ရူပဗေဒပညာရှင် ဆရာကြီး ဦးစံသာအောင် နှစ် (၁၀၀) ပြည့်မွေးနေ့အခမ်းအနား စစ်တွေတွင် ကျင်းပ

နိရဥ္စရာ၊ ဖေဖော်ဝါရီ ၂၇/၂၀၂၃
(ဓာတ်ပုံသတင်း)

ရူပဗေဒပါမောက္ခ ရခိုင်သမိုင်းပညာရှင် ဆရာကြီး ဦးစံသာအောင်၏ နှစ် (၁၀၀)ပြည့် မွေးနေ့အထိမ်းအမှတ် အခမ်းအနားကို  ဖေဖော်ဝါရီလ ၂၆ ရက်၊ နေ့လယ် ၁ နာရီက စစ်တွေမြို့ ဂြစ်ဘက် ကျောင်းတိုက်တွင် သာကီမဏ္ဍိုင်ရခိုင်ယဉ်ကျေးမှုအဖွဲ့ကဦးဆောင်ကျင်းပခဲ့ကြောင်း သိရသည်။

အဆိုပါအခမ်းအနားသို့ စစ်တွေမြို့မှ ရခိုင်သမိုင်းလေ့လာသူများ၊ စာရေးဆရာများနှင့် မိတ်ဆွေဟောင်းများက တက်ရောက်လာခဲ့ကြပြီး ဆရာကြီးနှင့် ပတ်သက်သည့် အမှတ်တရ စကားများကို မျှဝေပြောဆိုခဲ့ကြသည်။

အဆိုပါအခမ်းအနားတက်ရောက်လာသူများ၏ဆွေးနွေးအကြံဉာဏ်ပေးမှုကြောင့် ဆရာကြီးဦးစံသာအောင် အကြောင်း စာအုပ်ဖြစ်မြောက်ရေးကော်မတီတစ်ခုကိုလည်း ယနေ့အခမ်းအနားတွင် ဖွဲ့စည်းခဲ့ကြသည်။

ဆရာကြီးဦးစံသာအောင်သည် ၁၉၅၄ ခုနှစ်တွင် အမေရိကန်နိုင်ငံ ဟားဗက်တက္ကသိုလ်မှ မဟာသိပ္ပံ သင်တန်းကို ရူပဗေဒသဘာသာရပ်ဖြင့် အောင်မြင်ခဲ့ပြီး ရူပဗေဒပါမောက္ခအဖြစ် မြန်မာ့ပညာရေးလောကတွင် ထင်ရှားခဲ့သူ ဖြစ်သည်။

ထို့အပြင် ဆရာကြီးဦးစံသာအောင်သည် ၁၉၇၂ ခုနှစ်မှစ၍ ရခိုင်သုတေသနစာအုပ်များကို ရေးသားထုတ်ဝေခဲ့ပြီး အေဒီ ၆ ရာစုနှင့် ယင်းမတိုင်မီ ရက္ခိုင်ပြည်သုံးအက္ခရာစာအုပ်၊ အာနန္ဒစန္ဒြ ရှစ်ရာစုရခိုင်ဝေသာလီမင်း စာအုပ်၊ ရက္ခိုင်ဒင်္ဂါးများနှင့် The Buddhist Art of Ancient Arakan စာအုပ်တို့ကိုလည်း ပြုစုထုတ်ဝေခဲ့ကြောင်း သိရသည်။

ဆရာကြီးဦးစံသာအောင်သည် ရူပဗေဒပါမောက္ခတစ်ဦးလည်းဖြစ်ကာ ရခိုင့်ယဉ်ကျေးမှု သမိုင်းကြောင်းများကိုလည်း ဖော်ထုတ်ခဲ့သည့် သမိုင်းသုတေသီတစ်ယောက်ဖြစ်သည်ဟု သိရသည်။

ဆရာဦးစံသာအောင်ကို ၁၉၂၃ ခုနှစ်၊ ဖေဖော်ဝါရီလ ၂၃ ရက်တွင် မွေးဖွားခဲ့ပြီး ၁၉၈၁ ခုနှစ်၊ မေလ ၂၅ ရက်၊ အသက် ၅၆ နှစ်အရွယ်တွင် ကွယ်လွန်ခဲ့ကြောင်း သိရသည်။

အဆိုပါဆရာဦးစံသာအောင်၏ မွေးနေ့အထိမ်းအမှတ်နေ့ အခမ်းအနားကို ပြီးခဲ့သည့်နှစ်များကလည်း သာကီမဏ္ဍိုင်ရခိုင့်ယဉ်ကျေးမှုအဖွဲ့က ဦးဆောင်၍ ကျင်းပမှုများပြုလုပ်ခဲ့ကြောင်း သိရသည်။ (NN-8/12)