မောင်တောတွင် ALP တပ်ဖွဲ့ဝင် ၂ ဦးနှင့် အရပ်သား ၂ ဦးကို AA က ဖမ်းဆီးသွားဟု သတင်းများထွက်ပေါ်နေ

ရခိုင်ပြည်နယ်၊မောင်တောမြို့နယ်တွင် ဒေါ်စောမြရာဇာလင်း ဦးဆောင်သည့် ရခိုင်ပြည်လွတ်မြောက်ရေးပါတီ(ALP)အဖွဲ့ကွဲမှ တပ်ဖွဲ့ဝင်၂ဦးနှင့် အရပ်သား၂ဦးကို ရက္ခိုင့်တပ်တော်(AA)ကဖမ်းဆီးသွားသည်ဟုသတင်းများထွက်ပေါ်နေကြောင်းဒေသခံများကပြောသည်။

ဖမ်းဆီးခံရသည့် ALP တပ်ဖွဲ့ဝင် ၂ ဦးမှာ မောင်တောမြို့မှ ALP ၏ စီးပွားရေးတာဝန်ခံ အာရ်ဂျေ ကေတီဗီပိုင်ရှင် ဦးမောင်သိန်းဦး၏သား ကိုချစ်မင်းနှင့် ဘင်္ဂလားဒေ့ရှ်သို့ နွားပို့နေသည့် တပ်ဖွဲ့ဝင် တစ်ဦးတို့ဖြစ်သည်ဟု သိရသည်။

သူတို့နှင့်အတူ ဖမ်းဆီးခံထားရသည့် အရပ်သား ၂ ဦးမှာ မောင်တောမြို့မှ ကိုသန်းလှိုင် (ခေါ်)မောင်ရွှေဘုနှင့် ကိုခင်မောင်ထွန်းတို့ဖြစ်သည်ဟုလည်း သိရသည်။

သူတို့သည် ပြီးခဲ့သည့် ဇူလိုင်လ ၂ ရက်တွင် မောင်တောမြို့နယ်အတွင်းရှိ မြောင်တစ်ခုသို့ ပျော်ပွဲစားသွားရာ ၄ လမ်းခုလတ်၌ ဖမ်းဆီးခံခဲ့ရခြင်း ဖြစ်သည်ဟု သတင်းများ ထွက်ပေါ်လျက်ရှိကြောင်း ဌာနဆိုင်ရာ ဝန်ထမ်းတစ်ဦးက နိရဥ္စရာကို ပြောသည်။

“ဘာကြောင့် ဖမ်းလဲတော့ မသိဘူး။ AA က ဖမ်းသွားတယ်လို့ပဲကြားပါတယ်။ ALP က နှစ်ယောက်၊ အရပ်ဘက်က နှစ်ယောက်လို့ ပြောကြတယ်။ အရပ်ဘက်ကနှစ်ယောက်ကိုတော့ လွှတ်ပေးလိုက်မယ်ဆိုပြီးတော့လည်း ကြားပါတယ်”ဟု ပြောသည်။

ယခုကိစ္စနှင့်ပတ်သက်ပြီး ALP ၏ အတွင်းရေးမှူး ဗိုလ်မှူးခိုင်သူရိန်ကို နိရဥ္စရာက ယနေ့ညနေတွင် ဆက်သွယ်ခဲ့သော်လည်း ဖုန်းလက်ခံ ဖြေဆိုခြင်းမရှိခဲ့ပါ။

အလားတူ AA ၏ ပြောခွင့်ရသူ ဦးခိုင်သုခအား နိရဥ္စရာက ဆက်သွယ်မေးမြန်းထားသော်လည်း အကြောင်းပြန်ကြားမှုမရှိသေးပါ။

ယင်းကြောင့် သူတို့ ၄ ဦးအား  ရက္ခိုင့်တပ်တော်က  ဖမ်းဆီးသွားသည်ဟု သတင်းထွက်ပေါ်နေသော်လည်း နိရဥ္စရာအနေဖြင့် လက်ရှိအချိန်ထိ သီးခြားအတည်မပြုနိုင်သေးပါ။

ပြီးခဲ့သည့် ဇူလိုင်လ ၁ ရက်က စစ်တွေမြို့တွင် ALP ခေါင်းဆောင် ၃ ဦး လုပ်ကြံ သတ်ဖြတ်ခံရပြီးနောက် နောက်တစ်နေ့တွင် သူတို့ ဖမ်းဆီးခံခဲ့ရခြင်းဖြစ်သည်။

သူတို့ဖမ်းဆီးခံရပြီးနောက် မောင်တောမြို့ရှိ အာရ်ဂျေ ကေတီဗီအပါအဝင် အခြားကေတီဗီများနှင့် စားသောက်ဆိုင်များကိုလည်း စစ်ကောင်စီက ညအချိန် ဝင်ရောက်စစ်ဆေးခြင်းများရှိနေသည်ဟု မြို့ခံများက ပြောသည်။

ယင်းအပြင် ပြီးခဲ့သည့် ဇူလိုင်လ ၃ ရက်၊ ညအချိန်က မောင်တောမြို့နယ်ရှိ နခခ(၇)လက်အောက်ခံ နယ်မြေ(၅) နယ်ခြားစောင့်ရဲစခန်းမှ နယ်ခြားစောင့်ရဲအရာရှိ ၃ ဦးထွက်ပြေးသွားသည့် ကိစ္စကြောင့်လည်း မောင်တောမြို့ အဝင်အထွက်နေရာများတွင် လုံခြုံရေးတင်းကျပ်လျက်ရှိပြီး စစ်ဆေးမှုများလည်း တင်းကျပ်လျက်ရှိသည်ဟု မြို့ခံများက ပြောသည်။ (NN-16)

ဓာတ်ပုံ - ALP တပ်ဖွဲ့ဝင်အချို့အား တွေ့ရစဉ်။