အိန္ဒိယမှဝင်ရောက်လာသူ ၃ ဦးတွင် အိုမီခရွန်ပိုးတွေ့ရှိ၊ မြန်မာတွင် အိုမီခရွန်ပိုးတွေ့သူ ၁၉ ဦးအထိရှိလာ

ရေးသူ: Web Master
| ရက်စွဲ: ၁၁ ဇန်နဝါရီ ၂၀၂၂
| ကြည့်ရှုသူ: 6.8k

မြထွီးသျှင်

နိရဉ်စရာ၊ ဇန်နဝါရီ ၁၁/ ၂ဝ၂၂

မြန်မာနိုင်ငံတွင် အိုမီခရွန်ရောဂါပိုးကူးစက်ခံထားရသူ ၃ ဦး ထပ်တွေ့သည်ဟု ကျန်းမာရေးဝန်ကြီးဌာနက ယနေ့ ဇန်နဝါရီ ၁၁ ရက် ညနေ၌ ထုတ်ပြန်ကြေညာသည်။

ယနေ့ အိုမီခရွန်ရောဂါပိုး တွေ့ရှိသူ ၃ ဦးသည် မြန်မာနိုင်ငံသားများဖြစ်ကြပြီး ၄င်းတို့သည် ကယ်ဆယ်ရေးလေယာဉ်များဖြင့် အိန္ဒိယနိုင်ငံမှဝင်ရောက်လာသူများဖြစ်သည်ဟု သိရသည်။

ပြည်ပနိုင်ငံများမှ ပြန်လည်ရောက်ရှိလာသည့် ကိုဗစ်-၁၉ ရောဂါပိုးတွေ့ရှိသူများ၏ ဓာတ်ခွဲနမူနာများအနက် ကိုဗစ်-၁၉ မျိုးရိုးဗီဇပြောင်း ရောဂါပိုးတွေ့ရှိနိုင်သည့်သံသယဖြစ်ဖွယ် ဓာတ်ခွဲနမူနာ (၄)ခုအား ဇန်နဝါရီလ ၉ ရက်တွင် စစ်ဆေးခဲ့စဉ်တွေ့ရှိခြင်းဖြစ်သည်ဟုလည်း ဆိုသည်။

လက်ရှိတွင် ၄င်းတို့အား သတ်မှတ်ဆေးရုံကြီးများတွင် သီးသန့်ထားရှိကာ ကုသစောင့်ရှောက်မှုများ ဆောင်ရွက်လျက်ရှိပြီး ၎င်းတို့နှင့်လေကြောင်းခရီးစဉ်တွင် အတူလိုက်ပါလာသည့် ခရီးသည်များကိုလည်း အသွားအလာကန့်သတ်ခြင်းများဆောင်ရွက်ထားကြောင်း သိရသည်။

မြန်မာနိုင်ငံတွင် ပြီးခဲ့သည့်ဇန်နဝါရီလ ၇ ရက်ကလည်း အိုမီခရွန်ကိုဗစ်မျိုးကွဲသစ်တွေ့ရှိသူ ၁၂ ဦးရှိခဲ့သလို ပြီးခဲ့သည့်နှစ် ဒီဇင်ဘာလ ၂၈ ရက်ကလည်း ယူအေအီးနိုင်ငံမှ ပြန်လာသူ ၄ ဦးတွင် တွေ့ရှိခဲ့သည်။

လက်ရှိတွင် မြန်မာ၌ အိုမီခရွန်ရောဂါပိုးတွေ့ရှိသူ ၁၉ ဦးအထိရှိလာနေပြီဖြစ်သည်။

အိုမီခရွန်ကိုဗစ်မျိုးကွဲသစ်ကို ကမ္ဘာတွင် ပြီးခဲ့သည့် နိုဝင်ဘာလအစောပိုင်းက တောင်အာဖရိကနိုင်ငံ၌ စတင်တွေ့ရှိခဲ့ခြင်းဖြစ်ပြီး လက်ရှိတွင် မြန်မာအပါအဝင် ကမ္ဘာ့နိုင်ငံပေါင်း ၁ဝဝ ကျော်၌ ကူးစက်ပြန့်ပွားနေပြီဖြစ်သည်။

အိုမီခရွန်သည် မြန်မာတွင် ဖြစ်ပွားခဲ့သည့် ဒေလ်တာမျိုးစိတ်ကိုဗစ်ပိုးထက် ရောဂါဖြစ်ပွားမှုပြင်းထန်ခြင်းမရှိသော်လည်း ကူးစက်မှုပိုမိုမြန်ဆန်သည်ဟုလည်း သိရသည်။