ပါတီဗဟိုကော်မတီအစည်းအဝေးတက်ရောက်ရန် မြောက်ဦးသို့ ANP ခေါင်းဆောင်များရောက်ရှိလာ
-
ရေးသူ:
Web Master
-
| ရက်စွဲ:
၁၁ ဖေဖော်ဝါရီ ၂၀၂၁
-
| ကြည့်ရှုသူ:
2k
နိရဉ္စရာ၊ ဖေဖော်ဝါရီ ၁၁ / ၂၀၂၁
ဖေဖော်ဝါရီ ၁၂ ရက်နေ့မှ ၁၄ ရက်နေ့ထိ သုံးရက်တိုင်တိုင် ကျင်းပမည့် ရခိုင်အမျိုးသားပါတီ(ANP)၏ ဗဟိုကော်မတီအစည်းအဝေးကို တက်ရောက်ရန် ပါတီခေါင်းဆောင်အများအပြား ယနေ့ မြောက်ဦးမြို့သို့ ရောက်ရှိလာကြသည်ဟု သတင်းရရှိသည်။
ရောက်ရှိလာကြသူများအထဲတွင် ရခိုင်တစ်ပြည်နယ်လုံးမှ ပါတီဗဟိုကော်မတီဝင်များ၊ လွှတ်တော်ကိုယ်စားလှယ်များ ပါဝင်သည်ဟု သိရသည်။
ပါတီဥက္ကဋ္ဌဖြစ်သူ ဦးသာထွန်းလှက " ဗဟိုကော်မတီအစည်းအဝေးကို ခေါ်ဖို့ လိုအပ်တဲ့အတွက် ခေါ်တာပါ။ ဗဟိုကော်မတီဝင်အားလုံးဖိတ်ကြားထားပါတယ်။ ဗဟိုကော်မတီဝင်တွေအများအပြား ရောက်ရှိနေကြပါပြီ "ဟု နိရဉ္စရာသတင်းဌာနသို့ပြောသည်။
အစည်းအဝေးတက်ရောက်ရန် ဗဟိုကော်မတီဝင်နှင့် လွှတ်တော်ကိုယ်စားလှယ် ၁၀၀ ဦးခန့် ကို ဖိတ်ကြားထားသည်ဟု ပြောဆိုသည်။
ဗဟိုကော်မတီအစည်းအဝေးတွင် ဆွေးနွေးမည့်အကြောင်းအရာများကို ဆွေးနွေးနေတုန်းဖြစ်၍ ဆွေးနွေးမည့် အကြောင်းအရာအစီအစဉ် မပြောနိုင်သေးကြောင်း ၄င်းက ဆက်ပြောသည်။
မြောက်ဦးမြို့ နယ် ပြည်နယ်လွှတ်တော်ကိုယ်စားလှယ် ဦးထွန်းသာစိန်က “ ကျင်းပမယ့် နေရာက နန်းသားကန် ဓမ္မာရုံမှာဖြစ်ပါတယ်။ မနက်ဖြန် မနက် ၉ နာရီမှာ အစည်းအဝေးကို စတင်ကျင်းပမှာ ဖြစ်ပါတယ်” ဟု ပြောကြားသည်။
အဆိုပါဗဟိုကော်မတီအစည်းအဝေးသည် သောကြာနေ့ တနင်္ဂနွေအထိ ကျင်းပပြုလုပ်မည်ဖြစ်ကာ နံနက် ၉ နာရီမှ ညနေ ၄ နာရီထိ ကျင်းပမည်ဖြစ်ကြောင်း သိရသည်။
ရခိုင်အမျိုးသားပါတီသည် ၂၀၂၀ ပြည့်နှစ်၊ နိုဝင်ဘာ ၈ ရက်နေ့က ပြုလုပ်ခဲ့သည့် ရွေးကောက်ပွဲတွင် အမျိုးသားလွှတ်တော် (၄)နေရာ၊ ပြည်သူ့လွှတ်တော် (၄)နေရာနှင့် ပြည်နယ်လွှတ်တော် (၇)နေရာ၊ စုစုပေါင်း (၁၅)နေရာဖြင့် ရခိုင်ပြည်နယ်တွင် လွှတ်တော်နေရာအများဆုံး အနိုင်ရရှိထားသည့်ပါတီတစ်ခုဖြစ်သည်။
၂၀၁၅ ရွေးကောက်ပွဲတွင်လည်း ရခိုင်ပြည်နယ်တွင် လွှတ်တော်နေရာအများဆုံးကို အနိုင်ရရှိခဲ့သော်လည်း ပြည်နယ် အစိုးရဖွဲ့ခွင့် မရရှိခဲ့သည့် တိုင်းရင်းသားပါတီ တစ်ခုလည်းဖြစ်သည်။