ကုလားတန်မြစ်ရေမြင့်တက်မှုကြောင့် ကျောက်တော်မြို့နယ် ကျေးရွာအများအပြားရေနစ်မြုပ်နေ (ဓာတ်ပုံသတင်း)

မိုးအဆက်မပြတ်ရွာသွန်းမှုကြောင့် ကျောက်တော်မြို့နယ်မှ ကုလားတန်မြစ်ကမ်း တစ်ဖက်တစ်ချက်ရှိ ကျေးရွာအများအပြား ရေနစ်မြုပ်နေသည်ဟု သိရသည်။

၎င်းကျေးရွာများမှာ ကုလားတန်မြစ်လက်တက်၊ ယိုးချောင်းအတွင်းရှိ ဝါးတောင်၊ ပန်းဖဲချောင်း၊ ကန်စောက်၊ ခမောင်းတော၊ မီးရပ်ပြင်၊ ချောင်းတူစသည့် ကျေးရွာများနှင့် မဟာမုနိဘုရားအနီးရှိ  သရက်တပင်၊ ညောင်ချောင်း၊ ကျောက်တလုံး၊ စပါးဆိပ်စသည့် ကျေးရွာများမှာလည်း သရီချောင်းရေတိုးလာသဖြင့် ရေကြီးနေခြင်းဖြစ်သည်။

ရခိုင်တွင် ပြီးခဲ့သည့် သြဂုတ်လ ၁ ရက်မှစတင်ကာ သြဂုတ်လ ၈ ရက်အထိ မိုးသည်းထန်စွာရွာသွန်းပြီး ကုလားတန်မြစ်ရေတိုးလာသဖြင့် ကျောက်တော်မြို့နယ်တွင် ရေကြီးနေခြင်းဖြစ်သည်ဟု ဒေသခံများက ပြောသည်။

ရေနစ်မြုပ်နေသည့် ကျေးရွာသားများမှာလည်း ဘေးလွတ်ရာသို့ပြောင်းရွေ့နေထိုင်ရကာ စားနပ်ရိက္ခာ၊ အဝတ်အထည်များနှင့် ကူညီကယ်ဆယ်ရေးများ အရေးပေါ်လိုအပ်လျက်ရှိသည်ဟု သိရသည်။

ယနေ့ညနေတွင်လည်း မိုးရွာသွန်းနေပြီး ညဉ့်အချိန် ရေထပ်တိုးလာနိုင်ခြေရှိသည်ဟုလည်း ဒေသခံများက ပြောသည်။

ကုလားတန်မြစ်ရေသည် ၂၄ နာရီအတွင်း စိုးရိမ်ရေမှတ်သို့ရောက်ရှိနိုင်သည်ဟုလည်း မိုးလေဝသနှင့် ဇလဗေဒညွှန်ကြားမှုဦးစီးဌာနက သြဂုတ်လ ၈ ရက်၊ နံနက်တွင်ထုတ်ပြန်ထားသည်။

ဓာတ်ပုံ - သြဂုတ်လ ၈ ရက်တွင် နိရဥ္စရာကသွားရောက်ရိုက်ကူးထားသည်ကို တွေ့ရစဉ်။