ကိုရိုနာဗိုင်းရပ်စ်ရောဂါအတွက် Pfizer သောက်ဆေးကို အိမ်သုံးဆေးဝါးအဖြစ် အမေရိကန်အတည်ပြု

နိရဉ္စရာ၊ ဒီဇင်ဘာ-၂၃/၂၀၂၁ (Htay Oung - နိုင်ငံတကာ)

ကိုရိုနာဗိုင်းရပ်စ်ရောဂါအတွက် Pfizer သောက်ဆေးကို အိမ်သုံးဆေးဝါးအဖြစ် အမေရိကန်အတည်ပြုလိုက်ပြီ ဖြစ်ပြီး ၎င်းဆေးမှာ   ပြင်းထန်ဖျားနာခြင်း၊ ဆေးရုံတက်ရခြင်းနှင့် COVID လူနာများ သေဆုံးခြင်းကို ၉၀% ကာကွယ်နိုင်ကြောင်း တွေ့ရှိရသည်ဟုဆိုသည်။ ယင်းအပြင် အိုမက်ခရွန်ဗီဇပြောင်းပိုးအား တိုက်ဖျက်ရာတွင် အရေးပါနိုင်သည်ဟုလည်း Pfizer Inc က ဗုဒ္ဓဟူးနေ့တွင် ပြောဆိုသည်ဟု Reuters က ယနေ့ နေ့စွဲဖြင့် သတင်းရေးသား ဖော်ပြသည်။

“ မိမိတို့ ကုမ္ပဏီမှ ထုတ်လုပ်သည့် Covid-19 ရောဂါကုသရေး ဆေးပြားကို အမေရိကန် အစားအသောက်နှင့် ဆေးဝါးကွပ်ကဲမှုအဖွဲ့ FDA က တရားဝင်ခွင့်ပြုလိုက်ပြီး အိုမက်ခရွန် ဗီဇပြောင်း ကိုရိုနာဗိုင်းရပ်စ်မျိုးကွဲကို တိုက်ဖျက်ရာ၌ ပထမဆုံး အိမ်သုံးဆေးဝါးဖြစ်လာရန် မျှော်လင့်ကြောင်း”  Pfizer Inc က ဗုဒ္ဓဟူးနေ့တွင် ပြောဆိုသည်ဟု Reuters က သတင်းဖော်ပြသည်။

Pfizer ၏ လက်တွေ့စမ်းသပ်ချက်များအရ အဆိုပါ ဗိုင်းရပ်စ်ပိုးသတ်ဆေးသည် ဆေးရုံတက်ရခြင်း၊ အသက်အန္တရာယ်ဖြစ်ပွားနိုင်သည်အထိ ပြင်းထန်စွာဖျားနာခြင်းနှင့် COVID ရောဂါဖြင့် လူနာများ သေဆုံးရခြင်းတွင် ၉၀% ကာကွယ်နိုင်သည်ကို တွေ့ရှိခဲ့ရကြောင်း၊ မကြာသေးမီက ကောက်ယူရရှိခဲ့သည့် ဓာတ်ခွဲခန်း အချက်အလက် များတွင် အဆိုပါဆေးဝါးမှာ အိုမက်ခရွန်ဗီဇပြောင်းမျိုးကွဲကို ထိရောက်စွာ ထိန်းချုပ် ထားနိုင်ကြောင်း ပြသလျှက်ရှိသည် ဆို၏။

အသက် ၁၂-နှစ်နှင့် အထက် ကလေးအရွယ်လူနာများတွင် ပြင်းထန်ခြင်းမရှိသည့် သာမန် ကိုရိုနာဗိုင်းရပ်စ်ရောဂါမှ ပြင်းထန်အန္တရာယ်အလားအလာရှိ အလယ်အလတ် အဆင့် ရောဂါအထိ ကုသရာတွင် အရေးပေါ် အသုံးပြုရန်အတွက် ပါးစပ်မှ သောက်မြိုရသည့် ဆေးအဖြစ် တရားဝင်ခွင့်ပြုချက် ရရှိထားပြီဖြစ်ကြောင်း အေဂျင်စီက ရှင်းပြသည်။

