မြန်မာတွင် အိုမီခရွန်ရောဂါပိုး ပြည်တွင်း၌ကူးစက်မှုရှိလာနေ

ရေးသူ: Web Master
| ရက်စွဲ: ၃၀ ဇန်နဝါရီ ၂၀၂၂
| ကြည့်ရှုသူ: 7.1k

အေးမြတ်ခိုင်

နိရဥ္စရာ၊ ဇန်နဝါရီ ၂၉/၂၀၂၂

မြန်မာနိုင်ငံတွင် အိုမီခရွန်ရောဂါပိုးသည် ပြည်တွင်း၌ကူးစက်မှုများရှိလာနေသည်ဟု ကျန်းမာရေးဝန်ကြီးဌာန၏ထုတ်ပြန်ချက်အရ သိရသည်။

မြန်မာနိုင်ငံတွင် ဗီဇပြောင်းကိုဗစ်ပိုးသစ် အိုမီခရွန်ရောဂါပိုးကို ၂၀၂၁ ဒီဇင်ဘာ ၂၈ ရက်နေ့တွင် ပြည်ပမှပြန်လည်ဝင်ရောက်လာသူ ၄ ဦးတွင် စတင်တွေ့ရှိခဲ့ပြီးနောက် ယခုရက်ပိုင်းအတွင်းတွင် ပြည်တွင်း၌လည်း ပိုးတွေ့ရှိမှုများရှိလာနေသည်ဟု သိရသည်။

ယမန်နေ့ ဇန်နဝါရီ ၂၈ ရက်နေ့ကလည်း အိုမီခရွန်ရောဂါပိုးအား တမူးမြို့တွင် ၄၈ ဦး၊ ကလေးမြို့တွင် ၂၀ ဦး၊ ထပ်မံကူးစက်ခံရသူ ၃ ဦးနှင့် ကိုဗစ်-၁၉ အတည်ပြုလူနာ ၁ ဦး၊ စုစုပေါင်း ၇၂ ဦးတို့ထံတွင် တွေ့ရှိခဲ့ကြောင်း ကျန်းမာရေးဝန်ကြီးဌာနက ထုတ်ပြန်ထားသည်။

၄င်းတို့နှင့်အနီးကပ်ထိတွေ့သူများကို အသွားအလာကန့်သတ်ခြင်းနှင့် ဓာတ်ခွဲစမ်းသပ်စစ်ဆေးမှုများ အထူးအားဖြည့်ဆောင်ရွက်လျက်ရှိသည်ဟုလည်း ဆိုသည်။

လက်ရှိတွင် မြန်မာနိုင်ငံအတွင်း အိုမီခရွန်ပိုးကူးစက်ခံရသူသည် ပြည်ပမှပြန်လည်ဝင်ရောက်လာသူများနှင့် ပြည်တွင်းမှကူးစက်ခံရသည့်ဦးရေစုစုပေါင်း ၂၈၃ ဦးအထိရှိလာပြီဟု ကျန်းမာရေးဝန်ကြီးဌာန၏ထုတ်ပြန်ထားသည့်စာရင်းအရ သိရသည်။

ရခိုင်ပြည်နယ်အတွင်းတွင်မူ အိုမီခရွန်ရောဂါပိုးကူးစက်ခံရမှုမရှိသေးကြောင်း သိရသည်။

ကိုဗစ်မျိုးကွဲဖြစ်သည့် အိုမီခရွန်ရောဂါပိုးကူးစက်ခံရပါက ရောဂါလက္ခဏာသည် အဓိကအသက်ရှုလမ်းကြောင်းနှင့်သက်ဆိုင်သည့် ချောင်းဆိုးခြင်း၊ လည်ချောင်းနာခြင်း၊ နှာရည်ယိုခြင်း၊ ခေါင်းကိုက်ခြင်း၊ အသက်ရှူကြပ်ခြင်း၊ အဖျားရှိခြင်း၊ နွမ်းနယ်ခြင်း၊ ဖျားနာခြင်း၊ နာကျင်ကိုက်ခဲခြင်းနှင့် အနံ့ပုံမှန်မရခြင်းတို့ဖြစ်တတ်ကြောင်း သိရသည်။

အိုမီခရွန်ပိုးကို ပြီးခဲ့သည့်နှစ် နိုဝင်ဘာလအစောပိုင်းက တောင်အာဖရိကနိုင်ငံတွင် စတင်တွေ့ရှိခဲ့ခြင်းဖြစ်သည်။

---------------------------------