ပုဏ္ဏားကျွန်း ရဲရိုးပြင်ရွာကို စစ်ကောင်စီက မီးရှို့ပြီးနောက် ခမောင်းတောရွာကိုလည်း ထပ်မံမီးရှို့

(ရေတပ်စစ်ရေယာဉ်က လက်နက်ကြီးများဖြင့်အဆက်မပြတ်ပစ်ခတ်ပြီး ကျေးရွာတွင်းကို စစ်တပ်က ဝင်ရောက်မီးရှို့ဖျက်ဆီး)

ယင်းအနီးအနားရှိ ဒေသခံတစ်ဦးက "ခမောင်းတောရွာကိုလည်း သူတို့(စစ်သား)တွေ မီးရှို့လိုက်ပါပြီ။ ဒေသခံတွေ အထိအခိုက်ရှိမရှိကိုတော့ မသိရသေးဘူး။ ရွာသားတွေကတော့ ထွက်ပြေးနေကြတယ်" ဟုပြောသည်။

နောက်ထပ်ဒေသခံတစ်ဦးက "စစ်တပ်က မီးရှို့တာပါ။ ဘာတိုက်ပွဲတစ်စုံတစ်ရာမရှိဘဲ လာလို့ မီးရှို့တာပါ။ ၄ နာရီခွဲ လောက်ကပါ။ ရဲရိုးပြင်ကို အရင်ရှို့တယ်။ ပြီးရင် ခမောင်းတောကိုရှို့တာ။ တစ်ခုမှ မကျန်တော့ဘူး။ အားလုံးကို ရှို့နေတာ။အောက်က နေဗီကပစ်တယ်။ ကုန်းကြောင်း စစ်သားတွေက ရွာကိုဝင်ပြီးတော့လည်း ရှို့တယ်" ဟု ပြောသည်။

 အဆိုပါ ခမောင်းတောကျေးရွာသို့ စစ်ကောင်စီတပ်သားများ ဝင်ရောက်မီးမရှို့မီ ယင်းကျေးရွာအနီးရှိ ရဲရိုးပြင် ကျေးရွာကိုလည်း စစ်ကောင်စီတပ်သား အင်အား ၁၀၀ ခန့်က ယနေ့ နေ့လယ် ၂ နာရီခန့်တွင် ပထမ ဝင်ရောက်မီးရှို့ခဲ့သည်။

အဆိုပါ ပုဏ္ဏားကျွန်းမြို့နယ်ရှိ စစ်တပ်ကမီးရှို့လိုက်သော ကျေးရွာနှစ်ရွာသည် စစ်တွေမြို့နယ်၊ ရွှေမင်းဂံဆိပ်ကမ်းနှင့် တစ်ဖက် တစ်ကမ်းတွင်ရှိသော ကျေးရွာများဖြစ်သည်။

ယနေ့နေ့လယ် နှစ်နာရီခွဲကျော်ခန့်က ရွှေမင်းဂံ ရေတပ်စခန်းမှ ဇက်ရေယာဉ်ဖြင့် စစ်ကောင်စီတပ်သားများက ရောက်ရှိကာ ကျေးရွာနှစ်ရွာကို ဝင်ရောက်မီးရှို့ခဲ့ခြင်းဖြစ်သည်ဟု သိရသည်။

ပထမတွင် ရဲရိုးပြင်ကျေးရွာသို့ သေနတ်ပစ်ဖောက်ဝင်ရောက် မီးရှို့ပြီး ခမောင်းတောကျေးရွာသို့ ကုန်းကြောင်းဖြင့် ဆက်လက်ထွက်ခွာခဲ့ကာ ယင်းကျေးရွာသို့ ထပ်မံဝင်ရောက်မီးရှို့ဖျက်ဆီးခဲ့ခြင်း ဖြစ်သည်။

လက်ရှိတွင် အဆိုပါရွာနှစ်ရွာမှ ဒေသခံများမှာ ဘေးလွတ်ရာသို့ ထွက်ပြေးနေကြရကြောင်း သိရသည်။ ညနေ ၅ နာရီခန့်တွင်လည်း စစ်တွေမြို့နယ်၊ ရွှေမင်းဂံ ရေတပ်စခန်းမှ လက်နက်ကြီးများဖြင့် အဆိုပါကျေးရွာများဘက်သို့ ပစ်ခတ်နေကြောင်း စစ်တွေမြို့ခံများက ပြောသည်။

အဆိုပါကျေးရွာများမှ ဒေသခံ တချို့ထက်ဝက်မှာ ပြီးခဲ့သည့် နိုဝင်ဘာ ၂၆ ရက်နှင့် ၂၇ ရက်ကတည်းက ကျေးရွာမှ ထွက်ပြေးသွားခဲ့ကြခြင်းဖြစ်ပြီး ရွာထဲတွင် ဒေသခံအနည်းအကျဉ်းသာ ကျန်ရှိခဲ့ကြောင်း သိရသည်။ ထို့အပြင် ယမန်နေ့ ဒီဇင်ဘာ ၂ ရက်ကလည်း စစ်တွေမြို့နယ်၊ ရွှေမင်းဂံရေတပ်စခန်းက ပစ်ခတ်သည့် လက်နက်ကြီးကျည်များသည် ၎င်းရွာသို့ကျရောက်ခဲ့သော်လည်း အထိအခိုက် တစ်စုံတစ်ရာမရှိခဲ့ကြောင်း ရွာသားများကပြောသည်။

 ပြီးခဲ့သည့် နိုဝင်ဘာ ၂၆ ရက်၊ နေ့လယ် ၃ နာရီခန့်တွင်လည်း စစ်ကောင်စီတပ်က ဒရုန်းနှင့် ပစ်ခတ်ပြီးနောက် ရွာသားတစ်ဦး ဒဏ်ရာရရှိခဲ့သည်။

နိုဝင်ဘာ ၂၇ ရက်၊ ညဉ့် ၂ နာရီခန့်တွင်လည်း စစ်ကောင်စီတပ်က ဒရုန်းနှင့်ပစ်ခတ်ခဲ့သည့်အတွက် ရဲရိုးပြင် ဘုန်းကြီးကျောင်း မီးလောင်ပြာကျဖြစ်ခဲ့ရသည်။

 ယခုကဲ့သို့ စစ်ကောင်စီမှ လက်နက်ကြီးအပါအဝင် ဒရုန်းနှင့်ပါ ပစ်ခတ်မှုကြောင့် ရဲရိုးပြင်အနီးတဝိုက်မှ ကျေးရွာများဖြစ်ကြသည့် အောင်မြေကုန်း၊ ‌အောင်ဇေယျ၊ ခမောင်းတော၊ ရဲရိုးပြင်၊ ဆားတောင်ပုတ်၊ ကန်ချောင်းစသည့်ကျေးရွာများမှ ဒေသခံများမှာလည်း ဘေးလွတ်ရာသို့ ထွက်ပြေးနေကြရသည်ဟု သိရသည်။ (NN-8/13) ဓာတ်ပုံ- ပေးပို့