- Web Master
- ၀၇ စက်တင်ဘာ ၂၀၂၄
(MNDAAမဟာမိတ်တပ်ဖွဲ့ဝင် ၂ ဦးကျဆုံးပြီး ၃ဦးဒဏ်ရာရ)
နိရဉ္စရာ၊ဇွန် ၂၉/၂၀၂၄
စစ်ကောင်စီတပ်က ဒီမိုကရက်တစ်မဟာမိတ်တပ်မတော် (MNDAA) ၏ ကာကွယ်ရေး နယ်မြေကို ထိုးစစ်ဆင် တိုက်ခိုက်ခဲ့ရာ MNDAA မှ မဟာမိတ်တပ်ဖွဲ့ဝင် ရှေ့တန်းတပ်သား ၂ ဦး ကျဆုံးပြီး အခြား ၃ ဦး ဒဏ်ရာ ရရှိသွားခဲ့သည်ဟု ဇွန် ၂၉ ရက် ကိုးကန့်သတင်း ထုတ်ပြန်ချက်တွင် ဖော်ပြသည်။
ဇွန် ၂၉ ရက် နံနက် ၈ နာရီ လားရှိုးမြို့ မြောက်ဘက် နမ့်ဖူးယိုင်ရှိ မဟာမိတ်တပ်များ ကာကွယ်ရေး နယ်မြေကို အကြမ်းဖက် စစ်ကောင်စီ တပ်ရင်း (၅၇၉) မှ ဝင်ရောက် တိုက်ခိုက်ရာမှ တိုက်ပွဲ ဖြစ်ပွားခဲ့သည်ဟု ဆိုသည်။
၎င်းတိုက်ပွဲတွင် မိမိကိုယ်ကို ခုခံကာကွယ်ရန် အတင်းအကြပ် ပြန်လည်ပစ်ခတ်ခဲ့ရပြီး တိုက်ပွဲတွင် ထိုသို့ သေဆုံး ထိခိုက်ဒဏ်ရာရရှိခဲ့ကြောင်း ဖော်ပြသည်။
ဇွန် ၂၉ ရက် နံနက် ၁၀ နာရီ ၃၀ မိနစ်တွင် အာဏာသိမ်း စစ်ကောင်စီတပ်များ၏ တိုက်ခိုက်မှုကို MNDAA စစ်သည်တော်များက သူရဲကောင်းဆန်ဆန် ပိတ်ဆို့ထားပြီးနောက် နံနက် ၁၁ နာရီတွင် စစ်ကောင်စီတပ် ဆုတ်ခွာသွားခဲ့ကြောင်း သတင်းရရှိသည်ဟု ဆိုသည်။
တိုက်ခိုက်မှု မအောင်မြင်သောကြောင့် အာဏာသိမ်း စစ်ကောင်စီတပ်သည် လားရှိူးမြို့ (ဟိုပိတ်) ၁၃ မိုင်မှ မဟာမိတ်တပ်များ၏ ကာကွယ်ရေးနယ်မြေအား အမြောက်ကျည်မျိုးစုံဖြင့် ပစ်ခတ်ခဲ့သည်ဟု သတင်းထုတ်ပြန်ချက်တွင် ဖော်ပြသည်။
ည ၈ နာရီ ၃၄ မိနစ်အထိ စစ်ကောင်စီတပ်က ဗုံးကြဲတိုက်ခိုက်မှုများ ဆက်လက်ဖြစ်ပွားလျက်ရှိသည်။
လက်ရှိအချိန်တွင် စစ်ကောင်စီသည် မဟာမိတ်တပ်များ၊ တအောင်းတပ်မတော်နှင့် အာရက္ခတပ်တော်တို့နှင့် ရရှိထားသည့် "ဟိုဂင်သဘောတူညီချက်" ကို ချိုးဖောက်ပြီး ညီနောင် မဟာမိတ် တပ်များကို ထပ်မံတိုက်ခိုက်ခြင်းများပြုလုပ်ခဲ့သည်။
စစ်ကောင်စီသည် ဇွန်လ ၁၈နေ့ တွင် တအောင်းတပ်မတော်၏ ခံစစ်နယ်မြေကို ဗုံးကြဲ တိုက်ခိုက်ခြင်းအပြင် ဒရုန်းများဖြင့် ဗုံးကြဲတိုက်ခိုက်မှုများပြုလုပ်ခဲ့သဖြင့် ပြီးခဲ့သည့် ဇွန်လ ၂၅ ရက်နေ့မှ စတင်ပြီး တိုက်ပွဲ စတင်ဖြစ်ပွားနေသည်ဟု သိရှိရသည်။
ဆက်လက်ပြီး ဇွန် ၂၉ ရက်နေ့တွင် ကိုးကန့်တပ် ( MNDAA)နှင့် စစ်ကောင်စီတပ်တို့အကြား တိုက်ပွဲများ ပြန်လည်စတင်ဖြစ်ပွားလာြခင်းဖြစ်သည်။
စစ်ကောင်စီသည် အပစ်အခတ်ရပ်စဲရေး လျစ်လျူရှုထားပြီး တိုက်ခိုက်မှုကို စတင်လာသဖြင့် မြန်မာနိုင်ငံရှိ ရှမ်းမြောက်ဒေသပိုင်းတွင် တိုက်ပွဲများ ပိုမိုပြင်းထန်လာနိုင်သည်ဟု ထုတ်ပြန်ချက်တွင် ဖော်ပြထားသည်။