်မှုကြောင့် မွန်းတည့် ၁၂ နာရီခန့်တွင် မီးငြိမ်သွားပြီး လူများထိခိုက်ဒဏ်ရာရရှိခြင်းမရှိခဲ့ဟု သိရသည်။

ပြီးခဲ့သည့်မတ်လ ၄ ရက်၊ နံနက် ၁၁ နာရီခန့်ကလည်း စစ်တွေမြို့၊ စက်ရုံရပ်ကွက်၊ အမှတ် ၁၂ တပ်ရင်းရှေ့၊ ဆီတန်းရှိ ဆီဆိုင်တစ်ဆိုင်တွင် မီးလောင်မှုဖြစ်ပွားခဲ့ပြီး ဆီဆိုင်ဝန်ထမ်းတစ်ဦးဖြစ်သည့် အသက်(၄၉)နှစ်အရွယ် ဦးမောင်ခင်လှမှာ ဒဏ်ရာရရှိသွားသည်။

ယင်းအပြင် ပြီးခဲ့သည့် မတ်လ ၂ ရက်ကလည်း မြောက်ဦးမြို့နယ်တွင် မီးလောင်မှုဖြစ်ပွားခဲ့ပြီး နေအိမ် ၁ လုံးမီးလောင်ကျွမ်းသွားကာ မတ်လ ၃ ရက်ကလည်း ရသေ့တောင်မြို့တွင် မီးလောင်မှုဖြစ်ပွား၍ နေအိမ် ၄ လုံးမီးလောင်ပျက်စီးသွားကြောင်း သိရသည်။

အလားတူ ပြီးခဲ့သည့် ဖေဖော်ဝါရီ ၁၈ ရက်နေ့၊ ည ၉ နာရီအချိန်ကလည်း ကျောက်တော်မြို့နယ်၊ မဟာမုမြတ်မုနိဘုရားအနီးရှိ ဈေးဆိုင်ခန်း မီးလောင်မှုကြောင့် ဆိုင်ထဲတွင် အိပ်နေသည့် ဆိုင်ပိုင်ရှင်၏သား ကိုမောင်သန်းစိုး အသက်၃၉ နှစ်အရွယ် သေဆုံးသွားခဲ့သည်။

ခြောက်သွေ့ရာသီရောက်လာပြီဖြစ်သဖြင့် ပြည်သူများက မီးကိုမပေါ့ဆရန်၊ မီးသတိထားကြရန်လိုအပ်လှသလို သက်ဆိုင်ရာ မီးသတ်ဌာနကလည်း သတိပေးမှုများ အစဉ်မပြတ် ပြုလုပ်ရန် လိုအပ်နေသည်ဟု ဒေသခံများက ပြောဆိုကြသည်။ (NN-12)

(ဓာတ်ပုံ - ဦးမောင်ဘု ပေးပို့)