စစ်တွေပွိုင့်ကမ်းခြေတွင် အမည်မသိအလောင်းတစ်လောင်း တွေ့ရှိ

ရေးသူ: Web Master
| ရက်စွဲ: ၂၂ ဒီဇင်ဘာ ၂၀၂၁
| ကြည့်ရှုသူ: 3k

သဥ္ဇာနွယ်

နိရဥ္စရာ၊ ဒီဇင်ဘာ ၂၂ / ၂၀၂၁

ရခိုင်ပြည်နယ်၊ စစ်တွေမြို့ရှိ ပွိုင့်ကမ်းခြေတွင် ယနေ့နံနက်က အမည်မသိ အလောင်းတစ်လောင်း တွေ့ရှိကြောင်း သိရသည်။

ပွိုင့်ကမ်းခြေတွင် အသက် ၅၀ အရွယ်ရှိ အမျိုးသားတစ်ဦးသေဆုံးနေသည်ကို ယနေ့ ဒီဇင်ဘာ ၂၂ ရက် နံနက် ၈ နာရီတွင် တွေ့ရှိခဲ့ခြင်းဖြစ်ပြီး မည်သူမည်ဝါဆိုသည်ကို မသိရသေးကြောင်း ရွှေရောင်မေတ္တာဖောင်ဒေးရှင်းမှ ကိုဇေယျာလင်းက နိရဥ္စရာကိုပြောသည်။

“သေဆုံးသူက ဘယ်သူမှန်းတော့ မသိရသေးဘူး။ ဒဏ်ရာ ဒဏ်ချက်တွေတော့ပါတယ်။ မျက်လုံးတစ်ဖက် မပါဘူး။ နှာခေါင်းက သွေးထွက်နေတယ်”ဟု ပြောသည်။

အဆိုပါအလောင်းအား စစ်တွေဆေးရုံ ရင်ခွဲရုံသို့ပို့ဆောင်ခဲ့သည်ဟုလည်း သိရသည်။

အဆိုပါကိစ္စနှင့်ပက်သက်၍ အမှတ် ၁ ရဲစခန်းအားဆက်သွယ်ရာ ဆက်သွယ်၍မရရှိခဲ့ပါ။

ပြီးခဲ့သည့် အောက်တိုဘာ ၁၄ ရက်ကလည်း ပွိုင့်ကမ်းခြေရှိ စစ်တွေဟိုတယ်အနီးမှ ကွန်ကရစ်တံတားငယ်အနီးတွင် အသက် ၄၀ အရွယ် အမည်မသိအမျိုးသား အလောင်းတစ်လောင်းတွေ့ရှိခဲ့ကြောင်း သိရသည်။

ပြီးခဲ့သည့် စက်တင်ဘာ ၁၁ ရက်ကလည်း ပွိုင့်ကမ်းခြေသွားလမ်း သောင်စပ် ဒီရေတော ခြုံပုတ်တွင် အသက် ၃၀ ကျော်အရွယ် အမည်မသိ အမျိုးသားအလောင်းတစ်လောင်း တွေ့ရှိခဲ့ကြောင်း သိရသည်။