- Web Master
- ၁၇ စက်တင်ဘာ ၂၀၂၄
နိရဉ္စရာ၊ ဖေဖော်ဝါရီ ၉/ ၂၀၂၃
စစ်အုပ်ချုပ်ရေး ကြေညာထားသည့် ချင်းပြည်နယ်၊ ထန်တလန်မြို့က ရဲစခန်းကို CNA- CDF တို့က ယမန့်နေ့ (ဖေဖော်ဝါရီ ၈ ရက်) ညက တိုက်ခိုက်သိမ်းပိုက်ခဲ့ကြောင်း သတင်းရရှိသည်။
အဆိုပါ စခန်းကို ည ၁၀ နာရီခန့်တွင် စတင်တိုက်ခိုက်ပြီး ဖေဖော်ဝါရီလ ၉ ရက်နေ့ မနက် ၁ နာရီ အချိန်၌ အပြီးတိုင် သိမ်းပိုက်ခဲ့ကြောင်း CNA- CDF တပ်ပေါင်းစုများထံမှ သိရှိရသည်။
သိမ်းပိုက်နိုင်ခဲ့သည့် ရဲစခန်းမှ လက်နက်ပေါင်း (၄၀) နှင့် စစ်အသုံးအဆောင်များ၊ ဒရုန်းပစ် လက်နက်၊ လက်ပစ်ဗုံး အစရှိသည် လက်နက်ခဲယမ်းများကို သိမ်းဆည်းရမိသည်ဟုဆိုသည်။
CNA ရဲဘော်တစ်ဦးကျဆုံးခဲ့ ကြောင်း သိရှိရသည်။
“ကျနော်တို့ တပ်ပေါင်းစု ဝင်တိုက်ခဲ့တာဗျ။ ည ၁၀ နာရီလောက်ကဗျ၊ လက်နက်တွေရခဲ့တယ်။ ရဲဘော် ရဲဘက်တစ်ယောက် ကျဆုံးခဲ့တယ်ဗျာ”ဟု CNA ကရဲဘော်တစ်ဦးက ပြောသည်။
စခန်းသိမ်းပိုက်ခံရမှုကြောင့် အကြမ်းဖက်စစ်ကောင်စီလက်အောက်ခံ လေတပ်များမှ လေယာဉ်ဖြင့် လာရောက် ဗုံးကြဲတိုက်ခိုက်မှုများ ၃ ကြိမ်ထက်မနည်းလာရောက်ပြုလုပ်ခဲ့ကြောင်းကိုလည်း ဒေသခံများ ပြောပြချက်အရ သိရှိရသည်။
“စစ်ကောင်စီက လေယာဉ်နဲ့ လာဗုံးကြဲပြီး သူ့လူတွေကို အကူညီလာပေးတာ၊ ဒီမှာက စခန်းတစ်ခုလုံး သိမ်းထားလိုက်ပြီလေ။ သူတို့ ဗုံးကြဲတာက ရမ်းသန်းပစ်တာဆိုတော့ ပြည်သူတွေကိုလည်း စိုးရိမ်နေရ တယ်”ဟု ထန်တလန်ဒေသခံ တစ်ဦးက ပြောသည်။
ထန်ထလန်မြို့ကို စစ်အုပ်ချုပ်ရေး ကျင့်သုံးဒေသအဖြစ် ဖေဖော်ဝါရီလ ၂ ရက်နေ့ က စစ်ကောင်စီ၏ ထုတ်ပြန်သည့် မြို့နယ် ၃၇ မြို့နယ်ထဲ၌ ပါဝင်သည့် မြို့တစ်မြို့ဖြစ်သည်။
၎င်းမြို့ပေါ်ရှိ CB ဘဏ်တွင် တပ်စွဲထားသည့် စစ်ကောင်စီ တပ်ဖွဲ့ဝင်များကိုလည်း ဇန်နဝါရီ ၃၁ ရက်နေ့က CNA- CDF တပ်ပေါင်းစုများ တိုက်ခိုက်ရှင်းလင်းခဲ့ပြီး စစ်ကောင်စီတပ်သား ၆ ဦးနှင့် လက်နက်ခဲယမ်းတွေကို သိမ်းဆည်းရမိခဲ့သေးသည်။
ချင်းပြည်နယ်ထဲထွင် စစ်ကောင်စီ၏ ၂၀၂၃ ခုနှစ် အတွင်း ပထမဆုံး လေကြောင်းအသုံးပြု ဗုံးကြဲတိုက်ခိုက်မှု အနေဖြင့် ချင်းအမျိုးသားတပ်ဦး ဌာနချုပ် တည်ရှိရာ ဝီတိုရိယ စခန်းကို ဇန်နဝါရီ ၁၀ ရက်၊ ၁၁ ရက် နေ့များတွင် ပြုလုပ်ခဲ့ပြီး ချင်းအမျိုးသားတပ်ဦး CNF မှ ရဲဘော် ၅ ဦး ကျဆုံးခဲ့ကြောင်း သိရှိရသည်။
လက်ရှိတွင် စစ်ကောင်စီ၏ စစ်အုပ်ချုပ်ရေး သတ်မှတ်ကြေညာထားသည့် မြို့နယ် ၃၇ မြို့ထဲတွင် တော်လှန်ရေး အင်အားစုများက တိုက်ခိုက်ရေး အရှိန်မြင့်လုပ်ဆောင်နေသည်ဟု သိရှိရသည်။ (NN – 25)
ပုံစာ - ထန်တလန် ရဲစခန်းမှ သိမ်းပိုက်ရရှိသည့် လက်နက်ခဲယမ်းများနှင့် ကျဆုံး CNA ရဲဘော်တစ်ဦး