နေအိမ်များကို စွန့်ခွာခဲ့ရသည့် မောင်တောမြို့နယ် ကြောင်နဖေ(မြို)ကျေးရွာသားများ အရေးပေါ်အကူအညီများလိုအပ်နေ

ဒေသခံတစ်ဦးက " ချက်ချင်းကြီး ဘေးလွှတ်ရာကိုပြေးလာကြတော့ အဝတ်တစ်ထည်ကိုယ်တစ်ခုနဲ့ ပြေးလာကြတဲ့သူတွေများတယ်။ စားဝတ်နေရေးက အခက်အခဲဖြစ်နေတာ။ ဘာတစ်ခုမှ မယူခဲ့ရတော့ မီးထဲအကုန်ပါသွားတယ်။ ကျွန်တော်တို့ တတ်နိုင်သလောက် စားသောက်ဖို့ ကူညီပေးခဲ့တယ် " ဟုပြောသည်။

ရွာသားများမှာ လက်နက်ကြီးပစ်ခတ်မှုကြောင့်  ဘေးလွှတ်ရာကိုတိမ်းရှောင်နေခဲ့ရသည့် အတွက်ကြောင့် မီးကိုငြိမ်းသတ်မည့်သူမရှိသဖြင့် တစ်အိမ်ပြီးတစ်အိမ် ကူးကာ လောင်ကျွမ်းသွားခဲ့သည်ဟု ဆိုသည်။

" မီးလောင်နေတဲ့အချိန် ဘယ်သူမှမရှိတော့ မီးငြိမ်းမဲ့သူလည်းမရှိဘူး။ အိမ်တွေ အကုန်ပြာကျမှပဲငြိမ်းသွားတယ်။ အဲ့ဒီအချိန် ည ၁၀ နာရီလောက်ရှိမယ်။ ကျန်ခဲ့တဲ့အိမ်တွေကလည်း အစွန့်အဖျားက အိမ်တွေလောက်ပဲကျန်ခဲ့တာ။ ပြီးရင် နွားရုံတွေ အားလုံးပေါင်း ၁၇ ဆောင်လောက်ပဲကျန်တယ် " ဟုပြောသည်။

၎င်းရွာသားများမှာ ဘေးလွှတ်ရာတွင်ခိုလုံနေကြသော်လည်း  လက်ရှိတွင်စားဝတ်နေရေး အခက်အခဲ အလွန်တရာရှိနေကြောင်းသိရသည်။

ခမောင်းဆိပ်ဗျူဟာကုန်းသည် အဆိုပါရွာအနောက်တောင်ဘက်၏ ၃ မိုင်ခန့်အကွာအဝေးတွင် တည်ရှိပြီး လက်နက်ကြီးမပစ်မီ နေ့လယ် ၁၁ နာရီကျော်ခန့်က ကြောင်နဖေရဲကင်းစခန်းနှင့် ရက္ခိုင့်တပ်တော် (AA) တို့ နာရီဝက်ခန့် အပြန်အလှန်ပစ်ခတ်မှုဖြစ်ပွားခဲ့သည်ဟုလည်း ဒေသခံများကပြောသည်။

ကြောင်နဖေရွာတွင် ရွာသားများသည် တောင်ယာအလုပ်နှင့် လယ်ယာ အလုပ်ကို အဓိကထားလုပ်ကိုင်စားသောက်ကြကြောင်း သိရသည်။

ယင်းရွာတွင် အိမ်ခြေ ၅၀ ခန့်ရှိသည့်အနက် ၃၀ ကျော်ခန့်မီးထဲပါသွားပြီး လက်ရှိတွင် လူဦးရေ ၂၀၀ ကျော်ခန့်မှာ စားဝတ်နေရေးအတွက် အခက်အခဲရှိနေကြောင်း ဒေသခံများကပြောသည်။

ခမောင်းဆိပ်ဗျူဟာကုန်းမှ လက်နက်ကြီးများယမန်နေ့  ဒီဇင်ဘာလ ၂၄ရက် နေ့လယ် ၂နာရီကျော်အချိန်ထိ ပစ်ခတ်နေကြောင်း ဒေသခံများကပြောသည်။(NN-13)

ဓာတ်ပုံ- ထွက်ပြေးလာကြရသည့် ကြောင်နဖေရွာသားများနှင့် မီးလောင်ပြာကျသွားသည့် မြင်ကွင်း