အဖွဲ့အစည်းပေါင်း ၁၉၅ ဖွဲ့​၏ ထုတ်ပြန်ချက်တွင် အချက်အလက်အချို့ မှားယွင်းနေပြီး မဟုတ်မမှန်သတင်းများ၊အခြေအမြစ်မရှိသော တစ်ဖက်သတ်စွပ်စွဲချက်များနှင့် နိုင်ငံတကာက အထင်အမြင်လွဲနိုင်သည့်အသုံးအနှုန်းများ ဖော်ပြထားသဖြင့် ရက္ခိုင်အမျိုးသားအဖွဲ့ချုပ် ( ULA)က အပြင်းအထန်ကန့်ကွက်ကြောင်း ထုတ်ပြန်

အိမ်စိုးဖြူ

နိရဉ္စရာ၊ မေ ၂၅/ ၂ဝ၂၄

အာရက္ခတပ်တော် (AA) နှင့် ပတ်သက်၍ အခြေအမြစ်မရှိ၊ မှားယွင်းစွာထုတ်ပြန်ချက်ထုတ်ထားသည့် အဖွဲ့အစည်း ၁၉၅ ဖွဲ့၏ ထုတ်ပြန်ချက်ကို ကန့်ကွက်ကြောင်း နှင့် အချို့ အသင်းအဖွဲ့များမှာ သဘောထားဆန္ဒမပါဘဲ ထည့်သွင်းခံရသည့် အဖွဲ့အစည်းများရှိပါက ရှင်းလင်းပေးကြရန် AA က ထုတ်ပြန်လိုက်သည်။

ရခိုင်ပြည် ဘူးသီးတောင်မြို့နယ်နှင့်ပတ်သက်၍ အဆိုပါ ၁၉၅ ဖွဲ့၏ ထုတ်ပြန်ချက်တွင် ULA/AA ကို “ ရိုဟင်ဂျာများအပေါ် ဥပဒေမဲ့ သတ်ဖြတ်ခြင်း၊ ဖမ်းဆီးခြင်းများမပြုလုပ်ပါဟု ထုတ်ပြန်ထားသောလည်းလက်ရှိမြေပြင်တွင် တပ်တော် လက်အောက်ခံ စစ်သားများက ကျူးလွန်နေသည်ဟု စွပ်စွဲခံထားရသော ကိစ္စများရှိနေသည်” စသည့် စွပ်စွဲချက်ပါ ထုတ်ပြန်ချက်ကို မေလ ၂၂ ရက်နေ့က အဖွဲ့အစည်း၁၉၅ဖွဲ့  အမည်ဖြင့်ထုတ်ပြန်ခဲ့သည်။ 

ယင်းနောက်တွင် အဖွဲ့အစည်းတချို့က ၎င်းတို့၏ ဆန္ဒမပါဘဲ ထုတ်ပြန်ထားသည့်အတွက် ပုဂ္ဂိုလ်ရေးနုတ်ထွက်ခြင်း၊ အသင်းအဖွဲ့အလိုက်နုတ်ထွက်ခြင်းများနှင့် ULA/AA ထံ အကြောင်းကြားခြင်းများပြုလုပ်ခဲ့ကြောင်း သိရသည်။

GSC အဖွဲ့ဝင်တစ်ဦးဖြစ်သူ ဦးကျော်ကိုကိုကလည်း ၎င်း၏ လူမှု့ကွန်ရက်ကတဆင့် အဆိုပါ ထုတ်ပြန်ချက်တွင် GSC ၏ ပါဝင်မှုအတွက် ပါတီဝင်များက ပါဝင်ရန်ဆွေးနွေးငြင်းဆိုခဲ့ကြပြီး အဆင်သင့်မဖြစ်သေးချိန်တွင် ထုတ်ပြန်ချက်တွင် ပါဝင်ခဲ့သဖြင့် GSC ကြေညာချက်တွင် ပါဝင်မှုကို ထုတ်ပယ်ရန် တောင်းဆိုထားသည်ကိုတွေ့ရသည်။

ရခိုင်ပြည်လုံးဆိုင်ရာကျောင်းသားနှင့် လူငယ်များအစည်းအရုံး(AASYC) ကလည်း အဆိုပါ ထုတ်ပြန်ချက်နှင့်ပတ်သက်၍ GSC နှင့် မိတ်ဖက်အဖြစ်မှ ယာယီ ရပ်နားလိုက်သည်ကို တွေ့ရသည်။

မေလ ၂၅ ရက်နေ့ နံနက်ပိုင်းတွင် ရန်ကုန်အခြေစိုက်တက္ကသိုလ်ကျောင်းသားများ သမဂ္ဂ(တကသများ- ရန်ကုန်) ကလည်း အဆိုပါ ၁၉၅ ဖွဲ့၏ ထုတ်ပြန်ချက်ပါ အချက်အလက်အချို့မှာ ကွဲလွှဲမှုများ၊ ရှုပ်ထွေးမှုများရှိနေပြီး တိကျခိုင်မာမှုအားနည်းသည်ကိုတွေ့ရသဖြင့် နုတ်ထွက်ကြောင်း ထုတ်ပြန်လာခဲ့သည်။

ရက္ခိုင်အမျိုးသားအဖွဲ့ချုပ်(ULA) က “ အဖွဲ့အစည်းပေါင်း (၁၉၅) ဖွဲ့၏ရက္ခိုင်ပြည်မြောက်ဘက်အခြေအနေများနှင့်ပတ်သက်၍ ပူးတွဲသဘောထား ထုတ်ပြန်ချက်တစ်စောင်ကို ၂၀၂၄ ခုနှစ်၊ မေလ (၂၂) ရက် နေ့စွဲဖြင့်တွေ့ရှိရပါသည်။ ၎င်းထုတ်ပြန်ချက်တွင်ပါရှိသော အချက်အလက်အချို့မှာ မှားယွင်းနေပြီး မြေပြင်ပကတိအချက်အလက်များနှင့် ကွဲလွဲမှုများရှိနေပါသည်။ ထို့အပြင် မဟုတ်မမှန် သတင်းများနှင့်အခြေအမြစ်မရှိသော တစ်ဖက်သတ်စွပ်စွဲချက်များ၊ မိမိတို့အဖွဲ့အစည်းအပေါ် နိုင်ငံတကာမှ အထင်အမြင်လွဲမှားအောင်ပြုလုပ်သော အသုံးအနှုန်းများကိုပါ ထည့်သွင်းရေးသားထားခြင်းများကို ပြင်းထန်စွာကန့်ကွက်ပါသည်။” ဟု ထုတ်ပြန်ချက်တွင် ဖော်ပြထားသည်။