ကပ်ရောဂါကာလအတွင်း အရေးကြီးသည့်အချိန်၌ Covid-19 ကို တိုက်ဖျက်ရန် ပစ္စည်းအမယ်သစ်တစ်ခုအဖြစ် အထောက်အပံ့ဖြစ်စေပြီး ဗီဇပြောင်းမျိုးကွဲ အသစ်များကြောင့် ပြင်းထန် Covid-19 ရောဂါဖြစ်ပွားနိုင်ခြေ မြင့်မားသည့် လူနာများ အတွက် ကုသရာ၌ အခွင့်အလမ်းပိုမိုရရှိနိုင်စေမည်ဖြစ်ကြောင်း FDA ဆေးဝါးအကဲ ဖြတ်ရေးနှင့် သုတေသနဗဟိုဌာန ညွှန်ကြားရေးမှူး၏ ခွင့်ပြုချက်တွင် ဖော်ပြထားကြောင်း သိရှိရသည်။

အဆိုပါဆေးပြားများကို ဆရာဝန်ညွှန်း ဆေးစာဖြင့်သာရရှိနိုင်ပြီး Covid-19 ရောဂါပိုး ကူးစက်ခံရကြောင်း ရောဂါလက္ခဏာများ စတင်ပြသချိန်မှ ၅-ရက်အတွင်း အမြန်ဆုံး သောက်သုံးသင့်ကြောင်း အေဂျင်စီက တိုက်တွန်းသည်။

၄င်းဆေးဝါးများကို အမေရိကန်ပြည်တွင်းသို့ ချက်ချင်း ပေးပို့ရန် ကုမ္ပဏီအနေဖြင့် အသင့်ရှိနေပြီး ၂၀၂၂- ခုနှစ်တွင် ဆေးပတ်အကြိမ် သန်း ၈၀ မှ သန်း ၁၂၀ အထိ ကုသရန်အတွက် ဆေးပြားများကို တိုးမြှင့်ထုတ်လုပ်မည် ကြောင်း၊ Pfizer ဆေးပတ် တစ်ကြိမ်လျှင် ကန်ဒေါ်လာ ၅၃၀ ဖြင့် ဆေးပတ်ကြိမ််ရေ ၁၀-သန်း အတွက် အမေရိကန် အစိုးရနှင့် ကန်ထရိုက်စာချုပ် ချုပ်ဆိုထားပြီးဖြစ်သည်။

Paxlovid အမှတ်တံဆိပ်ဖြင့် Pfizer ၏ သောက်ဆေးများကို ယခင် ဗိုင်းရပ်စ် သတ်ဆေးဖြစ်သည့် Ritonavir နှင့်အတူ ရောင်းချမည်ဖြစ်ပြီး၊ ရောဂါလက္ခဏာများ စတင်ပြီးနောက် ၁ ရက်လျှင် ၁၂ နာရီခြား ၅ ရက်ကြာ သောက်သုံးရန် ဆေးညွှန်း၌ ဖော်ပြသည်။

Ritonavir သည် အခြားဆေးဝါးများနည်းတူ အကျိုးသက်ရောက်မှုရှိသည်ကို တွေ့ရှိထားပြီး Covid-19 ရောဂါကုသနေစဉ်အတွင်း လူနာအများစုအနေဖြင့် ၎င်းတို့၏အခြားဆေးဝါးများကို လျှော့ချနိုင်ဖွယ်ရှိကြောင်း Pfizer က အကြံပြုထားသည်။

FDA မှပြန်လည်သုံးသပ်နေသည့် ပြိုင်ဘက် Merck & Co ထုတ် #Molnupiravir သောက်ဆေးပြားသည် Pfizer ၏ ကုသမှုနှင့် နှိုင်းယှဉ်ပါက အနည်းငယ်လျှော့ပါးကြောင်း သိရှိရပြီး ၄င်းဆေးဝါးမှာ လက်တွေ့စမ်းသပ်မှုတွင် အသက်အန္တရာယ်မြင့်မားသောလူနာများ၌ ဆေးရုံတက်ကုသခြင်းနှင့် သေဆုံးဂခြင်းများ၌ ၃၀% ခန့် လျှော့ချပေးသည်။

(Reuters.,23 December 2021,” Pfizer oral Covid-19 pill gets US authorization for at home use” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)