ဘင်္ဂလားဒေ့ရှ်ပြန်တစ်ဦးတွင်ကိုဗစ်ထပ်တွေ့၊ စစ်တွေတွင်ကိုဗစ်လူနာ စုစုပေါင်း ၆ ဦးအထိရှိလာ

ထွန်းခိုင် (တောင်ရင်းကျွန်း)

နိရဉ္စရာ၊ မေ ၁၉ / ၂၀၂၁

ဘင်္ဂလားဒေ့ရှ်နှင့် နယ်စပ်ကုန်သွယ်မှုပြုလုပ်ပြီး စစ်တွေသို့  ပြန်လာသူများအား ကိုဗစ်-၁၉ စစ်ဆေးမှုများပြုလုပ်လျက်ရှိတွင် ယမန်နေ့က ကိုဗစ်-၁၉ ရှိသူတစ်ဦးကို မံထပ်တွေ့ရှိခဲ့သည်ဟု စစ်တွေဆေးရုံအုပ် ဒေါက်တာ ကြည်လွင်က ပြောသည်။

“ ကျနော်တို့က ဘင်္ဂလားဒေ့ရှ်က ပြန်လာတဲ့သူတွေကို ကျနော်တို့ ပုံမှန်စစ်နေပါတယ်။ ပြန်လာတဲ့ လှေသမားတွေကို ကျနော်တို့ ပုံမှန်စစ်ပေးရတယ်။ အဲဒီမှာ မနေ့ ညနေက တစ်ယောက်ထပ်တွေ့တာပါ။”ဟုပြောသည်။

လက်ရှိအချိန်ထိ ကိုဗစ်-၁၉ တွေ့ရှိသည့် ဘင်္ဂလားဒေ့ရှ်မှ ပြန်လာသူ ၆ ဦး၏ ကျန်းမာရေးအခြေအနေမှာ ကောင်းမွန်လျက်ရှိပြီး ၄င်းလူနာများအား စစ်တွေဆေးရုံတွင် ၁၁ ရက် စောင့်ကြည့် ကုသသွားမည်ဟု  သူကဆက်ပြောသည်။

“ ကျန်းမာရေးအခြေအနေကောင်းပါတယ်။ ဆေးရုံကတော့ မဆင်းရသေးဘူး။ ပုံမှန်ကတော့ ကိုဗစ်စတွေ့တဲ့နေကနေ ၁၁ ရက်ထားမှာပါ။ ဆေးရုံကဆင်းသွားလို့ရှိရင် အိမ်မှာ တစ်ပတ်နေရမယ်။” ဟုပြောသည်။

ဘင်္ဂလားဒေ့ရှ်နိုင်ငံမှ ပြန်လာသူများအား ကိုဗစ်ပိုးနှစ်ကြိမ်စစ်ဆေးမှု ပြုလုပ်ကာ ကွာရန်တင်း ၁၀ ရက်ထားရှိသည်ဟု ရခိုင်ပြည်နယ်၊ ပြည်သူ့ကျန်းမာရေး လက်ထောက်ညွှန်ကြားရေးမှူး ဒေါက်တာစိုးဝင်းပိုင်က ပြောသည်။

 “ သူတို့ကို နှစ်ခါစစ်ပြီးလို့ ရှိရင်။ နှစ်ခါစစ်ပြီးလို့ ပိုးမတွေ့ဘူးဆိုရင်။ ၁၀ ရက်ပြည့်ရင် ကွာရန်တင်းက ထွက်လို့ရပြီ” ဟုပြောသည်။

ရခိုင်တွင် ဘင်္ဂလားဒေ့ရှ်နိုင်ငံမှ ကုန်သွယ်ရေးပြုလုပ်ပြီး ပြန်လာသူများအား ကိုဗစ်ပိုး စစ်ဆေးလျက်ရှိရာ မေလ ၁၂ ရက်နေ့က သင်္ဘောသား ၄ ဦး၊ မေလ ၁၄ ရက်နေ့က  သင်္ဘောသား ၁ ဦး တွေ့ရှိပြီး မနေ့က တစ်ဦးနှင့် ဆိုလျှင်  လက်ရှိအချိန်တွင် ကိုဗစ်လူနာ ၆ ဦးရှိကြောင်း သိရှိရသည်။

ရခိုင်တွင် ဖြစ်ပွားချိန်မှ စပြီး ယခုနှစ် ဖေဖော်ဝါရီလ ၂ ရက်နေ့အထိ ကိုဗစ်-၁၉ ကြောင့် လူပေါင်း ၃၇ ဦးသေဆုံးသွားပြီး ၄၂၆၄ ဦး ရောဂါကူးစက်ခံခဲ့ရသည်။