- Web Master
- ၁၆ စက်တင်ဘာ ၂၀၂၄
နှစ်ရက်ကြာ တိတ်ဆိတ်ငြိမ်သက်သွားပြီးနောက် ဘင်္ဂလာဒေ့ရှ်နိုင်ငံ၊ ဘင်ဒရိုဘင်ခရိုင်၊ နက်ကျောက်ဆရီမြို့နယ် နယ်စပ်တလျှောက် မြန်မာဘက်ခြမ်းတွင် သေနတ်ပစ်ခတ်တိုက်ခိုက်မှုအသစ်များ ယနေ့ မွန်းလွဲပိုင်းတွင် စတင်ထပ်မံဖြစ်ပွားခဲ့သည်။
မြန်မာနိုင်ငံဘက်ခြမ်းရှိ သေနတ်သံများနှင့် မော်တာကျည်များ ပေါက်ကွဲသံများကို တောင်ပြို ဒေသတွင် ယနေ့ မွန်းလွဲ ၃ နာရီမှ ညနေ ၅ နာရီအထိ ထပ်မံကြားနေရကြောင်း နတ်ကျောက်ဆရီမြို့နယ်၊ ခေါင်းတုံးဒေသအုပ်ချုပ်ရေး အဖွဲ့ဝင် Shafiqul Islam က ပြောသည်။
ဤတိုက်ပွဲအခြေအနေသည် ကြာသပတေးနေ့ နံနက်အစောပိုင်းကတည်း စပြီး လွန်ခဲ့သော နှစ်ရက်အတွင်း ငြိမ်သက်သွားခဲ့ရာမှ ယနေ့ စနေနေ့တွင် ထပ်မံပစ်ခတ်သံများကိုကြားခဲ့ရခြင်းဖြစ်သည်။
“ အခု ထပ်ပြီး တိုက်ပွဲတွေဖြစ်ပွားလာတယ်” ဟု ၎င်းက ဆက်ပြောသည်။
လွန်ခဲ့သည့် ရက်သတ္တပတ်အနည်းငယ်က ညဘက်တွင် ဖြစ်ပွားလေ့ရှိသည့် တိုက်ပွဲများသည် လက်ရှိ နေ့ခင်းဘက်တွင် စတင်ဖြစ်ပွားလာ၍ လုံခြုံမှုမရှိသလို စိုးရိမ်ထိတ်လန့်မှုများ ခံစားနေကြရသည်ဟု ၎င်းက ဆိုသည်။
ရခိုင်ပြည်နယ်တွင် ပြီးခဲ့သည့် နိုဝင်ဘာလ ၁၃ ရက်နေ့ကစပြီး မြန်မာစစ်တပ်နှင့် ရက္ခိုင့်တပ်တော် (Arakan Army) တို့အကြား တိုက်ပွဲတွေ ပြင်းထန်စွာ ဖြစ်ပွားနေသည်။
ဘင်္ဂလားဒေ့ရှ်နိုင်ငံဘက်ခြမ်း၊ တောင်ပြိုမြို့ ဥတာပါရာလမ်းကို ဖြတ်သန်းမောင်းနှင်လာစဉ် မော်တော်ယာဥ်သုံးဘီး CNG သုံးဘီးကား၏ လေကာမှန် ကျည်ထိမှန်၍ ကွဲသွားခဲ့ကြောင်း နယ်စပ် တောင်ပြိုဒေသတွင် နေထိုင်သူ တောင်ပြိုဒေသခံတစ်ဦးဖြစ်သူ မန်နူအူဒင်က ပြောသည်။
သို့ သော်လည်း အဆိုပါဖြစ်စဉ်တွင် ထိခိုက်ဒဏ်ရာရသူမရှိကြောင်း ၎င်းက ပြောသည်။
နယ်စပ်ဒေသ အုပ်ချုပ်ရေး အဖွဲ့ဝင် Shafiqul ကလည်း အဆိုပါသတင်းကို အတည်ပြုခဲ့သည်။
“မြန်မာနိုင်ငံမှာ ဖြစ်ပွားခဲ့သည့် တိုက်ပွဲအတွင်း တောင်ပြိုစျေးရှိ ဆိုင်မှ သေနတ်ပစ်ခတ်သံ ကျည်အတောင့် ၁၀၀ ကျော်နဲ့ မော်တာကျည် ၃ လုံး ပေါက်ကွဲသံများကို ကြားခဲ့ရကြောင်း တောင်ပြိုစျေးမှ အထည်ချုပ်ဆိုင်ပိုင်ရှင် မူဟာမတ် ချာဖူအာလာမ်က ပြောသည်။
“ကြောက်ပြီး ဆိုင်ကို ချက်ချင်းပိတ်ပြီး အိမ်ပြန်ခဲ့တယ်” ဟု ၎င်းက ဆက်လက်ပြောသည်။
ပစ်ခတ်မှုဖြစ်ပွားပြီးနောက် လူများသည် ခေါင်းတုံးရှိ စျေးဆိုင်များကို ပိတ်ထားလိုက်ကြသည်။
မကြာသေးမီရက်သတ္တပတ်များအတွင်းက မြန်မာစစ်တပ်နှင့် ရက္ခိုင့်တပ်တော်တို့ အကြား တိုက်ပွဲများ ပိုမိုပြင်းထန်လာခြင်းကြောင့် ဘင်ဒရိုဘင်ခရိုင် နတ်ကျောက်ဆရီမြို့နယ်မှ ကော့စ်ဘဇားခရိုင် တက်ကနက်မြို့နယ်အထိ ဘင်္ဂလား-မြန်မာ နယ်စပ်တလျှောက်တွင် နေထိုင်ကြသည့် ပြည်သူများမှာ စိုးရိမ်ထိတ်လန့်နေကြသည်ဟု ဆိုသည်။
လွန်ခဲ့သည့် ရက်အတော်ကြာတွင် ခေါင်းတုံး နယ်စပ်တစ်လျှောက် ဇီရိုမျဉ်းအနီးတွင် နေထိုင်သူ ရာပေါင်းများစွာသည် ကြောက်ရွံ့သဖြင့် အခြားနေရာများတွင် ပြောင်းရွှေ့နေနေကြသည်။
Ref: The Daily Star
ပုံစာ- ၂၀၂၄ ခုနှစ် ဇန်နဝါရီ ၂၉ ရက် ညပိုင်းက ဘင်္ဂလာ- မြန်မာနယ်စပ်တွင် တိုက်ပွဲဖြစ်ပွားရာမှ ထွက်ပေါ်လာသည့် မီးခိုးလုံးများ (ဖိုင်ဓာတ်ပုံ)/Somoy National Desk