ရခိုင်မှ ဆင်ဖြူငယ်နေပြည်တော်သို့ ရောက်ရှိ

နိရဉ္စရာ၊ အောက်တိုဘာ ၂၈/၂၀၂၂

ရခိုင်ပြည်နယ်၊ တောင်ကုတ်မြို့နယ်၊ ခူးတိုက်နယ်မှ ယူဆောင်သွားသောဆင်ဖြူငယ်သည် လက်ရှိနေပြည်တော်သို့ ရောက်ရှိနေပြီဖြစ်ကြောင်း သိရသည်။

အောက်တိုဘာ ၂၆ ရက်နေ့က ရန်ကုန်မှတဆင့် နေပြည်တော်သို့ရောက်ရှိလာခြင်းဖြစ်ပြီး ယမန်နေ့က ဆင်ဖြူတော်ငယ်သည် မိခင်ဆင်မဇာနန်းလှနှင့်အတူ အဆင်တန်ဆာများဆင်မြန်းကာ  နေပြည်တော်ရှိ ဥပ္ပါတသန္တိစေတီတော်မြတ်ကြီးသို့ ဘုရားဖူးရောက်ရှိခဲ့သည်ဟု စစ်ကောင်စီ ပြန်ကြားရေးဝန်ကြီးဌာနက သတင်းဖော်ပြသည်။

ဆင်ဖြူငယ်ကို လာမည့်ရက်ပိုင်းအတွင်း ဘွဲ့အမည်ပေးအပ်ပွဲပြုလုပ်မည်ဟုလည်း သိရသည်။

အဆိုပါ ဆင်ဖြူငယ်သည် ဇူလိုင် ၂၃ ရက်က ခူးတိုက်နယ်ရှိ မြန်မာ့သစ်တောဆင်ဝိုင်းတွင် မွေးဖွားခဲ့ခြင်းဖြစ်ပြီး ဆင်ဖြူတော် ကြန်အင်လက္ခဏာ ၇ ချက်ဖြင့် ကိုက်ညီသောကြောင့် ဆင်ဖြူတော်အဖြစ် သတ်မှတ်လိုက်ကြောင်း စစ်ကောင်စီ၏ သတင်းထုတ်ပြန်ရေးအဖွဲ့က သြဂုတ်လ ၃ ရက်နေ့တွင် သတင်းထုတ်ပြန်ခဲ့သည်။

အောက်တိုဘာလ ၁၁ ရက်နေ့ နံနက်ပိုင်းက ဆင်ဖြူတော်ငယ်အပါအဝင် ဆင် (၄) ကောင်ကို တောင်ကုတ်မြို့ ရွှေလင်းယုန်ဆိပ်ကမ်းမှတဆင့် ရန်ကုန်သို့ ရေယာဉ်တစ်စီးဖြင့် လုံခြုံရေးတင်းကျပ်စွာ ယူဆောင်သွားခြင်းဖြစ်သည်။

ယခင်ပေါ်ထွန်းခဲ့သော ဆင်ဖြူတော် ၉ စီး၌ ပထမဆုံးပေါ်ထွန်းခဲ့သော ဆင်ဖြူ ၁ စီးသာလျှင် ကြန်အင်လက္ခဏာ ၇ ချက်နှင့် ကိုက်ညီခဲ့ပြီး ကျန် ၈ စင်းသည် အများဆုံး ၆ ချက်သာ ကိုက်ညီခဲ့ကာ ယခုဆင်ဖြူငယ်သည်လည်း ကြန်အင် (၇) နှင့်ကိုက်ညီသည့်အတွက် ထူးခြားသည့် ဆင်ဖြူအဖြစ် စကစပြောခွင့်ရ ဗိုလ်ချုပ်ဇော်မင်းထွန်းက သတင်းစာရှင်းလင်းပွဲတစ်ခုတွင် ပြောဆိုထားသည်။

နေပြည်တော်ရှိ ဆင်ဖြူအများစုမှာ ရခိုင်ပြည်မှရရှိခြင်းဖြစ်ပြီး ဆင်ဖြူများကို နေပြည်တော်နှင့် ရန်ကုန်ရှိ မင်းဓမ္မကုန်း ရတနာဆင်ဖြူတော် ဥယျာဉ်တို့တွင် ထိန်းသိမ်းထားကြောင်းသိရသည်။(NN-7)