ရသေ့တောင်မှ ဦးဦးသိန်းမောင် ဖမ်းဆီးခံထားရာမှ ပြန်လွတ်လာ

ဆောင်းဇာခြည်
နိရဥ္စရာ၊ နိုဝင်ဘာ ၁၆/ ၂ဝ၂ဝ

ရသေ့တောင်မြို့မှ ဖမ်းဆီးခံထားသူ နှစ်ဦးအနက်မှ နောက်ဆုံး ကျန်ရှိနေခဲ့သူ ဦးဦးသိန်းမောင် (၇၁) နှစ်ကို ရက္ခိုင့်တပ်တော် (AA) က ယမန်နေ့က ပြန်လွှတ်ပေးလိုက်သည်ဟု သတင်းရရှိသည်။

ဦးဦးသိန်းမောင်၏ သမီးဖြစ်သူ မကြည်ကြည်မိုးက “အဖေက မနေ့က နေ့လယ် ၁၂ နာရီမှာ အိမ်ကို ပြန်ရောက်ပါပြီ။ အိမ်ကိုတော့ ကျန်းကျန်းမာမာနဲ့ ပြန်ရောက်လာပါတယ်။ အကုန်လုံးက အေးအေး ဆေးဆေးပါပဲ။ အခုတော့ အဖေ အိပ်နေပါတယ်။ အကြောင်းစုံသိချင်ရင်တော့ အဖေနိုးလာမှ ပြောရမယ်” ဟု သူမက ယနေ့ နေ့လယ် ၁ နာရီခန့်က နိရဥ္စရာသို့ ပြောသည်။

ရသေ့တောင်မြို့မှ ဦးဦးသိန်းမောင်၊ ဦးဦးသာဇံတို့သည် အောက်တိုဘာ ၂၁ ရက်နေ့ နံနက် ၉ နာရီအချိန်က ပြည်သူလွှတ်တော်ကိုယ်စားလှယ် ဒေါ်ခင်စောဝေအပါအဝင် အစိုးရဌာနမှ ဘေးစီမံ ဝန်ထမ်းအချို့နှင့် ရေပိုက်ဆုံကျေးရွာသို့ ကယ်ဆယ်ရေးသွားပေးစဉ် ငလပြားဆိပ်ကမ်းတွင် AA တပ်ဖွဲ့ဝင်များက  ဖမ်းဆီးခေါ်ဆောင်သွားခဲ့ခြင်းဖြစ်သည်။

ဦးဦးသာဇံမှာ ဖမ်းဆီးခြင်းခံခဲ့ရပြီးနောက် ၉ ရက်အကြာ ပြီးခဲ့သည့် အောက်တိုဘာ ၂၉ ရက်နေ့က ပြန်လွတ်လာခဲ့သည်။

ဦးဦးသာဇံ  “ခေါ်ယူသွားတာက တောထဲကိုပါ။ မျက်နှာတွေ ဖုံးပြီးခေါ်သွားတယ်။ AA အဖွဲ့အစည်းကပါ။ စစ်ဆေးမေးမြန်းစရာရှိလို့ဆိုပြီး ခေါ်သွားတာပါ။ စစ်တာက တပ်တို့ ဘာတို့နဲ့ အဆက်အသွယ် လုပ်တယ်လို့ ကြားတယ်ဆိုပြီး ခေါ်သွားတာပါ။ ကျွန်တော်တို့ကို လူကြီးတွေဖြစ်လို့ ကောင်းကောင်းမွန်မွန်ဆက်ဆံပါတယ်” ဟု သူလွတ်လာသည့်နေ့က နိရဥ္စရာသို့ ဖြေကြားခဲ့သည်။