မင်းပြားကျိန်းတောင်ကို စစ်ကောင်စီက ဒရုန်းဖြင့် လာရောက်ပစ်ခတ်

ဒေသခံတစ်ဦးက “ လေယာဉ်မဟုတ်ပါဘူး။ ဒီနေ့ မနက် ၇ နာရီခွဲလောက်မှာ ဒရုန်းနဲ့လာပစ်တာပါ။ ကျိန်းတောင်ကို လာပစ်တာပါ” ဟု ယနေ့ နံနက်က ပြောသည်။

မင်းပြားရှိတပ်ရင်းများကြသည့် ခမရ ၅၄၁၊ ၃၈၀၊ ၃၇၉ တပ်ရင်း သုံးခုစလုံးကို ရက္ခိုင့်တပ်တော်က သိမ်းပိုက်လိုက်ပြီဟု သတင်းများပျံ့နှံ့နေမှုနှင့် ပတ်သက်ပြီးမေးမြန်းရာတွင် ၎င်းက တိတိကျကျ မပြောနိုင်သေးကြောင်း ပြောကြားသည်။

“ တော်တော်များ နေရာတွေက ကျသွားပါပြီ။ အေအေသိမ်းပိုက်လိုက်ပါပြီ။ ၃၈၀ တပ်ရင်း၊ ၅၄၁ တပ်ရင်း အကုန်သိမ်းလိုက်ပါပြီ။ ကျိန်းတောင်ပေါ်တပ်စွဲထားတဲ့စခန်းလည်းကျသွားပါပြီ။  ခမရ ၃၇၉ တပ်ရင်းကို ရှင်းလင်းနေရတုန်းလို့ ကြားပါတယ်။ အဲဒီမှာ စစ်သားအနည်းငယ် ပုန်းအောင် ကျန်နေတယ်လို့ ကြားပါတယ်။ အရပ်သားတွေအနေနဲ့ အသေးစိတ် သိဖို့ မလွယ်နိုင်သေးပါဘူး”ဟု ပြောကြားသည်။

ညီနောင်မဟာမိတ်သုံးဖွဲ့၏ ဇန်နဝါရီ ၂၀ ရက် ည ၁၁ နာရီ ၅၀ မိနစ်ထုတ်ပြန်ချက်တွင် ရက္ခိုင့်တပ်တော်သည်  မင်းပြားအခြေစိုက် “(၃၇၉)၊ (၃၈၀)နှင့် (၅၄၁)”၊ တပ်ရင်းများ လက်ရှိ ထိုးစစ်ဆင် တိုက်ခိုက်နေကြောင်း ဖော်ပြထားသည်။

လက်ရှိ လူမှုကွန်ယက်စာမျက်နှာပေါ်တွင် မင်းပြားတပ်ရင်း ၃ ခုစလုံးကို ရက္ခိုင့်တပ်တော်က သိမ်းပိုက်လိုက်ပြီ ဖြစ်ကြောင်း ဖော်ပြနေကြသည်။

ယနေ့ နေ့လယ် ၁၂ နာရီကျော်တွင် မင်းပြားသို့ ပြန်လည်ဆက်သွယ်ရာ ဖုန်းလိုင်းမရရှိတော့ပါ။ သို့အတွက် နောက်ဆုံးမင်းပြားမြို့၏ လက်ရှိ အခြေအနေကို တင်ပြနိုင်ခြင်း မရှိသေးပါ။