ရခိုင်အနောက်ဘက်နယ်စပ်မောင်တောမြို့နယ်တွင် သူခိုးများကဓားဖြင့်ခုတ်၍ နွားခြံစောင့် ၂ ဦးကို ဆေးရုံတင်ထားရ

နိရဥ္စရာ၊ ဒီဇင်ဘာ ၁၆/၂၀၂၂

ရခိုင်အနောက်ဘက်နယ်စပ် မောင်တောမြို့နယ်တောင်ပိုင်း မောရဝတီကျေးရွာတွင် နွားသူခိုးများက ဓားဖြင့်ခုတ်၍ နွားခြံစောင့် ၂ ဦး၌ ဒဏ်ရာပြင်းထန်စွာ ရရှိသွားခဲ့သဖြင့် ဆေးရုံတင်ထားရကြောင်း သိရသည်။

ပြင်းထန်ဒဏ်ရာရသွားသူများမှာ မောင်တောမြို့နယ် ပန်းတောပြင်ကျေးရွာမှ ဒီလ်မာမောက်(၃၅)နှစ်နှင့် မောရဝတီကျေးရွာမှ ဦးမဲဒုတ်(၆၀)နှစ်ခန့် တို့ဖြစ်သည်။

သူတို့ နှစ်ဦးမှာ မောရဝတီကျေးရွာရှိ နွားခြံတစ်ခုတွင်အလုပ်လုပ်နေသူများဖြစ်ကြပြီး  ယနေ့ ဒီဇင်ဘာလ ၁၆ ရက် နံနက်အစောကြီး  ညဥ့် ၁ နာရီကျော်တွင်ယင်းနွားခြံသို့ နွားလာခိုးသူများက ဓားဖြင့် တိုက်ခိုက်ခဲ့ခြင်း ဖြစ်သည်ဟု ဒေသခံများက ပြောသည်။

ပန်းတောပြင်ရွာသားတစ်ဦးက "ဒဏ်ရာကတော့ ပြင်းလို့ သူတို့ကို မောင်တောဆေးရုံကိုပို့ထားရတယ်။ ဒဏ်ရာကပြင်းတယ်။ ဘယ်လို အနေအထားရှိနေတယ်ဆိုတာတော့ မသိရသေးဘူး"ဟု ပြောသည်။

ဖြစ်စဥ်ဖြစ်ပွားခဲ့သည့် မောရဝတီကျေးရွာမှ အုပ်ချုပ်ရေးမှူး ဦးလှထွန်းဦးကလည်း နွားသူခိုးများထံ နွားခြံစောင့် ၂ ဦး ဓားခုတ်ခံရသည်မှာဟုတ်မှန်ပြီး သူ ဆေးရုံတွင်အလုပ်များနေသည့်အတွက် အသေးစိတ်မပြောနိုင်သေးဟု ပြောသည်။

အဆိုပါနွားခြံတွင် ယခင်က အစောင့်များမရှိ၍ နွားအချို့ပျောက်ဖူးသည့်အတွက် ယခုကဲ့သို့ ခြံစောင့်များထားကာ စောင့်ခိုင်းထားရချိန် နွားသူခိုးများ၏တိုက်ခိုက်ခြင်းကို ခံလိုက်ရခြင်း ဖြစ်သည်ဟုလည်း ဒေသခံများက ပြောသည်။

ပြီးခဲ့သည့်အောက်တိုဘာလခန့်ကလည်း မောင်တောမြို့နယ် မောရဝတီကျေးရွာ၊ အလယ်သံကျော်၊ သရီကုန်ဘောင်နှင့် ဥဒေါင်းကျေးရွာတို့မှ နွားကောင်ရေ ၁၀ ကျော် အခိုးခံလိုက်ရသည်ဟု သိရသည်။

မောင်တောတွင် နွားသူခိုးများသောင်းကျန်းနေပြီးခိုးယူရရှိသည့်နွားများကို တဘက် ဘင်္ဂလားဒေ့ရှ်နိုင်ငံသို့ လှေများဖြင့် တရားမဝင် ခိုးယူရောင်းချမှုများရှိနေသည်ကို သက်ဆိုင်ရာဒေသအာဏာပိုင်များကို တိုင်တန်းကြသော်လည်း ဖော်ထုတ်အရေးယူပေးခြင်းမျိုးမရှိဟု ဒေသခံများက ပြောသည်။

မောင်တောမြို့နယ်တောင်ပိုင်း မောင်တော-အငူမော်လမ်းတစ်လျှောက်ရှိ ဝေသာလီ၊ ရွှေရင်အေး၊ ဗောဓိကုန်း၊ ခရေမြိုင်၊ ကင်းချောင်း၊ သရီကုန်ဘောင်၊ ရွှေဗဟို၊ ကိုင်းကြီး၊ မောရဝတီ၊ ဥဒေါင်းနှင့် အင်းဒင်စသည့် ကျေးရွာများသည် နွားမွေးမြူရေးလုပ်ငန်းကို အဓိက လုပ်ကိုင်ကြသည်ဟု ဒေသခံများက ပြောသည်။